ستۋدەنتتەردىڭ, ماگيسترانتتاردىڭ جانە دوكتورانتتاردىڭ ستيپەنديالارى تىكەلەي كارتا شوتتارىنا تۇسەتىن بولادى. بۇل تۋرالى بعم اپپارات كەڭەسىندە ايتىلدى. قاناتقاقتى رەجىمگە ازىرگە ءۇش جوعارى وقۋ ورنى قاتىسىپ جاتىر. ولاردىڭ قاتارىنا تاعى 21 جوو قوسىلدى.
«سوڭعى 30 جىلدىڭ ىشىندە ستيپەنديا جانە جالپى مەملەكەتتىك تاپسىرىس جوو-عا اۋدارىلاتىن. ودان ءارى جوعارى وقۋ ورىندارى ستۋدەنتتەردىڭ ۇلگەرىمىنە قاراپ, ستيپەنديا بەرەتىن. ءبىز مۇندا كوپتەگەن تاۋەكەلدى, سونىڭ ىشىندە سىبايلاس جەمقورلىق تاۋەكەلدەرىن دە كورىپ وتىرمىز. بۇگىنگى تاڭدا ءۇش جوو قاناتقاقتى جوباعا قاتىسىپ جاتىر, 21 جوو وسى سحەما بويىنشا شارت جاساستى. ءبىز بۇل قاناتقاقتى جوبانى شىلدە ايىنا دەيىن اياقتاۋدى جانە شىلدە ايىنان باستاپ وسى جۇيەنى ەنگىزۋدى جوسپارلاپ وتىرمىز», دەدى ۆيتسە-مينيستر ب.اسىلوۆا.
ستيپەنديالاردى تولەۋ جونىندەگى فۋنكتسيانى قارجى ورتالىعى جۇزەگە اسىرادى. ءوز كەزەگىندە جوو ستۋدەنتتەردىڭ ۇلگەرىمى مەن مارتەبەسى (وقۋعا ءتۇسۋ, اياقتاۋ, وقۋدان شىعارۋ جانە ت.ب.) بويىنشا مالىمەتتى ءتيىستى اقپاراتتىق جۇيە ارقىلى بەرەدى.
كورسەتىلگەن دەرەكتەردى قارجى ورتالىعى مەملەكەتتىك دەرەكقورلارمەن سالىستىرىپ تەكسەرەدى. تولىق سالىستىرۋدان كەيىن اقپاراتتىق جۇيە ستيپەنديانىڭ مولشەرىن اۆتوماتتى تۇردە ەسەپتەيدى, كەيىن ستۋدەنتتەرگە قاراجات اۋدارۋ ءۇشىن ەكىنشى دەڭگەيدەگى بانكتەرگە ەسەپ-قيساپ جىبەرىلەتىن بولادى. بۇل تەتىكتى جوو-عا گرانت الۋشى ستۋدەنتتەر ءۇشىن وقۋ اقىسىن تولەۋ كەزىندە دە قولدانۋ جوسپارلانعانىن اتاپ وتكەن ءجون.
«گرانت – بۇل ستۋدەنت الاتىن قاراجاتتىڭ ماقساتتى سوماسى. قازىر بۇل قاراجات تىكەلەي جوو-عا اۋدارىلعان كەزدە, ستۋدەنت مەملەكەت وعان اقشا تولەيتىنىن, ول ءۇشىن اقىلى نەگىزدە وقيتىندار سياقتى توقسان سايىن وقۋ اقىسى تولەنەتىنىن سەزبەيدى. سوندىقتان قازىر ءبىز شارتتى تۇردە ستۋدەنتتىڭ ەسكروۋ-شوتىنا اقشا ءتۇسۋى ءۇشىن جۇمىس ىستەپ جاتىرمىز. بىراق ستۋدەنت بۇل قاراجاتتى ۋنيۆەرسيتەتتەگى وقۋ اقىسىن تولەۋدەن باسقا ماقساتتا پايدالانا المايدى. كرەديتتەردىڭ جيناقتالۋىنا قاراي ول بۇل تولەمدى جوو-عا بانك ارقىلى اۋداراتىن بولادى», دەدى ءبىلىم جانە عىلىم ءمينيسترى اسحات ايماعامبەتوۆ.
وسىلايشا, جاڭا جۇيە مەملەكەت جىل سايىن ستيپەندياعا دا, جوعارى وقۋ ورىندارىندا وقۋعا دا قاراجاتتى تىكەلەي ءبىلىم الۋشىلارعا اتاۋلى اۋدارۋ ارقىلى بولەتىن اقشا قاراجاتىنىڭ اشىقتىعىن قامتاماسىز ەتەدى. بۇدان بولەك, جۇيەدەگى تاعى ءبىر وڭ وزگەرىس – باسقا جوو-عا اۋىسقان ستۋدەنتتەرگە گرانتتى ساقتاي وتىرىپ, ستيپەنديانى ۇزدىكسىز تولەۋ مۇمكىندىگى.