ەرتەڭ تۇركيانىڭ ىستانبۇل قالاسىندا بوكستان حالىقارالىق تۋرنير باستالادى. بۇل جارىستا قازاقستاننىڭ ايەلدەر قۇراماسى دا ونەر كورسەتەدى.
كوماندامىزدىڭ باس باپكەرى ەرىك العابەك 21-ناۋرىزعا دەيىن سوزىلاتىن تۋرنيرگە التى شاكىرتىن اپارۋدى قۇپ كورىپ وتىر. ولاردىڭ بارلىعىنىڭ دا ەسىمى جانكۇيەرلەرگە جاقسى تانىس. ماسەلەن, تۇركيا تورىندە الەمنىڭ ەكى دۇركىن چەمپيونى نازىم قىزايباي كۇش سىناسادى. شىنى كەرەك, كەزىندە ەلىشىلىك جارىستاردا قارسىلاس شاق كەلتىرمەي, حالىقارالىق دودالاردا دا تالاي مارتە الدىنا جان سالماعان ارۋىمىز سوڭعى كەزدەرى ءجيى ءسۇرىنىپ ءجۇر. قازاقستان چەمپيوناتىندا ۇتىلدى, جۋىردا عانا وتكەن حالىقارالىق تۋرنيردە ءسۇرىندى. ەندى وسى جارىستا نازىم جانكۇيەرلەردىڭ سەنىمىن اقتايدى دەپ ۇمىتتەنەمىز. سونداي-اق, ۆلاديسلاۆا كۋحتا, ريمما ۆولوسەنكو, ۆالەنتينا حالزوۆا, نادەجدا ريابەتس جانە اقجاركىن مولدابەكوۆا سىندى سۇلۋلار دا انادولى ەلىندە ءوز ونەرلەرىن ورتاعا سالادى.
ايتۋلى تۋرنير اياقتالعان بەتتە قازاقستان قۇراماسى تۇركيانىڭ ترابزون قالاسىنا اتتانىپ, انگليا, يرلانديا جانە جەرگىلىكتى بىلعارى قولعاپ شەبەرلەرىنىڭ قاتىسۋىمەن وتەتىن بىرلەسكەن وقۋ-جاتتىعۋ جيىنىندا شەبەرلىكتەرىن شىڭدايدى.