يتاليادا شىمىلدىعى تۇرىلگەن بيىلعى ەۋروپا چەمپيوناتىنىڭ ءبىرىنشى تۋر ويىندارى ءوز مارەسىنە جەتتى. D توبىندا ونەر كورسەتەتىن 1996 جىلعى كارى قۇرلىق بىرىنشىلىگىنىڭ كۇمىس جۇلدەگەرى چەحيا العاشقى تۋردا پاتريك شيكتىڭ ءدۋبلىنىڭ ارقاسىندا شوتلانديانى جەڭسە, E توبىنىڭ ۇزدىكتەرى سانالعان يسپانيا مەن شۆەتسيا ءبىر-ءبىرىنىڭ قاقپاسىنا گول سوعا الماي, تەڭ تارقاستى. ال پولشا ويدا-جوقتا سلوۆاكيادان ۇتىلىپ قالدى.
شيكتىڭ شەدەۆر گولى
گلازگوداعى «حەمپدەن پارك» ستاديونىندا وتكەن ويىندا چەحيا فۋتبولشىلارى 1996 جىلدان كەيىن ەۋرو دوداعا العاش رەت قاتىسىپ جاتقان شوتلانديامەن كەزدەسىپ, 2:0 ەسەبىمەن جەڭىسكە جەتتى. ويىن تاعدىرىن گەرمانيانىڭ «بايەر» كلۋبىندا ونەر كورسەتەتىن شابۋىلشى پاتريك شيكتىڭ ءبىر ءوزى شەشىپ تاستادى. 25 جاستاعى شابۋىلشى العاش ءبىرىنشى تايمنىڭ 42-مينۋتىندا كوزگە تۇسسە, ەكىنشى تايمنىڭ 52-مينۋتىندا ماتچتاعى ەكىنشى گولىن سوعىپ, چەحياعا ماڭىزدى ءۇش ۇپاي سىيلادى.
شيكتىڭ ءبىرىنشى گولى وتە قاراپايىم جاعدايدا سوعىلسا, الاڭنىڭ ءدال ورتاسىنان سالعان ەكىنشى گولى وسى ءتۋرنيردىڭ ەڭ ۇزدىك گولىنان بىردەن-ءبىر ۇمىتكەر بولىپ تۇر. شوتلانديا فۋتبولشىلارى شابۋىل ۇيىمداستىرىپ جاتقاندا دجەك حەندريدىڭ تەپكەن دوبى چەحيا قورعاۋشىلارىنان كەرى قايتىپ, ورتادا تۇرعان شيكتىڭ اياعىنا كەلىپ تۇسە قالدى. دوپتى ءوزىنىڭ ىرقىنا كوندىرىپ العان سوڭ شابۋىلشى قاقپاشىنىڭ قاقپادان الىستاپ كەتكەنىن بايقاپ الاڭ ورتاسىنان-اق قاقپانى ءدال كوزدەدى.
ەۋروپا چەمپيوناتىنىڭ ارعى-بەرگى تاريحىندا مۇنداي قاشىقتان ءالى ەشكىم گول سوقپاعان. شيك دوپتى قاقپاعا 45,44 مەتردەن توپ ەتكىزە سالدى. بۇل ەۋرو ءۇشىن رەكورد سانالادى. بۇعان دەيىنگى رەكورد گەرمانيالىق تورستەن فرينگسكە تيەسىلى ەدى (35,3 مەتر).
جولى بولماعان پولشا
سانكت-پەتەربۋرگتەگى «گازپروم ارەنادا» وتكەن ويىندا سلوۆاكيا فۋتبولشىلارى پولشا قۇراماسى 2:1 ەسەبىمەن جەڭىپ, تۋرنير كەستەسىندە كوش باستادى. اشىعىن ايتۋ كەرەك, بۇل كەزدەسۋدە «اق-قىزىلداردىڭ» جولى بولمادى. العاش پولشا جانە «يۋۆەنتۋس» كلۋبىنىڭ قاقپاشىسى ۆويتسەح ششەنسنىي 18-مينۋتتا ابايسىزدا ءوز قاقپاسىنا گول سوعىپ السا, 62-مينۋتتا گجەگوج كرىحوۆياك ويىنداعى ەكىنشى سارى قاعازىن الىپ, الاڭنان قۋىلدى. بۇل – چەمپيوناتتاعى ءبىرىنشى قىزىل قاعاز. ارادا 7 مينۋت وتكەندە سلوۆاكيا قورعاۋشىسى ميلان شكرينيار ششەنسنىي قورعاعان قاقپادان ساڭىلاۋ تاۋىپ, قۇراماسىنا ماڭىزدى جەڭىس سىيلادى. پولشانىڭ ويىنداعى جالعىز گولىن 46-مينۋتتا جارتىلاي قورعاۋشى كارول لينەتتي سالدى.
سەۆيليادا ساتسىزدىككە ۇشىرادى
ە توبىنداعى ەكىنشى ويىندا يسپانيا ءوز ەلىندە شۆەتسيا قۇراماسىن جەڭە المادى – 0:0. ماتچ بويى ويىندا ۇستەمدىك تانىتقان پيرەنەي تۇبەگى ەلىنىڭ وكىلدەرى سكانديناۆيالىقتاردىڭ قورعانىسىن بۇزا المادى. يسپانيا فۋتبولشىلارى 90 مينۋت بويى دوپتى ءوز باقىلاۋىندا ۇستاپ (75 پايىز!), شۆەتسيا قاقپاسىندا 17 سوققى جاساعانىمەن, بۇل كەزدەسۋدە لۋيس ەنريكە شاكىرتتەرىنە گول سوعۋ باقىتى بۇيىرمادى.
سونداي-اق شۆەتسيا قۇراماسىندا دا گول سوعاتىن ەكى مۇمكىندىك بولعانىمەن, ولار دا شابۋىلدى گولمەن تۇيىندەي المادى. ءسويتىپ يسپانيا مەن شۆەتسيا اراسىنداعى ماتچ وسى چەمپيوناتتا گول سوعىلماعان ءبىرىنشى ويىن بولدى.