نۇر-سۇلتان قالاسىنىڭ اكىمى التاي كولگىنوۆ بايقوڭىر اۋدانىنىڭ تۇرعىندارىمەن وتكەن كەزدەسۋدە 2020 جىلى اتقارىلعان شارۋالار مەن بيىلعا جوسپارلانىپ وتىرعان جۇمىس جايلى قوزعاپ ءوتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
«قالا تۇرعىندارىمەن تۇراقتى كەزدەسىپ, ولارمەن - ەلوردانى ودان ءارى دامىتۋ جونىندەگى جوسپاردى تالقىلاۋ جانە قالىپتاستىرۋ پروتسەسىنە تارتۋ ماڭىزدى. قالا تۇرعىندارىنىڭ كوپشىلىگى قالا ومىرىنە بەلسەندى ارالاساتىنى قۋانتادى.
بۇگىن بارلىق سانيتاريا نورمالارىن ساقتاي وتىرىپ, بايقوڭىر اۋدانىنىڭ تۇرعىندارىمەن كەزدەستىم. ال بۇعان دەيىن باسقا ءۇش اۋداننىڭ تۇرعىندارىمەن كەزدەسكەنمىن. پاندەمياعا قاراماستان, بايقوڭىر اۋدانىندا 2020 جىلى كوپ جۇمىس جۇرگىزىلدى, بيىل ناقتى جوسپارلار بار», - دەيدى قالا اكىمى.
ونىڭ ايتۋىنشا مەملەكەت باسشىسى بۇقارالىق سپورتتى بەلسەندى دامىتۋدى جانە سپورتپەن اينالىسۋ ءۇشىن بارلىق جاعدايدى جاساۋدى تاپسىردى. وسىلايشا, اۋداندا 50–دەن استام اۋلا اباتتاندى, اتاپ ايتقاندا, 600-گە جۋىق كىشى ارحيتەكتۋرالىق فورما, 10-نان استام فۋتبول الاڭى, 200 كوشە ترەناجەرلەرى جانە بىرنەشە باسكەتبول الاڭدارى ورناتىلدى. سونداي-اق, 22 اۋلا جوندەلىپ, 14 قوعامدىق كەڭىستىك (ساياباقتار, سكۆەرلەر, بۋلۆارلار) اباتتاندى. قالادا "بيۋدجەتكە قاتىسۋ" جوباسىن جۇزەگە اسىرۋدامىز: ءار تۇرعىن قاتىسىپ, اباتتاندىرۋ بويىنشا ءوز جوباسىن ۇسىنا الادى.
«بيىل كوپشىلىك ورىندار مەن جاسىل ايماقتاردىڭ سانى ايتارلىقتاي ءوستى. ەكولوگيانى جاقسارتۋ جانە قالا تۇرعىندارىنىڭ ۋاقىت وتكىزۋىنە قولايلى ورىندار قۇرۋ ءۇشىن نۇر-سۇلتاندى اۋقىمدى كوگالداندىرامىز. ماسەلەن, تەك بايقوڭىر اۋدانىندا 7 مىڭنان استام اعاش پەن 9 مىڭ شارشى مەتر گۇلزار وتىرعىزىلدى.
تكش سالاسىندا دا كوپتەگەن جۇمىستار اتقارىلدى: 29 جاستار تۇرعىن ءۇي كەشەنى جانە 10 جاتاقحانا جوندەلدى. 2020 جىلى اۋداندا 15-تەن استام اپاتتى ءۇي ءسۇرىلدى», - دەپ جازدى التاي كولگىنوۆ.
سونداي-اق, جارىقتاندىرۋ بويىنشا جۇمىستار جۇرگىزىلدى, بۇل وسى اۋداننىڭ 70-تەن استام كوشەسىن, ونىڭ ىشىندە تۇرعىن الاپتارىن دا قامتۋعا مۇمكىندىك بەردى.
«كەزدەسۋدە تۇرعىندار 70-كە جۋىق ماسەلە كوتەردى, ولار - كوشەلەردى اسفالتتاۋ, كارىز تارتۋ, تكش جاڭعىرتۋ جانە ەسكى ۇيلەردى بۇزۋ, كوشەلەردى جارىقتاندىرۋ, اۋلالاردى اباتتاندىرۋ, الەۋمەتتىك نىساندار سالۋ, ەرەكشە قاجەتتىلىكتەرى بار ادامدار ءۇشىن جاعداي جاساۋ جانە ت.س.س. تۇرعىنداردىڭ ماسەلەسى باقىلاۋعا الىندى», - دەپ جازدى Instagram پاراقشاسىندا.