ارقالىق قالالىق قازاق جاسوسپىرىمدەر دراما تەاترى جازۋشى جۇماگۇل سولتىنىڭ «جىندى كوبەلەك» پەساسىن ساحنالادى. رەسپۋبليكالىق بايقاۋدا جۇلدە العان بۇل شىعارما ءوزىمىز ءومىر ءسۇرىپ وتىرعان بۇگىنگى قوعامنىڭ كوكەيكەستى ماسەلەسىن قوزعايدى.
ارقالىق قالالىق قازاق جاسوسپىرىمدەر دراما تەاترى جازۋشى جۇماگۇل سولتىنىڭ «جىندى كوبەلەك» پەساسىن ساحنالادى. رەسپۋبليكالىق بايقاۋدا جۇلدە العان بۇل شىعارما ءوزىمىز ءومىر ءسۇرىپ وتىرعان بۇگىنگى قوعامنىڭ كوكەيكەستى ماسەلەسىن قوزعايدى. سپەكتاكلدىڭ پرەمەراسىن كورەرمەندەر جىلى قابىلدادى. اسىرەسە, قالاداعى ستۋدەنت جاستار تايلى-تاياعىنا دەيىن قالماي كەلىپ كوردى. كەيىپكەرلەردىڭ بارلىعى دا اينالامىزدا جۇرگەن ادامدار. داۋرەن قايتىس بولعان سىنىپتاسى داريعانىڭ اتا-اناسىنىڭ سەنىمىنە كىرىپ, سولاردىڭ ارقاسىندا ماڭدايى تەرشىپ ەڭبەك ەتپەي, ءىشىپ-جەگەنىنە ءماز بولادى. «اۋىردىڭ استىمەن, جەڭىلدىڭ ۇستىمەن» ءومىر ءسۇرۋ ۇستانىمىن ۇستاعان قوس جىگىت داۋرەن مەن ەرمەك اقىرىندا وزدەرىنىڭ ومىرگە دەگەن جەڭىل كوزقاراسىنىڭ, ارام پيعىلىنىڭ قۇربانى بولادى. بۇل ومىردە ار تازالىعى جانە ەڭبەك قانا ادامدى باقىتقا جەتكىزەدى. داۋرەننىڭ ايەلى ءسابيرا ناق وسىنداي ادام. داۋرەن بالالارىمەن جىلاتىپ تاستاپ كەتكەندە, اۋىلدا قالعان ءسابيرا بارلىق قيىندىقتاردى جەڭىپ, ولاردى امان-ەسەن وسىرەدى. اقىرىندا ماشينا قاعىپ كەتىپ, مۇگەدەك بولىپ, قايىرشى دارەجەسىنە جەتكەن داۋرەندى دە دالاعا قالدىرماي, اۋىلعا الىپ كەتەدى. اۆتور ەڭبەك پەن ار-ۇيات بار جەردە مەيىرىم دە بولادى دەگەن وي تاستايدى. سونىمەن قاتار, قازاق قىزدارىنىڭ ەمەندەي مىقتىلىعىن تاعى ءبىر قىرىنان كورسەتىپ, قايران قالدىرادى. ءبىرى مۇگەدەك, ءبىرى ناشاقور بولىپ تىنعان داۋرەن مەن ەرمەك سەكىلدى جانى تازا ەمەس, جۇرتتىڭ ادال سەنىمىن اتتاعانداردى ۋاقىتتىڭ ءوزى-اق جازالايدى. داريعانىڭ ءۇش ءىنىسى ساعات, مينۋت, سەكۋند وسىنى ەسكەرتەتىندەي.
– بۇل قويىلىم – الەۋمەتتىك دراما. شىعارما حالقىمىز ايالاپ كەلگەن بار جاقسى قاسيەت قازاقتىڭ التىن بەسىگى – اۋىلدا ەكەنىن ايتادى. پەندەنىڭ بارلىعىنا دۇنيە ەسىگى اشىق. وندا ادامنىڭ بارىنە بىردەي جاقسىلىق تا, قيىندىق تا كولدەنەڭ تۇرادى. سول تۇستا بىرەۋ شىعار جولدى كورەدى, بىرەۋ كورە المايدى. اۆتور ءوز وي-نيەتىنىڭ تۇمانىنا اداسقانداردى جارىققا قارسى ۇشقان جىندى كوبەلەككە تەڭەيدى. ومىردە ولاردىڭ وزدەرى دە ورنىن تاپپايدى, قالىپتاسپايدى, قوعامعا دا ءبىر تيىن پايداسى تيمەيدى. جالپىلداپ ۇشىپ ءجۇرىپ, وزدەرىن وزدەرى جويادى. قويىلىمدا ادامنىڭ قانداي بولۋى ونىڭ وزىنە بايلانىستى دەگەن وي تاستادىق, – دەيدى رەجيسسەر ءساليما تاسەمەنوۆا.
داۋرەننىڭ ءرولىن حالىقارالىق «شابىت» بايقاۋىنىڭ لاۋرەاتى, تالانتتى اكتەر نۇرلان بايشين سومدادى. ءسابيرانى وبلىستىق «مەتسەناتتار كلۋبى» سىيلىعىنىڭ لاۋرەاتى كۇلاي احمەتوۆا, ەرمەكتى الىبەك مامەتوۆ ورىندادى.
– ايتارى تۇشىمدى قويىلىمدى كورەرمەنگە جەتكىزگەن اكتەرلەردىڭ بارلىعى دا تاماشا ويناپ شىقتى, سۋرەتشىمىز ەركىن مەرگەنوۆتىڭ ساحنالىق دەكوراتسياسى دا ءساتتى شىقتى, –دەيدى رەجيسسەر ءساليما بەكسۇلتانقىزى.
ءنازيرا جارىمبەتوۆا,
«ەگەمەن قازاقستان».
ارقالىق.