مۇنايلى ءوڭىردىڭ ءبىر پروبلەماسى – ەكولوگيا ماسەلەسى. اسىرەسە مۇناي-گاز ونەركاسىبى سالاسىندا قورشاعان ورتانى قورعاۋدىڭ كەمشىن تۇسەتىن تۇسى كوپ. سونىڭ ىشىندە مۇناي قۇرامىنداعى كۇكىرتتىڭ تابيعاتقا زالالى بارشانى تولعاندىرادى.
جىلىوي اۋدانىنداعى «تەڭىز» كەنىشىندە وندىرىلەتىن «قارا التىن» قۇرامىندا كۇكىرتتىڭ ۇلەسى از ەمەس. سول سەبەپتەن, مۇندا كۇكىرتتى تۇيىرشىك تۇرىندە شىعاراتىن زاۋىت جۇمىسىن باستادى. جاڭا زاۋىتتى قازاقستاندىق Caspian Group Construction جشس ەكى جىلعا جەتپەيتىن مەرزىمدە ىسكە قوستى. زاۋىتتا جەرگىلىكتى 60-تان اسا ادام ءۇشىن جۇمىس ورنى اشىلدى. ايىنا 40 مىڭ توننا تۇيىرشىكتەلگەن كۇكىرت وندىرىلەدى.
– «تەڭىز كەنىشىنىڭ تۇيىرشىكتەلگەن كۇكىرتى افريكا, ەۋروپا, قىتاي جانە باسقا ەلدەردىڭ نارىعىنا ەكسپورتتالادى. وسى ورايدا كۇكىرتتى باسقارۋ جوسپارى اياسىندا جەرگىلىكتى كومپانيانىڭ مۇمكىندىگىن دامىتۋ كوزدەلدى. سوندىقتان كۇكىرتتى وڭدەۋ قۋاتىن كەڭەيتەتىن جوبا جۇزەگە اسىرىلدى, – دەيدى «تەڭىزشەۆرويل» جشس باس ديرەكتورى كەۆين لايون.
ونىڭ ايتۋىنشا, جەرگىلىكتى كومپانيالاردى دامىتۋ – كومپانيانىڭ نەگىزگى ستراتەگيالارىنىڭ ءبىرى. بۇل جوبا ەكولوگيالىق قاۋىپسىزدىكتى جاقسارتىپ, وندىرىستىك تاۋەكەلدەردى ازايتادى.
– جاڭا زاۋىت ءپورتاتيۆتى جانە وڭاي جينالاتىن GXM3 قوندىرعىسىمەن جابدىقتالدى. تۇيىرشىكتەلگەن كۇكىرت شىعارۋ ءۇشىن الەمدەگى ەڭ وزىق تەحنولوگيالار قولدانىلىپ وتىر, – دەيدى تۇيىرشىكتەلگەن كۇكىرت زاۋىتىنىڭ مەنەدجەرى عالياسقار يتيشەۆ.
اتىراۋ وبلىسى