تايسون مەن حوليفيلد ءۇشىنشى رەت جۇدىرىقتاسۋى مۇمكىن

ايتۋلى قوس ازاماتىنىڭ ەكەۋى دە سپورتتىق مانساپتارىن الدەقاشان اياقتاعان. سوعان قاراماستان جانكۇيەرلەر قوس ساڭلاقتىڭ جەكپە-جەگىن تاعاتسىزدانا كۇتۋدە. ارينە, وعان تاڭدانۋعا بولمايدى. سەبەبى, ولار ءوز ءداۋىرىنىڭ تەڭدەسسىز تۇلعالارى ەدى.

ماسەلەن, 54 جاستاعى مايك تايسوننىڭ ەسىمى اسا اۋىر سالماقتاعى ەڭ جاس الەم چەمپيونى رەتىندە تاريحتا قالدى. بۇل اتاققا ول نەبارى 20 جاسىندا قول جەتكىزدى. 1985-2005 جىلدار ارالىعىندا اقش-تىڭ الىبى 58 كەزدەسۋ وتكىزىپ, 50 رەت جەڭىسكە جەتتى. 44 قارسىلاسىن ەسىنەن تاندىردى. التى رەت ۇتىلىپ, تاعى ەكى باسەكەنىڭ ناتيجەسى ەسەپكە الىنبادى.

ال 58 جاستاعى ەۆاندەر حوليفيلد 1984-2011 جىلدار ارالىعىندا اتوي سالدى. 57 رەت رينگكە كوتەرىلگەن ول 44 مارتە ۇستەمدىك تانىتتى. 29 جەكپە-جەكتى مەرزىمىنەن بۇرىن اياقتادى. 10 مارتە ۇتىلىپ, ەكى رەت تەڭ ءتۇستى. تاعى ءبىر باسەكەنىڭ ناتيجەسى تىركەلگەن جوق.

ايتۋلى قوس مىقتىنىڭ جولى 1996 جانە 1997 جىلدارى ەكى مارتە قيىستى. العاشقىسىندا حوليفيلد ايقىن جەڭىسكە قول جەتكىزسە, ەكىنشىسىندە قارسىلاسىنىڭ قۇلاعىن تىستەگەنى ءۇشىن تايسون جارىستان شەتتەتىلدى. ەگەر ءۇشىنشى مارتە جۇدىرىقتاساتىن بولسا, وندا ولار 200 ميلليون فۋنت ستەرلينگ كولەمىندە سىياقى الادى.