اتىراۋدا بىلتىر قاۋىپتى ۆيرۋسقا قارسى قولدانىلاتىن ءدارى-دارمەكتەردىڭ جەتىسپەۋشىلىگىنە بايلانىستى كۇردەلى احۋال قالىپتاسقان ەدى. سول كەزدە تۇرعىندار جەرگىلىكتى ءدارىحانالاردان ءدارى-دارمەكتەردى سابىلىپ ىزدەگەنمەن, تابا العان جوق. تاڭنىڭ اتىسىنان كەش باتقانعا دەيىن شۇباتىلعان كەزەككە تۇرىپ, كوروناۆيرۋس ينفەكتسياسىن جۇقتىرۋ قاۋپى تۋىنداعان. ءتىپتى كەي تۇرعىندار ءدارى-دارمەكتەردى اتىراۋمەن شەكارالاس رەسەيدىڭ استراحان وڭىرىنەن الدىرۋعا ءماجبۇر بولعان.
مىنە, وسىنداي سەبەپتەردەن سوڭ بىلتىر جازدا قاۋىپتى ۆيرۋسقا قارسى قولدانىلاتىن ءدارى-دارمەكپەن قامتۋ ءۇشىن تۇراقتاندىرۋ قورى قۇرىلعان ەدى. ءدارى-دارمەكتەردى ساتىپ الۋ ءۇشىن «اتىراۋ» الەۋمەتتىك-كاسىپكەرلىك كورپوراتسياسى» اق ءدارى-دارمەكتەردى ساقتاۋعا ارنالعان قويمالارى بار «INKAR» جشس فيليالىنا 500 ملن تەڭگە كولەمىندە قارىز بەرگەنى انىقتالدى. الايدا كوروناۆيرۋسقا قارسى قولدانىلاتىن دارىلىك پرەپاراتتارمەن قامتاماسىز ەتۋگە قاتىستى ۇيىمداستىرىلعان جۇمىسقا اتىراۋ قالالىق ءماسليحاتىنىڭ دەپۋتاتتارى مەن قوعامدىق ۇيىمدار وكىلدەرىنىڭ كوڭىلى تولماي وتىر. ولار بۇل ماسەلەنى «اتامەكەن» ۇكپ وڭىرلىك فيليالىندا وتكەن دوڭگەلەك ۇستەل باسىندا تالقىعا سالدى.
– ءبىز «اتىراۋ – ادالدىق الاڭى» جوبالىق كەڭسەسىمەن بىرگە جەرگىلىكتى ءدارىحانالاردا كوروناۆيرۋسقا قارسى پرەپاراتتاردىڭ باعاسىنا مونيتورينگ جۇرگىزدىك. جالپى ءدارىحانانىڭ شەكتى باعاسى ساقتالادى. الايدا ولاردىڭ كوپشىلىگى «INKAR» جشس فيليالىنان, ياعني تۇراقتاندىرۋ قورىنان ساتىپ الىنبايتىنىن ايتىپ وتىر. ويتكەنى ءدارى-دارمەكتەردىڭ قۇنى باسقا جەتكىزۋشىلەر ۇسىناتىن باعادان الدەقايدا قىمبات. سونداي-اق جەتكىزۋ مەرزىمى وتە ۇزاق ۋاقىت الادى. بىرقاتار ءدارىحانادا قاۋىپتى ۆيرۋسقا قارسى قولدانىلاتىن پرەپاراتتار جوق. ءتىپتى ءدارى-دارمەكتەردىڭ باعالارى مەن ءتىزىمى كورسەتىلگەن اقپاراتتىق تابلونى تاپپادىق. وسى ماسەلەگە قاتىستى فارماتسەۆتيكالىق باقىلاۋ دەپارتامەنتىنە, «INKAR» جشس-ءنىڭ فيليالىنا حات جولدادىق. بىراق ءتيىستى جاۋاپ العان جوقپىز, – دەيدى اتىراۋ قالالىق ءماسليحاتىنىڭ دەپۋتاتى گۇلزەينەپ ءدۇسىپوۆا.
ال «اتىراۋ» اكك» اق باسقارما توراعاسىنىڭ ورىنباسارى امانتاي ايتباەۆتىڭ مالىمەتىنشە, «INKAR» جشس-ءنىڭ فيليالىمەن جاسالعان كەلىسىمشارتتىڭ مەرزىمى بيىلعى 1 شىلدەدە اياقتالادى ەكەن. قازىر اتالعان سەرىكتەستىك بىلتىر بەرىلگەن قارىزدىڭ 200 ملن تەڭگەسىن عانا قايتارىپتى.
