باۆاريادا باق سىنايمىز

دۋالى اۋىز مامانداردىڭ بۇل پىكىرىنە ەش كۇمان كەلتىرمەيمىز. سەبەبى سوڭعى ءۇش الەم چەمپيوناتىندا باس جۇلدەلەردىڭ دەنىن ءدال سول مەملەكەتتىڭ وكىلدەرى ولجالاۋدا. ماسەلەن, 2015 جىلى شۆەتسيانىڭ فالۋن قالاسىندا وتكەن جارىستا ساراپقا سالىنعان 21 التىننىڭ 11-ءىن نورۆەگيا قۇ­راماسى يەلەنسە, بەسەۋىن گەر­مانيا ەنشىلەدى. ال جارىس قوجا­يىندارى قوس التىندى ولجالادى. 2017 جىلى فينليانديانىڭ لاحتي قالاسىندا سكانديناۆيا تۇبەگىنىڭ تۇلەكتەرى جەتى, نەمىستەر التى مارتە جەڭىس تۇعىرىنىڭ ەڭ بيىك ساتىسىنا كوتەرىلدى. رەسەي مەن اۋستريانىڭ شاڭعىشىلارى ەكى رەتتەن ءدال سونداي قۇرمەتكە بولەندى.

2019 جىلعى الەمدىك دودا اۋستريا­نىڭ زەفەلد قالاسىندا ۇيىمداستىرىلدى. الپىسقا جۋىق ەلدىڭ وكىلدەرى قاتىسقان بايراقتى باسەكەدە تەك 12 كومانداعا جۇلدە بۇيىردى. سولاردىڭ اراسىندا نورۆەگيالىقتاردىڭ شوقتىعى بيىك بولدى. ولار 25 جۇلدە (13 التىن+5 كۇمىس+7 قولا) جەڭىپ الدى. قورجىنىندا 9 مەدالى (6+3+0) بار گەرمانيا قۇراماسى ەكىنشى ورىنعا جايعاستى. ءۇشىنشى ورىندا – شۆەتسيا. شۆەدتەر 5 جۇلدەنى (2+2+1) قانجىعالارىنا بايلادى. سونداي-اق وسى جارىستا پولشانىڭ (1+1+0) ءانۇرانى ءبىر مارتە شىرقالسا, جۇلدە العاندار قاتارىندا رەسەي (0+5+3), اۋستريا (0+4+5), يتاليا (0+1+1), سلوۆەنيا (0+1+0), جاپونيا (0+0+2), فينليانديا (0+0+1), فرانتسيا (0+0+1) جانە شۆەيتساريانىڭ (0+0+1) سپورتشىلارى بار.

جالپى, شاڭعى جارىسىنان الەم چەمپيوناتى 1925 جىلدان بەرى ۇيىمداستىرىلىپ كەلەدى. سول كەزدەن بەرى 52 مارتە جالاۋى جەلبىرەگەن ايتۋلى جارىس­تا نەبارى 22 مەملەكەتتىڭ سا­يىپقىراندارىنا عانا جەڭىس تۇ­عىرىنان قول بۇلعاۋ باقىتى بۇ­يىردى. ءبىر قۋانتارلىق جايت, سولاردىڭ قاتارىندا قازاق­ستان­نىڭ ورەندەرى دە بار. جەر-جا­ھاننىڭ ءار قيىرىنان جينالعان ءدۇبىرلى دودادا ءبىزدىڭ جىگىتتەر 3 التىن, 2 كۇمىس جانە 4 قولا مەدالدى يەلەندى. بارلىعى – 9 جۇلدە. وسى تابىسىمىزدىڭ ارقاسىندا جارىس كەستەسىندە 15-ورىنعا جايعاستىق. وتانداستارىمىزدىڭ الدىن تەك نورۆەگيا (127+98+100), فينليانديا (62+69+64), رەسەي (60+55+52), شۆەتسيا (44+44+43), گەرمانيا (37+51+35), اۋستريا (22+21+25), يتاليا (10+20+23), چەحيا (10+18+17), جاپونيا (10+10+10), پولشا (8+6+10), اقش (7+3+4), فرانتسيا (6+4+10), شۆەيتساريا (4+5+7) جانە ەستونيا (3+5+2) سىندى شاڭعى سپورتىندا مىقتى مەك­تەبى قالىپتاسىپ, جەڭىسپەن ورىل­گەن ءداستۇرى بار ساناۋلى عانا مەم­لەكەتتەردىڭ وكىلدەرى وراي الدى.

