تارازدا وكپەسى 88 پايىز زاقىمدانعان ايەل دەنى ساۋ ۇل بالانى ومىرگە اكەلدى, دەپ حابارلايدى Egemen.kz.
جۋىردا تاراز قالالىق كوپبەيىندى اۋرۋحاناسىنىڭ جۇقپالى اۋرۋلار قۇرىلىمىنىڭ جانساقتاۋ بولىمىنە مويىنقۇم اۋدانىنىڭ تۇرعىنى كەلىپ تۇسكەن. 28 جاستاعى جۇكتى ايەل وبلىس ورتالىعىنا وتە اۋىر جاعدايدا سانيتارلىق اۆياتسيا جەلىسى ارقىلى جەتكىزىلگەن. كومپيۋتەرلىك توموگرافيا مەن تالداۋ-ساراپتاۋ قورىتىندىلارى بويىنشا وعان كوروناۆيرۋس جانە اۋىر دارەجەلى وكپەنىڭ 88 پايىز زاقىمدانۋىمەن ەكىجاقتى ۆيرۋستىق پنەۆمونيا دياگنوزى قويىلادى. الايدا, جەرگىلىكتى مەديتسينا قىزمەتكەرلەرى ءبىر ايدان اسا ۋاقىت بويى رەانيماتسيا بولىمىندە ناۋقاستىڭ ءومىرى مەن بالانىڭ ءومىرى ءۇشىن كۇرەستى.
«ومىرىنە قاۋىپ تونگەن انا بۇگىندە كەسار تىلىگى ارقىلى امان-ەسەن تۇڭعىشىن بوساندى. نارەستەنىڭ سالماعى 3400 گرامم. شاقالاقتان سىناما الىندى, ناتيجەسى ءسابيدىڭ كوروناۆيرۋس جۇقتىرماعانىن كورسەتتى. بىراق, بوسانعاننان كەيىن ناۋقاستىڭ جاعدايى ناشارلاپ كەتتى. ساتۋراتسياسى تومەن, تەمپەراتۋراسى جوعارى, وزدىگىنەن دەم الا المايدى, ينتوكسيكاتسيا سيندرومى وزگەرىسسىز قالدى. بىرنەشە رەت كونسيليۋمدار جۇرگىزىلدى. ناتيجەسىندە ەكستراكورپورالدى مەمبرانالىق وكسيگەناتسيا اپپاراتىنا قوسىلدى», دەيدى اتالعان اۋرۋحانانىڭ بوسانۋ بولىمشەسىنىڭ مەڭگەرۋشىسى قىمبات ابدرايموۆا.
دارىگەرلەر مەن مەدبيكەلەر انا مەن بالانى قاتاڭ باقىلۋعا الىپ, ەمدەپ, ەرەكشە كۇتىم جاساعان. ناتيجەسىندە ولار كوپ ۇزاماي رەانيماتسيادان بەيىندى بولىمشەگە اۋىستىرىلدى.
ء«بىز جاڭا بوسانعان اناعا جاقىنىمىزداي الاڭدادىق. ول كىسىنىڭ جۇبايىنىڭ بىزگە تولىق سەنىم ارتىپ, جاقسىلىقتان ۇمىتتەنگەنى بىزگە قوسىمشا كۇش بەردى», دەيدى ەمدەۋشى دارىگەر-ينفەكتسيونيست ەلەنا پاك.
توتەنشە رەجيمدە جۇمىس ىستەۋگە داعدىلانعان اۋرۋحانانىڭ بىلىكتى ماماندارى ءسويتىپ بىردەن ەكى ادامنىڭ ءومىرىن ساقتاپ قالدى.
«مەنىڭ اۋىر حالىمە قاراماستان, انا بولۋ باقىتىن سىيلاعان وسى اۋرۋحانانىڭ ۇجىمىنا العىسىمدى بىلدىرەمىن. سىزدەر شىنىمەن مىقتى ەكەنسىزدەر. ادال ەڭبەكتەرىڭىزدى كوردىم. كورسەتىلگەن كومەكتەرىڭىز ءۇشىن مىڭ العىس», دەيدى جاڭا بوسانعان انا.
ايتا كەتەيىك, جىل باسىنان بەرى اۋرۋحاناعا كوروناۆيرۋس ىندەتىن جۇقتىرعان 197 جۇكتى ايەل جانە 37 بوسانعان ايەل كەلىپ تۇسكەن. 72 جۇكتى جانە بوسانعان ايەل جانساقتاۋ بولىمىندە ەمدەلىپ شىقسا, بۇل مەكەمەدە 52 ايەل دەنى ساۋ بالالاردى دۇنيەگە اكەلگەن.