رەسەي قۇراماسى ەۋرومەن قوشتاستى

B توبىنىڭ سوڭعى تۋرىندا پلەي-وفف كەزەڭىنە مەرزىمىنەن بۇرىن جولداما الىپ قويعان بەلگيا مەن جولدامادان ءۇمىتتى فينليانديا قۇرامالارى كەزدەسسە, ەكىنشى ماتچتا العاشقى ەكى تۋردا سوقىر ۇپاي دا الا الماعان دانيا مەن ەكى ويىننىڭ بىرەۋىندە جەڭىسكە جەتكەن رەسەي فۋتبولشىلارى ءۇش ۇپاي ءۇشىن تالاستى. ال س توبىندا ۋكراينا اۋستريامەن كەلەسى كەزەڭنىڭ جولداماسىن سا­راپقا سالسا, نيدەرلاند سول­تۇس­تىك ماكەدونيادان ەمتيحان قا­بىلدادى.

«يوحان كرويف ارەنادا» (امستەردام) وتكەن كەزدەسۋدە ني­دەرلاند قۇراماسى ەۋروپا چەم­پيوناتىنا تۇڭعىش رەت قاتى­سىپ جاتقان سولتۇستىك ماكە­دو­نيا قاقپاسىنا جاۋاپسىز ءۇش گول سوقتى. ءبىرىنشى تايمدا مەمفيس دەپاي قۇراماسىن ەسەپتە العا شىعارسا, ەكىنشى تايمدا دجوردجينو ۆەينالدۋم ەكى گول سوعىپ, دۋبل اۆتورى اتاندى. ۆەينالدۋمنىڭ ەكى گولىنا دا دەپاي اسسيستەنتتىك جاسادى. قورىتىندى ەسەپ – 3:0. ەندى نيدەرلاند قۇراماسى پلەي-وفف كەزەڭىندە ا توبىندا ەكىنشى ورىن العان ۋەلس فۋتبولشىلارىمەن كەزدەسەدى. ءۇش ويىندا بىردە-ءبىر ۇپاي الا الماعان سولتۇستىك ماكەدونيا ءۇشىن ەۋروپا چەمپيوناتى اياقتالدى.

ال قاتار وتكەن ەكىنشى ماتچ­تا اۋستريا فۋتبولشىلارى ۋكراينادان باسىم ءتۇستى – 1:0. ويىن­داعى جالعىز ءارى جەڭىستى گولدى ءبىرىنشى تايمنىڭ 21-مينۋتىندا كريستوف باۋمگارتنەر سالدى. ناتيجەلى پاستىڭ اۆتورى – داۆيد الابا. وسىلايشا اۋستريا قۇراماسى ءوز تاريحىندا العاش رەت ەۋروپا چەمپيوناتىنىڭ 1/8 كە­زەڭىنە جولداما الدى. ال اندرەي شەۆچەنكو شاكىرتتەرى تارازى باسىن تەڭەستىرۋگە قانشا ۇمتىلعانىمەن, اۋستريا فۋتبولشىلارى قارسىلاستارىنا گول سوعاتىن مۇمكىندىك بەرگەن جوق. ويتكەنى تەڭ ناتيجە ۋكراي­نا قۇراماسىن كەلەسى كەزەڭ­گە الىپ شىعاتىن ەدى. دەگەن­مەن ۋكراينادا ءالى دە ءۇشىنشى ورىنمەن 1/8 فينالعا شىعۋعا مۇم­كىندىك بار. ەگەر ءۇشىنشى تۋر قورىتىندىسى بويىنشا الەك­ساندر زينچەنكو باستاعان ۋكراي­نالىقتار ءار توپتا ءۇشىنشى ورىن العان ۇزدىك ءتورت قۇرامانىڭ قاتا­رىنا كىرەتىن بولسا, جارىس­تى ءارى قاراي جالعاستىرا الادى. ازىرشە ولار قوسىمشا كور­سەتكىش بويىنشا تورتتىكتىڭ قا­تارىندا تۇر. ال اۋستريا پلەي-وفف باسەكەسىندە ا توبى­نىڭ كوش­باسشىسى يتاليا قۇرا­ماسىمەن باق سىناسادى.

