8-21 اقپان ارالىعىندا مەلبۋرندە «ۇلكەن دۋلىعا» ساناتىنا جاتاتىن ءبىر جىل بەدەرىندەگى ءتورت جارىستىڭ باسى – اۋستراليانىڭ اشىق بىرىنشىلىگىنىڭ جالاۋى جەلبىرەيدى. جۇلدە قورى مول جانە الەمدىك رەيتينگتەگى جاعدايدى جاقسارتۋ ءۇشىن تاماشا مۇمكىندىك بەرىلەتىن ءدۇبىرلى دوداعا تەك تاڭداۋلى تەننيسشىلەر عانا قاتىسادى. سولاردىڭ قاتارىندا قازاقستاننىڭ دا وكىلدەرى بار.
اۋستراليانىڭ اشىق بىرىنشىلىگىنىڭ تۇساۋى سوناۋ 1905 جىلى كەسىلدى. ۋاقىت وزعان سايىن ايتۋلى جارىستىڭ مەرەيى ءوسىپ, مارتەبەسى ارتا ءتۇستى. وسى تۋرنير ارقىلى تالاي ويىنشى تورتكۇل دۇنيەگە تانىلىپ, الەمدىك سپورت تاريحىنا ءوز ەسىمدەرىن التىن ارىپتەرمەن جازدى.
ستاتيستيكالىق مالىمەتتەرگە جۇگىنسەك, تالاي قىزىقتى دەرەكتەرگە قانىق بولامىز. ماسەلەن, ەرلەر اراسىندا باس جۇلدەنى ەڭ كوپ ولجالاعان نوۆاك دجوكوۆيچ ەكەنىن جانكۇيەرلەر جاقسى بىلەدى. سەربيانىڭ سايىپقىرانى سەگىز رەت تەڭدەسسىز دەپ تانىلدى. بۇل بەلەس شۆەيتساريانىڭ ماقتانىشى رودجەر فەدەرەرگە التى مارتە باعىندى. ەرتەرەكتە روي ەمەرسون ەسىمدى مىقتى تەننيسشى بولدى. وتكەن عاسىردىڭ الپىسىنشى جىلدارى جاسىل قۇرلىقتىڭ وكىلى التى بىردەي تۋرنيردە توپ جارىپ, كوپشىلىكتىڭ قوشەمەتىنە بولەندى.
ايەلدەر جايىندا ايتار بولساق, رەكوردتىق كورسەتكىش مارگارەت كورت-سميتكە تيەسىلى. اۋستراليالىق تەننيسشى 1960-1973 جىلدار ارالىعىندا الدىنا جان سالماي, باس جۇلدەنى 11 مارتە ولجالادى. حح عاسىردىڭ العاشقى جارتىسىندا تاعى ءبىر جەرگىلىكتى ويىنشى نەنسي ۋينن-بولتون التى رەت قارسىلاس شاق كەلتىرمەسە, بۇگىنگى تاڭداعى تەڭدەسسىز تەننيسشىلەردىڭ ءبىرى سەرەنا ۋيليامس جەتى مارتە جەڭىمپاز اتاندى.
بىلتىرعى ءتۋرنيردىڭ ەرلەر اراسىنداعى فينالىندا سەربيالىق نوۆاك دجوكوۆيچ پەن اۋستريالىق دومينيك تيم كۇش سىناستى. بۇل تارتىس 6:4 4:6 2:6 6:3 6:4 ەسەبىمەن العاشقىسىنىڭ پايداسىنا شەشىلدى. ايەلدەردىڭ شەشۋشى سايىسىندا امەريكالىق سوفيا كەنين مەن يسپانيالىق گاربينە مۋگۋرۋسا شەبەرلىك بايقاستى. بۇل تارتىستا اقش تەننيسشىسىنىڭ مەرەيى ۇستەم بولدى – 4:6 6:2 6:2.
قازاقستاندىق تەننيسشىلەر دە مەلبۋرندە ءجيى بوي كورسەتىپ ءجۇر. جەرلەستەرىمىزدىڭ اراسىندا ەڭ ۇزدىك كورسەتكىش ميحايل كۋكۋشكينگە تيەسىلى. 2012 جىلى ول ءتورتىنشى اينالىمعا دەيىن جەتتى. باستاپقى باسەكەلەردە يسپانيالىق گيلەرمو گارسيا لوپەس, سەربيالىق ۆيكتور ترويتسكي جانە فرانتسيالىق گاەل ءمونفيستى ۇتقانىمەن, وتانداسىمىزدىڭ ۇلىبريتانيانىڭ ايگىلى تەننيسشىسى ەندي ماررەيگە ءالى جەتپەدى. ءدال سول ءتۋرنيردى اندرەي گولۋبەۆ تە كەرەمەت باستاپ ەدى. تۇساۋكەسەر كەزدەسۋىندە ول رەسەيدىڭ اتاقتى ويىنشىسى ميحايل يۋجنىيدىڭ ءوزىن جولىنان ىعىستىردى. بىراق كەلەسى كەزەڭدە فرانتسيالىق ريشار گاسكەگە ەسە جىبەردى. سول سەكىلدى قىزدارىمىز دا بۇل جارىستى «قاتىرمادى». ءار جىلدارى گالينا ۆوسكوبوەۆا (2009, 2012), ياروسلاۆا شۆەدوۆا (2015), زارينا دياس (2015, 2016, 2020), يۋليا پۋتينتسەۆا (2016, 2020) جانە ەلەنا رىباكينا (2020) ءۇشىنشى اينالىمدا ونەر كورسەتتى. الايدا ودان ارىگە ەشقايسى بارا المادى.
اۋستراليانىڭ اشىق بىرىنشىلىگى بۇل جولى دا تارتىستى بولاتىنىنا ەش كۇمانىمىز جوق. ايتۋلى جارىستا قازاقستاننىڭ التى تەننيسشىسى ونەر كورسەتەدى. ولار – ەلەنا رىباكينا, يۋليا پۋتينتسەۆا, زارينا دياس, ياروسلاۆا شۆەدوۆا, الەكساندر بۋبليك جانە ميحايل كۋكۋشكين. وسى «ۇلكەن دۋلىعا» تۋرنيرىندە جەرلەستەرىمىزگە ۇلكەن تابىس تىلەيمىز.