بۇگىن – الەمدەگى ەڭ اتاقتى حوككەيشىلەردىڭ ءبىرى ءارى بىرەگەيى ۋەين گرەتتسكيدىڭ تۋعان كۇنى. ۇزاق جىلدار بويى تەڭدەسسىز ونەرىمەن تورتكۇل دۇنيەنىڭ جانكۇيەرلەرىن تامساندىرعان ويىنشى 60 جاسقا كەلىپ وتىر.
ۋەين 1961 جىلدىڭ 26 قاڭتارىندا كانادانىڭ ونتاريو شتاتىنا قاراستى برانفورد قالاسىندا تۋدى. 1978-1999 جىلدار ارالىعىندا «ەدمونتون ويلەرز», «لوس-اندجەلەس كينگز», «سەنت-لۋيس بليۋز» جانە «نيۋ-يورك رەيندجەرەس» كلۋبتارى ساپىندا ونەر كورسەتكەن ول كوپتەگەن تولاعاي تابىستار مەن رەكوردتىق كورسەتكىشتەرگە قول جەتكىزدى. اتاپ ايتساق, كانادا كۋبوگىن – ءۇش, ستەنلي كۋبوگىن ءتورت رەت ۇتتى. ۇلتتىق حوككەي ليگاسىنىڭ (ۇحل) ەڭ قۇندى ويىنشىسى اتاعىن توعىز رەت يەلەنسە, ەڭ مەرگەن شابۋىلشىعا تيەسىلى ارنايى سىيلىقتى 10 مارتە ولجالادى. ءتۇرلى سايىستاردا 61 رەكوردتى جاڭارتتى. «جۇلدىزدار ماتچىندا» التى مارتە ونەر كورسەتىپ, 14 گولدىڭ اۆتورى اتاندى. بۇل دا رەكورد! ۇحل-دا بارلىعى 1487 رەت مۇزايدىنعا شىعىپ, 894 گول سوقتى, 1 963 ناتيجەلى پاس بەردى. كەزىندە الەمنىڭ ەڭ ۇزدىك حوككەيشىلەرىنىڭ ءبىرى سانالعان مارك مەسسەنىڭ ءوزى ايتۋلى ازاماتتى «ەندى گرەتتسكيدەي ويىنشىمەن قايتا قاۋىشۋىمىز نەعايبىل. ول – ءجۇز ەمەس, مىڭ جىلدا ءبىر قايتالاناتىن كەرەمەت قۇبىلىس!» دەپ باعالاعان ەدى.
قازىرگى كەزدە گرەتتسكي بيزنەستىڭ بەل ورتاسىندا ءجۇر.