– قازىر ءبىز «INKAR» جشس-مەن كەلىسىمشارتتى ۇزارتۋ ماسەلەسىن قاراستىرۋدامىز. ازىرگە ماسەلە اشىق كۇيىندە قالىپ وتىر. ال 300 ملن تەڭگە كولەمىندە قالعان بەرەشەكتى وتەۋ ءۇشىن سەرىكتەستىك تۇراقتاندىرۋ قورىنداعى ءدارى-دارمەكتەردى ساتادى. سوندىقتان وندا ءدارى-دارمەكتەردىڭ كەيبىر تۇرلەرى جوق. قور ەرەكشە جاعدايعا بايلانىستى قۇرىلعان ەدى. بىراق مۇنداي جاعداي بولعان جوق. ءدارى-دارمەكتەر اۋرۋحانالاردا قاجەتتى مولشەردە بار, – دەيدى ا.ايتباەۆ.
اتىراۋ قالالىق ءماسليحاتىنىڭ دەپۋتاتتارى مەن «ادالدىق الاڭى» جوبالىق كەڭسەسىنىڭ وكىلدەرى «INKAR» جشس-ءنىڭ فيليالىمەن كەلىسىمشارت جاساۋ كەزىندە كوروناۆيرۋسقا قارسى پرەپاراتتارعا شەكتى باعالار ناقتىلانباعانىن دۇرىس ەمەس دەپ سانايدى. سونداي-اق ولار «اتىراۋ» اكك» اق تاراپىنان بولىنگەن قاراجاتتىڭ ماقساتتى پايدالانىلۋىنا مونيتورينگ جۇرگىزىلمەيتىندىگىمەن كەلىسپەيدى.
قازىر ءوڭىر «سارى ايماقتا» تۇراقتاپ تۇر. وعان سوڭعى اپتادا قاۋىپتى ۆيرۋسقا شالدىققاندار سانىنىڭ ازايعانى سەبەپ بولىپ وتىر. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى تاراتقان اقپاراتقا سۇيەنسەك, 14 ماۋسىمدا 27 ادامنان كوروناۆيرۋس ينفەكتسياسى انىقتالىپتى. الايدا ءالى دە وڭىردەگى ينفەكتسيالىق ستاتسيونارلاردا 331 ناۋقاس ەم قابىلداپ جاتىر. ونىڭ ىشىندە مودۋلدىك اۋرۋحانادا – 111, №2 وبلىستىق اۋرۋحانادا – 100, اۋداندارداعى ينفەكتسيالىق ستاتسيونارلاردا – 56, فتيزيوپۋلمانولوگيالىق ورتالىقتا 18 پاتسيەنت ادام ەم الۋ ءۇشىن وقشاۋلانىپتى. ال «تەڭىز» كەن ورنىنداعى ينفەكتسيالىق ستاتسيوناردا 46 ادام ەمدەلۋدە. سونداي-اق 538 ناۋقاس ءۇي جاعدايىندا ەمدەلىپ جاتىر.
نەگە ەكەنى بەلگىسىز, اتىراۋدا ۆاكتسينا الۋ ماسەلەسى ءالى دە وتكىر كۇيىندە قالىپ وتىر. قازىر وڭىردە 31 ستاتسيونارلىق, 10 جىلجىمالى ۆاكتسينالاۋ بەكەتى اشىلعانمەن, 1 اقپان – 14 ماۋسىم ارالىعىندا سپۋتنيك V, QazVac, HayatVax ۆاكتسينالارىنىڭ ءبىرىنشى كومپونەنتىن سالدىرعاندار سانى 66 587 ادامعا جەتتى. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى ءمالىم ەتكەندەي, ماۋسىمدا اتىراۋداعى فارماتسەۆتيكالىق قويماعا سپۋتنيك V ۆاكتسيناسىنىڭ ەكىنشى كومپونەنتى ءۇشىن 39 850 دوزا جەتكىزىلىپتى. بىراق بۇل دوزالارعا رەسەيدەن كەلەتىن سەرتيفيكات كەشىكتىرىلىپ جاتىر. ەندى سەرتيفيكاتتار 16-18 ماۋسىمدا جەتكىزىلەدى دەپ كۇتىلىپ وتىر.
بيىلعى 1 اقپاننان بەرى اتىراۋ وبلىسىنا سپۋتنيك V, QazVac Hayat Vax ۆاكتسينالارىنىڭ ەكىنشى كومپونەنتى ءۇشىن 32 350 دوزا سەرتيفيكاتتارىمەن بىرگە جەتكىزىلدى. قازىر بۇل كومپونەنتتى 23 505 ادام سالدىردى. كوروناۆيرۋسقا قارسى ۆاكتسينالاردىڭ ەكىنشى كومپونەنتىن العاندار اراسىندا 2 298 پەداگوگ, 608 پوليتسەي, 208 ستۋدەنت, مەديتسينا سالاسىنىڭ – 2 601, ارنايى مەكەمەلەردىڭ – 95, قۇقىق قورعاۋ ورگاندارىنىڭ 1 578 قىزمەتكەرى بار. سونداي-اق 419 مەملەكەتتىك قىزمەتشى, سوزىلمالى اۋرۋى بار 243 ادام مەن جەرگىلىكتى 15 455 تۇرعىن ەكتىردى.
اتىراۋ وبلىسى