قازاقستاننىڭ شاڭعى سپور­تىنىڭ داڭقىن شارىقتاتىپ, مە­رەيىن ۇستەم ەتكەندەر اراسى­نان الدىمەن ۆلاديمير سمير­نوۆتىڭ ەسىمى اتالادى. ول تاۋەلسىز ەلىمىزگە الەم چەمپيوناتىنىڭ باقانداي 9 جۇل­دەسىن سىيعا تارتتى. تارقاتىپ ايتساق, 1995 جىلى كانادانىڭ باندەر-بەي قالاسىندا وتكەن جارىستا اقمولا وبلىسىنىڭ تۋماسى 10, 15 جانە 30 شاقى­رى­مدىق سايىستا الدىنا جان سال­ماسا, 50 شاقىرىمدىق باسە­كەدە قولا مەدالدى موينىنا ءىلدى. 1993 جىلى شۆەتسيانىڭ فا­لۋن قالاسىندا سميرنوۆ 2 كۇ­مىس پەن 1 قولانى ەنشىلەدى. سول باسەكەلەردە ايگىلى وتانداسى­مىز نورۆەگيالىق بورن دەلي, فينليانديالىق ميكا ميۋل­ليۋ­ليا مەن ياري يسومەتسيا, رەسەي­لىك الەكسەي پروكۋروروۆ, يتاليا­لىق سيلۆيو فاۋنەر جانە تاعى باسقا اتاقتارى الىسقا تا­را­عان ساڭلاقتاردان وزعانىن جان­كۇيەرلەر وسى كۇنگە دەيىن اۋىزدارىنان سۋلارى قۇرىپ, تامسانا اڭگىمەلەيدى.

2013 جىلى يتاليانىڭ ۆال-دي-فەممە قالاسىندا وت­كەن الەمدىك دودانىڭ 50 شاقى­رىمدىق سايىسىندا كەندى التاي ولكەسىنىڭ تۋماسى الەكسەي پول­تورانين قولا مەدالدى يەلە­نىپ, كورەرمەندەردىڭ ىستىق ىقى­لاسىنا بولەندى. ءدال سول پول­تورانين ءوزىنىڭ ارىپتەسى نيكولاي چەبوتكومەن بىرگە كوماندالىق سپرينتتە دە ءۇشىنشى ورىنعا تا­بان تىرەدى. وكىنىشكە قاراي, اقمو­لالىق سپورتشىنىڭ ءومىرى كەل­تە بولدى. وسىدان ءبىر ايعا جۋىق ۋاقىت بۇرىن نيكولاي بۋ­راباي مەن ششۋچينسك تاس جولىندا اپاتقا ۇشىراپ, جارىق دۇنيەمەن قوش ايتىستى. ول نەبارى 38 جاس­تا ەدى...

ارينە, قازاقستان شاڭعى­شى­لا­رىنىڭ تۇعىرى بۇدان دا بيىك بولۋعا ءتيىس ەدى. بىراق ءبىز­دىڭ ەل كەزىندە كەڭەس وداعى قۇرا­مىندا بولعاندىقتان كەيبىر جەر­لەستەرىمىزدىڭ جەڭىسى الىپ يم­پەريانىڭ ەنشىسىنە جازىلدى. ماسەلەن, جوعارىدا ءبىز اتاپ وتكەن ۆلاديمير سميرنوۆتىڭ ءوزى الەم چەمپيوناتىنىڭ 1 التىن, 2 كۇمىس جانە 1 قولاسىن كسرو قۇراما كومانداسىنىڭ قور­جى­نىنا سالدى. ودان بولەك, 1974 جىلى فالۋندە قوستانايلىق يۆان گارانين (قولا) مەن 1987 جىلى وبەرستدورفتا اقمولالىق ۆلاديمير ساحنوۆتىڭ (كۇمىس) جەڭىس تۇعىرىنا كوتەرىلگەنى كوزى قاراقتى جانكۇيەرلەردىڭ جادىندا.

قازاقستاندىق شاڭعىشى­لار سوڭعى رەت 2013 جىلى اپەن­نين تۇ­بەگىندە وتكەن الەم چەمپيو­نا­­تىندا جۇلدەلى ورىنداردى يەلەندى. سودان بەرى سەگىز جىل زۋ­لاپ ءوتتى. وكىنىشكە قا­راي, 2015 جىلى فالۋندا, 2017 جى­لى لاحتيدە جانە 2019 جى­لى زە­فەلدە وتكەن بايراقتى باسە­كە­لەردەن قورجىنىمىز بوس قاي­تتى. ەندى نەمىس جەرىندە جالا­ۋى جەلبىرەيتىن جارىستا جەرلەس­تەرىمىز سول ولقىلىقتىڭ ورنىن تولتىرادى دەپ ۇمىت­تەنەمىز.