سانكت-پەتەربۋرگ پەن كوپەن­گاگەندە وتكەن B توبىنىڭ ويىن­دارىندا دانيا مەن بەلگيا قۇرامالارى جەڭىسكە جەتتى. «دات ديناميتتەرى» سوڭعى تۋردا رەسەي فۋتبولشىلارىمەن كەز­دەسىپ, ءىرى ەسەپپەن باسىم ءتۇستى – 4:1. كەلەسى كەزەڭگە شىعۋ ءۇشىن بۇل ويىندا دانياعا تەك قانا جەڭىس كەرەك بولاتىن, ال رەسەيگە تەڭ ەسەپ تە جەتىپ جاتىر ەدى. دەگەنمەن كەزدەسۋدى رەسەيلىكتەر وتە بەلسەندى باستادى. ماتچتىڭ 18-مينۋتىندا الەكساندر گولو­ۆيننىڭ گول سوعاتىن تاماشا مۇمكىندىگى بولعان. الايدا كاس­پەر شمەيحەل قاۋىپتىڭ بەتىن قايتارىپ, قاقپاسىن گولدان امان ساقتاپ قالدى. ارادا كوپ وتپەي دانيالىقتار دا قاۋىپتى شابۋىلدىڭ قارىمتاسىن قايتار­دى. 28-مينۋتتا پەر حەيبەرگتىڭ الىستان تەپكەن دوبى قاقپا با­عىتىنان ءسال قيىس كەتتى. دەسە دە ويىنداعى ەسەپتى ءبىرىنشى بولىپ دانيا قۇراماسى اشتى. گول اۆتورى – ميككەل دامسگور.

ەكىنشى تايمنىڭ 59-مينۋتىندا رەسەيلىك رومان زوبنين پاس بەرۋ ساتىندە ورەسكەل قاتە جى­بەرىپ, ونى يۋسسۋف پوۋلسەن ءتيىمدى پايدالانىپ كەتتى. 70-مينۋتتا الەكساندر سوبولەۆ ءوز كو­مانداسىنا پەنالتي الىپ بە­رىپ, 11 مەترلىك نۇكتەدەن ارتەم دزيۋبا ءمۇلت كەتكەن جوق. ەسەپ – 2:1. بىراق ماتچ اياقتالعانعا دەيىن دانيالىق فۋتبولشىلار ماتۆەي سافونوۆ قورعاعان قاقپادان تاعى ەكى مارتە ساڭىلاۋ تاۋىپ, ويىننىڭ نۇكتەسىن قويدى. 79 جانە 82-مينۋتتا اندرەاس كريستەنسەن مەن يواكيم مەحلە مەرگەندىگىمەن كوزگە ءتۇستى.

وسىلايشا سوڭعى تۋردا عانا جەڭىسكە جەتكەن دانيا ەكىنشى ورىنمەن كەلەسى كەزەڭگە جولداما السا, رەسەيلىكتەر ەۋروداعى جو­­رىعىن اياقتادى. ەكىنشى ماتچتا بەل­گيا فينليانديا قاقپاسىنا جا­ۋاپسىز ەكى گول سوعىپ, 100 پا­يىزدىق كورسەتكىشپەن توپتا ءبى­رىنشى ورىنمەن 1/8 فينالعا ءوتتى. ال فينليانديا ءۇش ۇپايمەن ءۇشىن­شى ورىنعا تابان تىرەدى. ءبىر قى­زىعى, دانيا, رەسەي جانە فين­ليانديا قۇرامالارى بىردەي ءۇش ۇپاي جيناعان, بىراق جەكە كور­سەت­كىش بويىنشا دانيا ەكىن­شى, فين­ليانديا ءۇشىنشى ورىن­عا جاي­عاستى.