جالپى «جاۋاپكەرشىلىك ءپرينتسيپى» دەگەن ۇعىم بار. ءار ادامنىڭ جاۋاپكەرشىلىگى ءارتۇرلى. ال ساياسي جاۋاپكەرشىلىكتىڭ اۋقىمى كەڭ, اۋىرتپالىعى دا كوپ.
ماسەلەگە وسى تۇرعىدان كەلسەك, كوتەرىپ وتىرعان پروبلەماعا جەڭىل-جەلپى قاراماعان ءجون. سەبەبى ءبىز كەيدە ءابسوليۋتتى ماسەلەنىڭ ءوزىن ابسۋردقا اينالدىرىپ جىبەرەمىز. زاڭدا وزىنە تىكەلەي باعىنىستى قىزمەتكەرى جەمقورلىققا قاتىستى بولعانى دالەلدەنسە, باسشىسى دا جازاسىز قالماۋى كەرەك ەكەنى ايتىلادى. بىراق باسشىنىڭ بارلىعى قاراماعىنداعى قىزمەتكەرلەرىنىڭ نە ىستەپ, نە ءبۇلدىرىپ جۇرگەنىنەن حاباردار بولۋى مۇمكىن ەمەس قوي؟! كەيدە ءتىپتى ءبىر وتباسىنداعى ادامداردىڭ وزدەرى ءبىر-ءبىرىنىڭ نە ىستەپ جۇرگەندەرىن بىلمەيتىن كەزدەر بولادى. «تاياقتىڭ ءبىر ۇشى ماعان دا تيەدى» دەگەن «قورعانىشتىڭ» سوڭى اكىمدەردىڭ ءاربىر ورىنباسارىنىڭ ارتىنان شام الىپ تۇسۋىنە دەيىن جەتكىزۋى ابدەن مۇمكىن. ونىڭ ۇستىنە قول استىنداعىلاردىڭ قىلمىسى ءۇشىن باسشىلاردىڭ بارلىعىن جاپپاي جازالاي بەرسەك, ەرتەڭ جۇمىس ىستەيتىن ادام قالمايدى. مەملەكەتتىك قىزمەتكە باراتىنداردىڭ ۇلەس سالماعى ونسىز دا ماردىمسىز. مىسالى, ەلىمىزدە ءبىراز جىلدان بەرى اكىمىنىڭ ورىنباسارى جوق اۋىلدار بار. ءبىز ءار ماسەلەگە كەڭىنەن قاراۋدان ايىرىلىپ بارامىز. زاڭعا ەنگىزىلگەن بۇل تالاپقا دا بىرجاقتى قاراماۋ كەرەك. ءار فاكتىنى جەكە سارالاپ, بارلىق ماسەلەنى ەسكەرە وتىرىپ شەشىم قابىلداعان ءجون. ال ەگەر سىبايلاس جەمقورلىققا باسشىنىڭ دا قاتىسى بولسا, وندا ماسەلە باسقا. مۇنداي جاعدايدا كەز كەلگەن باسشى قىزمەتىنەن كەتۋگە ءتيىس.
ايدوس سارىم,
پارلامەنت ءماجىلىسىنىڭ دەپۋتاتى