كۇن رايىنىڭ كۇرت جىلىنۋىنا بايلانىستى ەلىمىزدىڭ وڭىرلەرىندە سۋ باسۋ قاۋپى ساقتالۋدا. وسىعان قاتىستى سۋ قويمالارىندا دايىندىق جۇمىستارى مىقتاپ قولعا الىندى. بۇل تۋرالى ەكولوگيا, گەولوگيا جانە تابيعي رەسۋرستار ءمينيسترىنىڭ ورىنباسارى سەرىك قوجانيازوۆ حابارلادى.
«قازگيدرومەتتىڭ» مالىمەتىنە سۇيەنسەك, قازاقستاننىڭ باسىم بولىگىندە قار ەرۋ ءۇردىسى جالعاسىپ جاتىر. قىزىلوردا, اتىراۋ جانە ماڭعىستاۋ وبلىستارى اۋماعىندا جانە تۇركىستان, جامبىل, الماتى وبلىستارىنىڭ جازىق جەرلەرىندە قار تۇگەلدەي ەرىپ كەتكەن. الايدا رەسپۋبليكانىڭ تاۋلى وڭىرلەرىندە (شىعىس قازاقستان, الماتى, جامبىل جانە تۇركىستان وبلىستارىندا) تاسقىن قاۋپى قار ەرۋ جانە جاۋىن-شاشىن كەزىندە دە ساقتالادى.
«وسى كوكتەمدە سۋىق كۇندەردىڭ سوزىلۋىنا بايلانىستى قار ادەتتەگىدەن باياۋ ەرىدى. وسىعان بايلانىستى, قاراعاندى, اقمولا, سولتۇستىك قازاقستان, قوستاناي, اقتوبە, سونداي-اق باتىس قازاقستان وبلىستارىندا قار ءالى دە تولىعىمەن ەرىگەن جوق. اۋا رايى كۇرت جىلىنىپ, نوسەرلى جاۋىن جاۋسا, اتالعان وڭىرلەردى سۋ باسۋى مۇمكىن. سىرداريا جانە ىلە وزەندەرى مۇزدان تولىعىمەن تازاردى. ەرتىس وزەنىنىڭ شىعىس قازاقستان جانە پاۆلودار وبلىستارى اۋماعىندا مۇز ەرۋ جالعاسىپ, بۇل سەڭ كەپتەلىسىنە جانە سۋدىڭ جايىلما اۋماقتارىنا شىعۋىنا سوقتىرۋى مۇمكىن. تۇتاستاي العاندا, بيىل 2015-2017 جىلدار ارالىعىنداعى سياقتى تابيعي اپاتتار كۇتىلىپ وتىرعان جوق. بىراق تا كۇن رايىنىڭ كۇرت قۇبىلۋى سالدارىنان قاتتى جاۋىن-شاشىن بولسا, قاراعاندى, اقمولا, سولتۇستىك قازاقستان, قوستاناي, الماتى, تۇركىستان, جامبىل جانە شىعىس قازاقستان وبلىستارىن ءىشىنارا سۋ باسۋى مۇمكىن», دەدى س.قوجانيازوۆ.
سول سەبەپتى تاسقىن سۋدان كەلەتىن قاۋىپتىڭ الدىن الۋ ماقساتىندا سۋ رەسۋرستارى كوميتەتىندە سۋ تاسقىنىنا قارسى كوميسسيا قۇرىلعان. مۇنداي كوميسسيالار «قازسۋشار» كاسىپورنى مەن ونىڭ فيليالدارىندا دا جۇمىس ىستەپ جاتىر.
«گيدروتەحنيكالىق نىسانداردى پايدالانۋ قاعيدالارىنا سايكەس كەز كەلگەن سۋ قويماسىندا ونى تولتىرىپ, كۇتىلەتىن تۇسىمدەرگە بايلانىستى سۋ تاسقىنىن وتكىزۋ كەستەسى ازىرلەندى. قاۋىپتى كەزەڭ باستالعانعا دەيىن تاسقىن سۋلاردى جيناقتاپ, قارقىندى سۋ تاسقىنى كەزىندەگى مانەۆر ءۇشىن سۋ قويمالارىندا بوس سىيىمدىلىقتار قورى قامتاماسىز ەتىلدى. بۇگىندە ءىرى سۋ قويمالارىنداعى ورتاشا سۋدىڭ كولەمى 70-75%-دى قۇراپ وتىر. بۇلار جوبالىق كولەمگە دەيىن تولتىرىلادى جانە ۇلكەن تاسقىن كەلگەن جاعدايدا ترانزيتتىك رەجىمدە جۇمىس ىستەيتىن بولادى», دەدى ۆيتسە-مينيستر.
ءمينيستردىڭ ورىنباسارى ايتقانداي, سۋ قويمالارىنىڭ جۇمىس رەجىمىنە كۇندەلىكتى مونيتورينگ بەلگىلەنىپ, رەسپۋبليكالىق نىسانداردا تاۋلىك بويى كەزەكشىلىك ۇيىمداستىرىلعان. قاۋىپتى ۋچاسكەلەردە قۇرىلىس جانە باسقا ماتەريالداردىڭ قاجەتتى قورلارى, سونداي-اق ءتيىستى تەحنيكا مەن جانار-جاعارماي ماتەريالدارىنىڭ قورى جەتكىلىكتى.
«كوممۋنالدىق جانە جەكە گيدروتەحنيكالىق نىسانداردا بوس سىيىمدىلىقتاردى ۇلعايتۋ, وزەندەر ارنالارىن تازالاۋ, ينجەنەرلىك قورعانىستاردى جوندەۋ جانە قۇرۋ بويىنشا بۇرىن بەرىلگەن ۇسىنىمداردىڭ ورىندالۋىن باقىلاۋ زەرتتەۋلەرى جۇرگىزىلۋدە. جاۋعان قاردىڭ ۇلكەن كولەمىن ەسكەرىپ, قار كۇرت ەرىگەن جاعدايدا سۋ قويمالارىنان اعىزىلاتىن سۋ كولەمى ەداۋىر ارتاتىنى ءسوزسىز. وسىعان بايلانىستى جەرگىلىكتى اتقارۋشى ورگاندار ەلدى مەكەندەرگە جاقىن ورنالاسقان سۋ قويمالارىنان اعىزىلاتىن سۋدى بۇرۋعا قاجەت ارنالاردىڭ وتكىزۋ قابىلەتىن ۇلعايتۋ جونىندەگى جۇمىستاردى جەدەلدەتىپ, كۇشەيتۋى قاجەت», دەدى ۆيتسە-مينيستر.
س.قوجانيازوۆ سۋ قويمالارىنىڭ بوس سىيىمدىلىقتارىن قالىپتاستىرۋمەن قاتار, ارنالار تازالانعان جاعدايدا عانا ىقتيمال اپاتتى شىعىنسىز وتكەرۋ مۇمكىن ەكەنىن ايتتى.