قىزىلوردا وبلىسىندا سىرداريا وزەنى بويىنداعى قورعانىس بەكىنىستەرىن تەكسەرۋ جۇمىستارى جۇرگىزىلدى. بۇل تۋرالى Ras.kz حابارلادى.
«قىزىلوردا وبلىسىندا 2013-2014 جىلعى قىسقى-كوكتەمگى كەزەڭدەگى سۋ تاسقىنىنىڭ الدىن الۋ ماقساتىندا سىرداريا وزەنى بويىنداعى قورعانىس بەكىنىستەرىنىڭ دايىندىعى مەن توزىمدىلىگىن تەكسەرۋ جۇرگىزىلدى. مەملەكەتتىك ورگاندار ۋاكىلدەرىنەن قۇرالعان ارانيى جۇمىس توبى اعىمداعى جوندەۋدى كەرەك ەتەتىن 21 نىساندى تاپتى. ولاردىڭ 18-ءى توعان بولسا, 2-ءى كوپىر جانە 1-ءى گيدروتەحنيكالىق قۇرىلىس بولىپ شىقتى», – دەلىنگەن حابارلامادا.
جاڭاقورعان اۋدانىندا 1 ىقتيمال قاۋىپتى نىسان بار. ول – قاندىارال كولىنەن جوعارى جاقتاعى تومەنارىق ەلدى مەكەنى. مۇندا ۇزىندىعى 2200 مەتر, ەنى 2 مەتر كولەمىندەگى توعان بۇزىلىپ كەتكەن. وسىعان وراي جاسالاتىن جەر جۇمىستارى 8 000 تەكشە مەتردى قۇرايدى.
شيەلى اۋدانىندا وسىنداي قاۋىپتى 5 نىسان انىقتالدى. ولاردىڭ ىشىندە مايلىتوعاي, تارتوعاي جانە قارعالى اۋىلدارى تۇستارىنداعى 3 توعان, بەستام اۋىلدىق وكرۋگىندەگى 2 كوپىر جوندەۋدى كەرەك ەتەدى.
جالاعاش اۋدانى دا 3 نىساننان قاۋىپتەنىپ وتىر. ولار «تارىارىق-1», «تارىارىق-2» ۋچاسكەلەرىندەگى بوگەتتەر مەن «تاڭ» ەلدى مەكەنىندەگى سۋ قۇرىلىسىنا قاتىستى. قارماقشى اۋدانىندا دا 3 نىسان قاۋىپ شاقىرىپ تۇر. ولاردىڭ ءبارى دە توعان بولىپ تابىلادى. سونداي 2 توعان قازالى اۋدانىن دا ابىگەرگە سالاتىن ءتۇرى بار.
«قىزىلوردادا قالا اكىمدىگى 2013 جىلعى 30 جەلتوقساندا 8 ىقتيمال قاۋىپتى نىسان تۋرالى جازباشا مالىمەت تاپسىردى. ولار نەگىزىنەن ساياجايلار اۋدانىنداعى بوگەتتەردەن تۋىندايدى», – دەلىنگەن حابارلامادا. سول سياقتى تسەلليۋلوزا-كارتون زاۋىتى, دۋبديسپانسەر جانە ورمان شارۋاشىلىعى القابى سەكىلدى وڭىرلەر ماڭىنداعى توعانداردى بەكىتە تۇسپەسە بولمايدى.
دارحان نازار.
دەرەككوز: Ras.kz
فوتو: Ras.kz.