اقوردا رەزيدەنتسياسىندا بىرقاتار مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى, دەپ حابارلايدى Egemen.kz.
سەنىم گراموتالارىن فرانتسيا رەسپۋبليكاسىنىڭ ەلشىسى ديدە كانەسس, ۋكراينانىڭ ەلشىسى پەتر ۆرۋبلەۆسكي, بۇۇ-نىڭ قازاقستان رەسپۋبليكاسىنداعى تۇراقتى ۇيلەستىرۋشىسى ميكاەللا فريبەرگ-ستوري, سولتۇستىك ماكەدونيا رەسپۋبليكاسىنىڭ ەلشىسى سالي ليماني, پاكىستان يسلام رەسپۋبليكاسىنىڭ ەلشىسى سادجاد احمەد سيحار تابىستادى.
قاسىم-جومارت توقاەۆ بارلىق ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ, ولارعا ەكىجاقتى قاتىناستاردى ودان ءارى نىعايتۋدا ساتتىلىك تىلەدى.
مەملەكەت باسشىسى شەتەلدىك ەلشىلەردىڭ الدىندا سويلەگەن سوزىندە بۇگىنگى سالتاناتتى ءراسىم بۇكىل الەم قاۋىمداستىعى ءۇشىن بۇرىن-سوڭدى بولماعان قيىندىقتار كەزىندە ءوتىپ جاتقانىن اتاپ ءوتتى. ونىڭ ايتۋىنشا, ىنتىماقتاستىق پەن ءتيىمدى حالىقارالىق ىقپالداستىق ءبىزدىڭ حالىقتارىمىزدى كەز-كەلگەن قاۋىپ-قاتەرگە قارسى تۇرا الاتىنداي قاۋقارلى ەتۋدىڭ كىلتى. پرەزيدەنتتىڭ پىكىرىنشە, ءبىزدىڭ ەلىمىز اتالعان مەملەكەتتەرمەن جانە بۇۇ جۇيەسىمەن سەرىكتەستىكتى قازاقستاننىڭ سىرتقى ساياساتىنىڭ اجىراماس بولىگى رەتىندە قاراستىرادى.
قاسىم-جومارت توقاەۆ قازاقستاننىڭ ەۋروپالىق وداقتاعى باستى سەرىكتەسى جانە ەلىمىزدىڭ بەسىنشى ينۆەستورى فرانتسيامەن ستراتەگيالىق قاتىناستاردى دامىتۋعا ەرەكشە ءمان بەرەتىنىن ايتتى. تاۋ-كەن, مۇناي-گاز, كولىك تەحنيكاسى, قۇرىلىس ماتەريالدارى ءوندىرىسى, حيميا جانە تاماق ونەركاسىبى سياقتى سالالار بويىنشا ىنتىماقتاستىق تابىستى دامىپ كەلەدى. سونىمەن قاتار اۋىل شارۋاشىلىعى, جاڭارتىلعان ەنەرگيا جانە تسيفرلىق تەحنولوگيالار, مادەنيەت, ءبىلىم, تۋريزم سالالارىنداعى ءوزارا ءتيىمدى ىنتىماقتاستىقتىڭ زور الەۋەتىن پايدالانۋعا بولادى.
– قازاقستان تاراپى فرانتسۋز كاسىپكەرلەرىنە ەلىمىزدەگى پايدالى جوبالارعا ينۆەستيتسيا سالۋ ءۇشىن جەكەلەگەن تاسىلدەر ۇسىنۋعا دايىن, – دەدى قاسىم-جومارت توقاەۆ.
پەتر ۆرۋبلەۆسكيدى قابىلداعان پرەزيدەنت ەكى ەل اراسىنداعى ءداستۇرلى دوستىق بايلانىستاردى ودان ءارى نىعايتۋ جانە ۋكراينامەن كوپجاقتى ىنتىماقتاستىقتى ارتتىرۋ قازاقستان ءۇشىن وتە ماڭىزدى ەكەنىن ايتتى.
