ينۆەستيتسيالار تارتۋ بويىنشا جۇرگىزىلىپ جاتقان جۇيەلى جۇمىس اياسىندا تاۋەلسىزدىك جىلدارى ەلىمىزگە 360 ملرد دوللاردان استام تىكەلەي شەتەلدىك ينۆەستيتسيالار تارتىلدى.
مەملەكەت باسشىسى قاسىم-جومارت توقاەۆتىڭ قازاقستانعا شەتەلدىك بيزنەستى تارتۋ بويىنشا جۇمىستى كۇشەيتۋ قاجەتتىلىگى تۋرالى تاپسىرماسىن ورىنداۋ ماقساتىندا Kazakh invest تاراپىنان ايتارلىقتاي جۇمىس اتقارىلدى.
«پاندەمياعا جانە بىرقاتار شەكتەۋ شارالارىنا قاراماستان, 2020 جىلدىڭ قورىتىندىسى بويىنشا Kazakh invest قولداۋىمەن سوماسى 1,6 ملرد دوللار بولاتىن 36 جاڭا ينۆەستيتسيالىق جوبا ىسكە اسىرىلدى. ونىڭ ىشىندە قاراعاندى وبلىسىندا «Linde Group» نەمىس تۇك قاتىسۋىمەن تەحنيكالىق گاز ءوندىرىسى, تۇركىستان وبلىسىندا «Polcotton» پولياك كومپانياسىنىڭ قاتىسۋىمەن جىلىجاي كەشەنى, الماتى وبلىسىندا ءباا تۇك قاتىسۋىمەن قۇراما جەم ءوندىرىسى, سونداي-اق ەل وڭىرلەرىندە جالپى قۋاتى 368 مۆت جەك 7 جوباسى ىسكە قوسىلدى», دەدى Kazakh invest باسقارما توراعاسىنىڭ ورىنباسارى عالىم وزبەكوۆ.
كارانتيندىك شارالاردى جەڭىلدەتۋ كەزەڭىندە Kazakh invest ەلىمىزدىڭ ينۆەستيتسيالىق ءيميدجىن ىلگەرىلەتۋ بويىنشا بىرقاتار ءىس-شارا ۇيىمداستىردى. پىكىرتالاستارعا سولتۇستىك ەۋروپا, ءباا, ۇلىبريتانيا, گەرمانيا, تۇركيا, قحر جانە ۋكراينا ەلدەرىنىڭ ىسكەر توپتارىنىڭ وكىلدەرى قاتىستى. ونلاين فورماتتا الەمنىڭ 50-دەن استام ەلىنەن 6 مىڭعا جۋىق ادامدى قامتيتىن 40-تان استام تاقىرىپتىق ۆەبينار ۇيىمداستىرىلدى.
سونداي-اق جىل قورىتىندىسى بويىنشا قازاقستانعا Kazakh invest قولداۋىمەن اقش, گەرمانيا, رەسەي, ءباا, ءۇندىستان, وڭتۇستىك كورەيا جانە باسقا ەلدەردەن 70-تەن استام شەتەلدىك بيزنەس-دەلەگاتسيا كەلدى. ينۆەستورلاردىڭ 2 مىڭنان استام اۋىزشا جانە جازباشا ءوتىنىشى قارالدى.
«ينۆەستيتسيالاردى تارتۋدىڭ ءۇش دەڭگەيلى جۇيەسىنىڭ جۇمىسىن نىعايتۋ ماقساتىندا 65 ەلدىك ينۆەستيتسيالىق باعدارلاما ازىرلەندى, ونىڭ شەڭبەرىندە ينۆەستيتسيالىق جوبالاردى ىرىكتەۋ جانە سۇيەمەلدەۋ, سونداي-اق بەلسەندى ينۆەستورلاردى انىقتاۋ ماسەلەلەرىنە ناقتى كوزقاراس بويىنشا جۇمىس جۇرگىزىلەتىن بولادى. ولاردىڭ ستراتەگيالىق دامۋ جوسپارلارىن ەسكەرە وتىرىپ, ءبىز ىقتيمال ينۆەستورلاردى ىرىكتەپ الىپ, ولاردى قازاقستاندا ءوز جوبالارىن ىسكە اسىرۋعا شاقىرا الامىز», دەدى ع.وزبەكوۆ.
سونىمەن قاتار ينۆەستيتسيالىق سالاداعى ينستيتۋتسيونالدىق ءوزارا ءىس-قيمىلدى كۇشەيتۋگە كوپ كوڭىل بولىنەدى. مىسالى, 2020 جىلدىڭ كۇزىندە بارلىق امەريكالىق ىسكەرلىك قوعامداستىقتى بىرىكتىرەتىن اقش ساۋدا پالاتاسى جانىنان قازاقستان-امەريكالىق ىسكەرلىك كەڭەسى قۇرىلدى. 2021 جىلدىڭ باسىندا اقش, قازاقستان جانە وزبەكستان ۇكىمەتتەرى ورتالىق ازيا ينۆەستيتسيالىق ارىپتەستىگىن قۇرۋ تۋرالى مالىمدەدى. بۇل باستاما اياسىندا اقش-تىڭ حالىقارالىق قارجى دامۋ كورپوراتسياسى (DFC) قازاقستان مەن وزبەكستانعا 5 جىل ىشىندە كەمىندە 1 ملرد دوللار ينۆەستيتسيا قۇيۋدى جوسپارلاپ وتىر.
سونداي-اق ينۆەستيتسيالىق احۋالدى جاقسارتۋ, قۇقىقتىق بازانى جەتىلدىرۋ جانە ستراتەگيالىق ينۆەستورلاردى قولداۋ ماقساتىندا ينۆەستورلاردى قولداۋدىڭ جاڭا قۇرالى – ينۆەستيتسيالار تۋرالى كەلىسىم ەنگىزىلدى.
حالىقارالىق ۇيىمداردىڭ جاھاندىق ينۆەستيتسيالىق اعىنداردىڭ تومەندەۋى تۋرالى بولجامدارىن نازارعا الا وتىرىپ, Kazakh invest تاراپىنان ينۆەستيتسيالىق مۇمكىندىكتەردى جىلجىتۋدى كۇشەيتۋ, قازاقستانعا ينۆەستورلاردى تارتۋ, سونداي-اق بيىل 40-تان استام جاڭا ءوندىرىستى ىسكە قوسۋعا جاردەم كورسەتۋ بويىنشا بەلسەندى جۇمىس جالعاستىرىلاتىن بولادى.