قازاقستان پرەزيدەنتى قاسىم-جومارت توقاەۆ دۇنيەجۇزىلىك دەنساۋلىق ساقتاۋ اسسامبلەياسىنىڭ 74-ءشى سەسسياسىنىڭ جابىلۋىندا ۆيدەو ۇندەۋ جاسادى, دەپ حابارلايدى Egemen.kz.
24 مامىر مەن 1 ماۋسىم ارالىعىندا ءوتىپ جاتقان شاراعا دۇنيەجۇزىلىك دەنساۋلىق ساقتاۋ ۇيىمىنا مۇشە 194 مەملەكەتتىڭ دەلەگاتتارى قاتىسىپ جاتىر. سەسسيانىڭ نەگىزگى تاقىرىبى – «قازىرگى پاندەميانىڭ اياقتالۋى جانە الداعى ىندەتتەردىڭ الدىن الۋ: ءتيىمدى, قاۋىپسىز ءارى بەيبىت الەمدى بىرلەسىپ قۇرۋ».
قاسىم-جومارت توقاەۆ دۇنيەجۇزىلىك دەنساۋلىق ساقتاۋ اسسامبلەياسىنىڭ سەسسياسى بۇكىل الەم 1,5 جىلدان بەرى كوروناۆيرۋسپەن كۇرەسىپ جاتقان اسا كۇردەلى كەزەڭدە ءوتىپ وتىرعانىنا توقتالدى. پرەزيدەنتتىڭ ايتۋىنشا, كوروناۆيرۋس ۇلتتىق دەنساۋلىق ساقتاۋ جۇيەلەرى مەن كوپجاقتى ينستيتۋتتار ءۇشىن تەڭدەسسىز سىناق بولدى.
«عالامدىق داعدارىس كەزىندە دۇنيەجۇزىلىك دەنساۋلىق ساقتاۋ ۇيىمى بارلىق مۇشە مەملەكەتتەرمەن بەلسەندى قارىم-قاتىناس جاسادى. ۇيىم ءوزىنىڭ بىلىكتىلىگىمەن, باستاماشىلدىعىمەن, مول تاجىريبەسىمەن دامۋشى جانە دامىعان ەلدەردىڭ ىندەتكە قارسى كۇرەسىنە باسشىلىق ەتتى. ول عالىمداردىڭ عىلىمي جاڭالىقتار اشۋىنا ۇيىتقى بولدى. سونىمەن قاتار مۇقتاج جاندار ءۇشىن قاجەتتى رەسۋرستاردى جۇمىلدىرۋدى شۇعىل ۇيىمداستىردى», دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, اسسامبلەيانىڭ قازىرگى قىزمەتى جاسامپازدىق پەن ۇجىمدىق جاۋاپكەرشىلىككە نەگىزدەلگەن بولاشاق باعىت-باعدارىمىزدى ايقىنداۋعا جاقسى مۇمكىندىك بەرەدى.
پرەزيدەنت كەشەگى مەن بۇگىنگىنىڭ اۋىر سىناقتارىنان ساباق الىپ, ددسۇ باس ديرەكتورى تەدروس ادحانوم گەبرەيەسۋستىڭ ۇسىنىسىن تولىق قولدايتىنىن ايتتى. بۇل ۇسىنىستار ددسۇ-نى رەفورمالاۋعا جانە ونى قۋاتتى, ءتيىمدى ءارى قارجىلىق تۇرعىدان دەربەس حالىقارالىق دەڭگەيدەگى ۇيىم رەتىندە ترانسفورماتسيالاۋعا باعىتتالعان.
مەملەكەت باسشىسى ءوز ۇندەۋىندە العاشقى مەديتسينالىق-سانيتارلىق كومەكتىڭ ماڭىزدىلىعىنا, اتاپ ايتقاندا, 2018 جىلعى استانا دەكلاراتسياسىن ىلگەرىلەتۋگە نازار اۋداردى.
پرەزيدەنتتىڭ پىكىرىنشە, پاندەميا العاشقى مەديتسينالىق-سانيتارلىق كومەكتىڭ كەز كەلگەن جۇقپالى اۋرۋعا ءتيىمدى توتەپ بەرەتىن نەگىزگى تەتىك بولا الاتىنىن ايقىن كورسەتىپ بەردى. وسى رەتتە مەملەكەت باسشىسى ددسۇ-مەن بىرلەسىپ ۇيىمنىڭ الماتى قالاسىنداعى العاشقى مەديتسينالىق-سانيتارلىق كومەك جونىندەگى ايماقتىق بيۋروسىن كۇشەيتۋگە نيەتتى ەكەنىن جەتكىزدى.
ءسوز سوڭىندا قاسىم-جومارت توقاەۆ قازاقستاننىڭ ددسۇ ماقساتتارى مەن قاعيداتتارىن ءسوزسىز قولدايتىنىن تاعى ءبىر مارتە ناقتىلادى.