بۇگىن مادەنيەت جانە سپورت ءمينيسترى اقتوتى رايىمقۇلوۆا ونلاين فورماتتا ازاماتتاردى جۇمىس جانە جەكە ماسەلەلەرى بويىنشا قابىلدادى, دەپ حابارلايدى Egemen.kz.
ءمينيستردىڭ قابىلداۋىندا بولعان ازاماتتاردىڭ كوتەرگەن ماسەلەسى سان-الۋان.
تۇركىستان وبلىسى, ماقتاارال اۋدانى, ج.نۇرلىباەۆ اۋىل وكرۋگى, مىرزاتوبە ەلدى-مەكەنىنىڭ تۇرعىنى وڭلاسىن نازاروۆ اۋىلدى جەردە مادەنيەت ءۇيى مەن سپورت كەشەندەرىن سالۋ ماسەلەسى بويىنشا ۇسىنىستارىن ايتتى. اقتوتى رايىمقۇلوۆا اتالعان ماسەلە «مادەنيەت تۋرالى» زاڭنىڭ 8-ءشى جانە 9-بابى 7) تارماقشاسىنا سايكەس جەرگىلىكتى اتقارۋشى ورگاننىڭ قۇزىرەتىنە جاتاتىنىن جەتكىزدى.
وسى رەتتە, تۇركىستان وبلىسى اكىمدىگىنىڭ مالىمەتىنە سايكەس ماقتاارال اۋدانىنىڭ ورتالىعى مىرزاكەنت كەنتىندەگى مادەنيەت ۇيىنە جەرگىلىكتى بيۋدجەتتەن قارجى ءبولىنىپ, كۇردەلى جوندەۋ جۇمىسى جۇرگىزىلىپ جاتقانىن, نىسان بيىل پايدالانۋعا بەرىلەتىن ايتتى.
سونىمەن قاتار جامبىل, ەڭبەكشى اۋىل وكرۋگى اۋماعىنان جاڭادان مادەنيەت ءۇيىن سالۋ ءۇشىن ارنايى جەر تەلىمى انىقتالىپ, جەرگىلىكتى بيۋدجەتتەن قارجى ءبولىنىپ, جوبالاۋ سمەتالىق قۇجاتتارى دايىندالىپ, جەكە ساراپتاما قورىتىندىسى الىنعانىن جەتكىزدى. اتالعان نىسانداردىڭ قۇرىلىس جۇمىسىن 2022-2023 جىلدارى جۇرگىزۋ جوسپارلانىپ وتىر.
«ۇلتتىق تاەكۆون-دو سپورتتىق فەدەراتسياسى (ITF)» قوعامدىق بىرلەستىگىنىڭ جەتەكشىسى ايدوس امانجولوۆ جەرگىلىكتى سپورت فەدەراتسيالارىن اككرەديتتەۋگە قاتىستى سۇراقتارىن قويدى.
مينيستر «دەنە شىنىقتىرۋ جانە سپورت» تۋرالى زاڭعا ساي, جەرگىلىكتى سپورت فەدەراتسيالارىن اككرەديتاتسيالاۋ رەسپۋبليكالىق ماڭىزى بار قالالار مەن وبلىستاعى اتقارۋشى ورگانداردىڭ قۇزىرىندا ەكەنىن اتاپ ءوتتى.
تۇركىستان وبلىسى, جەتىساي اۋىلدىق مادەنيەت ۇيىندە ورنالاسقان مۋزەيدى زاڭداستىرۋ بويىنشا مادەنيەت ءۇيىنىڭ ديرەكتورى بوتاگوز دىلدابەكوۆانىڭ ساۋالىنا قاتىستى اقتوتى رايىمقۇلوۆا مۇراجايدى زاڭدى تۇلعا رەتىندە زاڭداستىرۋ كەرەگىن, مينيسترلىككە مۋزەيدى قۇرۋ تۋرالى كەلىسىم حات كەلگەن جاعدايدا, زاڭدا بەلگىلەنگەن تارتىپپەن قاراستىرىلاتىنىن جەتكىزدى. سونىمەن قاتار بۇل ماسەلە جەرگىلىكتى اكىمدىك قۇزىرەتىندە بولعاندىقتان مينيسترلىك تۇركىستان وبلىسى اكىمدىگىنە سۇرانىس حات جانە وبلىس اكىمى ومىرزاق شوكەەۆتىڭ اتىنا ۇسىنىس حات جىبەرەتىنىن ايتتى.
وسىدان كەيىن مينيستر قازاقستان كومپوزيتورلار وداعىنىڭ توراعاسى سەرىكجان ءابدىنۇروۆتىڭ وسى جىلى وداقتىڭ انتولوگياسىن شىعارۋ جانە كومپوزيتورلار فەستيۆالىن ۇيىمداستىرۋ جايلى ءوتىنىشىن تىڭدادى. اقتوتى رايىمقۇلوۆا وداق توراعاسىنا ۇلتتىق ونەردى ناسيحاتتاۋ جولىنداعى قىزمەتى ءۇشىن العىس ايتىپ, باسپا ءىسى سالاسىنداعى جىلدىق جوسپار بەكىتىلىپ قويعانىن جانە پاندەميا مەن ەلىمىزدەگى ەپيدەميالوگيالىق جاعدايعا بايلانىستى بارلىق ءىس-شارا ۋاقىتشا توقتاعاندىقتان بۇل ءوتىنىشتى قاناعاتتاندىرۋ مۇمكىن ەمەستىگىن جەتكىزدى.
سونداي-اق جەكە ماسەلە بويىنشا كەزدەسكەن ەل ازاماتتارى دا ءتيىستى جاۋاپ الدى.