– ءبىزدىڭ ەكىجاقتى قاتىناستارىمىز تەرەڭ تاريحي بايلانىستارعا نەگىزدەلگەن. ال قازاقستانداعى ۋكراين دياسپوراسى ءبىزدىڭ حالىقتارىمىزدىڭ اراسىن «التىن كوپىر» رەتىندە بايلانىستىرادى. بۇگىندە ءبىزدىڭ كاسىپورىندار ءارتۇرلى سالادا ىنتىماقتاسا جۇمىس ىستەۋدە. ەكى ەلدە دە جۇرگىزىلىپ جاتقان ماڭىزدى ترانسفورماتسيالىق رەفورمالار ساياسي, ساۋدا-ينۆەستيتسيالىق, مادەني جانە حالىقتار اراسىنداعى بايلانىستاردىڭ ودان ءارى نىعايا تۇسۋىنە سەپتىگىن تيگىزەدى دەپ سەنەمىن, – دەدى مەملەكەت باسشىسى.
ميكاەللا فريبەرگ-ستوريمەن اڭگىمەلەسۋ بارىسىندا قاسىم-جومارت توقاەۆ قازاقستاننىڭ بۇۇ جارعىسىنا نەگىزدەلگەن ينكليۋزيۆتى كوپجاقتى ساياساتقا بەرىك بولىپ قالا بەرەتىنىن جەتكىزدى.
– بۇۇ جۇيەسىمەن جانە ونىڭ شەڭبەرىندەگى سەرىكتەستىگىمىز ايتارلىقتاي ناتيجەلى بولدى. سوڭعى وتىز جىلدا قازاقستان بۇۇ-نىڭ بارلىق نەگىزگى ورگاندارىنا, ونىڭ ىشىندە قاۋىپسىزدىك كەڭەسىنە قاتىسىپ, بىرقاتار باسىم مىندەتتەردى ورىندادى. ورتالىق ازيا مەن اۋعانستانداعى تۇراقتى دامۋدىڭ 2030 جىلعا دەيىنگى كۇن ءتارتىبىن ءتيىمدى ۇيلەستىرۋ ءۇشىن ءبىز الماتىدا بۇۇ-نىڭ ايماقتىق ورتالىعىن قۇرۋعا نيەتتىمىز, – دەدى قازاقستان پرەزيدەنتى.
مەملەكەت باسشىسى سولتۇستىك ماكەدونيا رەسپۋبليكاسىن شىعىس ەۋروپا مەن بالكانداعى قازاقستاننىڭ ماڭىزدى سەرىكتەسى رەتىندە قاراستىراتىنىن اتاپ ءوتتى.
– ءبىزدىڭ ەلىمىزدە ءارتۇرلى ەتنيكالىق جانە ءدىني توپتار ءومىر سۇرەدى. بۇل ءبىزدىڭ مەملەكەتتەرىمىزدىڭ اراسىنداعى ورتاق ۇقساستىق. وسىنداي ەرەكشەلىكتەر ەلدەرىمىزدى نىعايتادى. ءسىزدىڭ ەلىڭىزبەن ساياسي جانە ساۋدا-ەكونوميكالىق ىنتىماقتاستىقتى كەڭەيتۋگە باس ءمان بەرەمىز, – دەدى قاسىم-جومارت توقاەۆ.
سادجاد احمeد سيحاردى قابىلداعان مەملەكەت باسشىسى پاكىستاننىڭ ازياداعى نەگىزگى سەرىكتەستەرىمىزدىڭ ءبىرى ەكەنىن ايتتى. ەكى ەل اراسىندا ساياسي جانە ەكونوميكالىق تۇرعىدان مازمۇندى ديالوگقا باعىتتالعان بەرىك سەرىكتەستىك ورناعان.
– COVID-19 ىندەتىنىڭ كەرى اسەرىنە قاراماستان, ەكىجاقتى ساۋدا-ساتتىق ارتىپ كەلەدى. دەگەنمەن, ەلدەرىمىز اراسىنداعى كولىك قاتىناسىنىڭ ناشارلىعىنان ءبىز ءوز مۇمكىندىگىمىزدى تولىق پايدالانا الماي وتىرمىز. وسىعان بايلانىستى ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيا سەرىكتەستىكتىڭ كوكجيەگىن كەڭەيتەدى دەپ ۇمىتتەنەمىز. بۇۇ, يسلام ىنتىماقتاستىعى ۇيىمى جانە شانحاي ىنتىماقتاستىق ۇيىمى اياسىنداعى وڭ ىقپالداستىق ورتاق مۇددەلەرىمىزگە قىزمەت ەتەدى, – دەدى پرەزيدەنت.
كەزدەسۋ ساڭىندا قاسىم-جومارت توقاەۆ ەلشىلەردى كەلە جاتقان جاڭا جىلمەن قۇتتىقتاپ, ولاردىڭ مەملەكەت باسشىلارىنا جۇرەكجاردى سالەمىن جولدادى.