مەملەكەت باسشىسى قاسىم-جومارت توقاەۆ «تاۋەلسىزدىك بارىنەن قىمبات» اتتى «Egemen Qazaqstan» گازەتىنە جاريالانعان ماقالاسىندا سوڭعى كەزدە قازاقستاندىقتاردىڭ ەل ومىرىنە بەلسەندى ارالاسۋعا, شەشىم قابىلداۋ ۇدەرىسىنە قاتىسۋعا ىنتاسى ارتىپ كەلە جاتقانىن كەڭىنەن ايتىپ ءوتتى, - دەپ حابارلايدى Egemen.kz
«مەنىڭ «حالىق ۇنىنە قۇلاق اساتىن مەملەكەت» تۇجىرىمدامام جانە ۇلتتىق قوعامدىق سەنىم كەڭەسى – وسى سۇرانىسقا تىكەلەي جاۋاپ. ونى ورداباسىداعى, كۇلتوبەدەگى, ۇلىتاۋداعى ۇلى جيىنداردىڭ زاماناۋي ۇلگىسى دەۋگە بولادى. ءبىز قازاقتىڭ قانىنا سىڭگەن قاسيەت – كەلەلى ءىستى اقىلداسىپ بىرگە شەشۋ ءداستۇرىن جالعاستىرا بەرەمىز. بۇل باستامالار ازاماتتىق قوعامدى دامىتۋعا نەگىز بولادى. قازىرگى شارالار اياق استىنان ماجبۇرلىكتەن قولعا الىنعان جوق. ول – ەلىمىزدى دەموكراتيالاندىرۋعا, ساياسي جۇيەنى جاڭعىرتۋعا باعىتتالعان ساياساتتىڭ جەمىسى», - دەيدى پرەزيدەنت.
وسى تۇرعىدا پرەزيدەنت ساياسي رەفورما ءبىر كۇننىڭ نەمەسە ءبىر جىلدىڭ شارۋاسى ەمەس ەكەنىن جانە ەل ىرگەسىن شايقالتپاي, بەرەكە-بىرلىگىن بۇزباي, بايىپپەن جانە بىرتىندەپ ىسكە اسىرۋىمىز كەرەكتىگىن باسا ايتتى.
«بىراق, رەفورمانى سوزا بەرۋگە دە بولمايدى. بيلىك حالىقتىڭ الدىنداعى ءوز جاۋاپكەرشىلىگىن سەزىنگەنى ءجون. سول سەبەپتى ءبىز اۋىل جانە كەنت اكىمدەرىن سايلاۋعا كوشەمىز. وسى ارقىلى ەڭ تومەنگى دەڭگەيدەن باستاپ جەرگىلىكتى ءوزىن ءوزى باسقارۋ جۇيەسىن نىعايتامىز. بۇل قادام وزەكتى ماسەلەلەردى تۇرعىندار مەن جەرگىلىكتى بيلىكتىڭ بىرلەسىپ شەشۋى ءۇشىن قاجەت. سودان كەيىن اۋدان اكىمدەرىن سايلايمىز. جاڭا جۇيە ءوزىنىڭ تيىمدىلىگىن كورسەتسە, بۇدان دا جوعارى دەڭگەيدەگى اكىمدەردى سايلايتىن بولامىز. بىراق, ساياسي جاڭعىرۋ بارىسىندا اسىعىستىققا بوي الدىرۋعا جانە جالاڭ ۇرانعا ەرىپ, مەملەكەتتىك جۇيەنى داعدارىسقا ۇشىراتۋعا بولمايدى. ءبىر ساتتە بارلىعىن تۇبىرىمەن وزگەرتۋ نەگە اكەپ سوقتىراتىنىن كەيبىر ەلدەردىڭ بۇگىنگى احۋالىنان كورىپ وتىرمىز», - دەيدى مەملەكەت باسشىسى.
ەل پرەزيدەنتى قاسىم-جومارت توقاەۆ ەلىمىزدە, ەڭ الدىمەن, ادامنىڭ قۇقىعىن تولىعىمەن ساقتاۋعا نەگىزدەلگەن زاڭ مەن ءتارتىپ بولۋى كەرەكتىگىن, ايتپەسە, انارحيا مەن جۇگەنسىزدىك جاقسىلىققا اپارمايتىنىن العا تارتادى.