قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى مەن قر سىرتقى ىستەر مينيسترلىگى بىرلەسە وتىرىپ اقش جانە وزگە دە حالىقارالىق سەرىكتەستەردىڭ قولداۋىمەن سيريادان ءبىر توپ قازاقستاندىق ازاماتتاردى ەلگە قايتارۋ وپەراتسياسىن وتكىزدى, دەپ حابارلايدى Egemen.kz.
توپ قۇرامىندا 4 ەر ادام, 1 ايەل جانە 2 جەتىم بالانى قوسقاندا 7 بالا بولدى. ۇلتتىق زاڭناماعا جانە حالىقارالىق مىندەتتەمەلەرگە سايكەس, تەرروريستىك ءىس-ارەكەتكە قاتىسقان ادامدار قىلمىستىق جاۋاپكەرشىلىككە تارتىلادى. جەتىم بالالار جاقىن تۋىستارىنىڭ قامقورلىعىنا بەرىلەدى جانە مەملەكەت تاراپىنان ولارعا بارلىق قاجەتتى كومەك كورسەتىلەدى.
ايەلدەر مەن بالالار وڭالتۋ جانە قايتا الەۋمەتتەندىرۋ باعدارلامالارىمەن قامتاماسىز ەتىلەدى.
قازاقستان پرەزيدەنتى قاسىم-جومارت توقاەۆ سانكتسيالاعان تەرروريستىك ارەكەتتەر بەلسەندى جۇرگىزىلىپ جاتقان ايماقتاردان ازاماتتارىمىزدى قايتارۋ وپەراتسياسى تۇڭعىش پرەزيدەنت - ەلباسى نۇرسۇلتان نازارباەۆ باستاعان «جۋسان» وپەراتسياسىنىڭ جالعاسى بولدى.