پوليتسيا دەپارتامەنتىنىڭ باسشىلارى 2018 جىلى 34 ۋچاسكەلىك پوليتسيا بەكەتىنىڭ جاڭا عيماراتىن سالۋ جونىندە اتىراۋ وبلىسى اكىمدىگىنە ۇسىنىس بەرگەن ەدى. سودان بەرى 28 ۋچاسكەلىك پوليتسيا بەكەتى پايدالانۋعا بەرىلدى. ەندى تاعى دا وسىنداي بەس بەكەتتى اشۋ جوسپارلانىپتى. يساتاي اۋدانىنداعى ح.ەرعاليەۆ جانە تۇششىقۇدىق اۋىلىندا ءارى كەڭسەسى, ءارى تۇرعىن ءۇيى بار ەرەكشە ۋچاسكەلىك پوليتسيا بەكەتى اشىلدى.
– مەملەكەت باسشىسىنىڭ جولداۋىندا ىشكى ىستەر ورگاندارى جۇيەسىندە جۇرگىزىلەتىن رەفورمادا باستى ماڭىز ۋچاسكەلىك پوليتسيا ينسپەكتورلارىنىڭ قىزمەتىنە ەرەكشە كوڭىل بولىنەتىنى ايتىلعان ەدى. سوعان بايلانىستى جاڭا بەكەتتە ۋچاسكەلىك پوليتسيا ينسپەكتورى مەن ونىڭ وتباسىنا قولايلى جاعداي قاراستىرىلدى. مۇنداي بەكەت ءتارتىپ ساقشىسىنىڭ جەرگىلىكتى تۇرعىنداردىڭ قاۋىپسىزدىگى مەن قوعامنىڭ تىنىشتىعىن ساقتاۋعا, قىلمىستىڭ الدىن الۋعا زور ىقپالىن تيگىزەدى. ويتكەنى ۋچاسكەلىك ينسپەكتور تۇرعىنداردىڭ ارىز-شاعىمىن وسىندا قابىلداپ, كەز كەلگەن ماسەلەگە دەر كەزىندە دەن قويادى, – دەيدى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆ.
تۇششىقۇدىق اۋىلىنىڭ ۋچاسكەلىك پوليتسيا ينسپەكتورى شىڭعىس يباتوۆ ءارى كەڭسەسى, ءارى تۇرعىن ءۇيى بار جاڭا بەكەتكە العاشقىلاردىڭ ءبىرى بولىپ ورنالاستى. ول ىشكى ىستەر ورگانىندا 2014 جىلدان بەرى جۇمىس ىستەيدى.
– جاڭا ۇلگىدەگى ۋچاسكەلىك پوليتسيا بەكەتىندە ءتورت جۇمىس بولمەسى بار. ال وتباسىمىز ءۇشىن تاعى دا ءتورت بولمە جاپسارلاس سالىنعان. مۇنداي جاڭا عيماراتتا تاۋلىك بويى جۇمىس ىستەۋگە بولادى, – دەيدى ۋچاسكەلىك پوليتسيا ينسپەكتورى شىڭعىس يباتوۆ.
اتىراۋ وبلىسى