قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا ەلىمىزگە بەلگىلى مادەنيەت قايراتكەرلەرى «مەنىڭ تۋىم. مەنىڭ وتانىم!» چەللەندجىنە قولداۋ ءبىلدىردى. اكتسياعا قولداۋ رەتىندە قر ەڭبەك سىڭىرگەن ءارتىسى مايرا ءىلياسوۆا, بەلگىلى قازاق وپەرا ءانشىسى نۇرجامال ۇسەنباەۆا, تانىمال كينو جانە تەاتر اكتەرى ەرىك جولجاقسىنوۆ بارشا قازاقستاندىقتاردى تاۋەلسىزدىك كۇنىمەن قۇتتىقتادى, دەپ حابارلايدى Egemen.kz.
"16 جەلتوقسان - ەلىمىزدىڭ تاۋەلسىزدىك مەرەكەسى قۇتتى بولسىن. ەلىمىزدىڭ تۇعىرى بيىك, اسپانى اشىق بولىپ, كوك بايراعى جەلبىرەي بەرسىن. شاڭىراقتارىڭىزدان ءان ۇزىلمەسىن. قازاقتىڭ مول داستارحانى ەشقاشان جينالماسىن. كىشكەنتاي سابيلەرىمىز, اق ورامال تاعىنعان اياۋلى انالارىمىز, ارداقتى اتالارىمىز امان بولسىن", - دەدى مايرا ءىلياسوۆا.
"حالقىمىز عاسىرلار بويى اڭساعان تاۋەلسىزدىگىمىزگە بيىل 29 جىل. ەلىمىزدىڭ كوك بايراعى بەيبىت اسپان استىندا جەلبىرەپ, الەمگە تانىلا بەرسىن. ءار وتباسىنا تاتۋلىق پەن ىرىس-بەرەكە تىلەيمىن. وتانىمىزدىڭ يگىلىگى جولىندا جارقىن بولاشاق, جاڭا تابىستار تىلەيمىن", - دەدى نۇرجامال ۇسەنباەۆا.
"قىمباتتى وتانداستار, بارشا قازاقستاندىقتار! تاۋەلسىزدىك مەرەكەسى قۇتتى بولسىن! ەلىمىز امان, جۇرتىمىز تىنىش بولسىن! تاۋەلسىزدىك تۇعىرى بيىك بولىپ, ماڭدايىمىزعا ماڭگىلىككە بۇيىرسىن", - دەدى تانىمال ەسترادا ءانشىسى التىناي جوراباەۆا.
"تاۋەلسىزدىك ەلىمىزگە باق-بەرەكە, جەتىستىك اكەلسىن. تاۋەلسىزدىگىمىزدى كوزىمىزدىڭ قاراشىعىنداي ساقتاي بىلەيىك. مەرەكە قۇتتى بولسىن!" - دەدى تانىمال كينو جانە تەاتر اكتەرى ەرىك جولجاقسىنوۆ.
"اتا-بابالارىمىز ارمانداپ كۇتكەن تاۋەلسىز ەل بولۋ مارتەبەسىن كورۋ بۇگىنگى ۇرپاق ءۇشىن زور باقىت. وسى قۋانىشىمىز قۇتتى, باقىتىمىز باياندى بولعاي! تاۋەلسىزدىگىمىز تۇعىرلى بولسىن!" - دەدى ءانشى رۇستەم جۇگىنىسوۆ.
بۇعان دەيىن ەلوردا تۇرعىندارى «مەنىڭ تۋىم. مەنىڭ وتانىم!» اكتسياسىن قولداپ, بالكوندارىنا تۋ ىلگەنى حابارلانعان بولاتىن. چەللەندجگە ونداعان ۇەۇ جانە باسقا ۇيىمدار قاتىسۋدا. وسىلايشا, قالا تۇرعىندارى قازاقستاندىقتاردى كەلە جاتقان مەرەكەلەرىمەن قۇتتىقتاپ, اكتسيانى قولداۋعا شاقىردى. سونداي-اق #مەنىڭتۋىم #مەنىڭتۋىممەنىڭوتانىم #مويفلاگمويارودينا #تسۆەتموەيرودينى #بىزدىڭورتاقمەرەكە #ناشوبششيپرازدنيك حەشتەگىمەن قازاقستان رەسپۋبليكاسىنىڭ تۋىمەن بايلانىستى جازبالار, فوتوسۋرەتتەر, ۆيدەو مەن سيۋجەتتەر جاريالاۋ ارقىلى تۇرعىندار اكتسياعا بەلسەندى قاتىسا الادى.