ەلباسى بارشا قازاقستاندىقتى ەلىمىزدىڭ باستى مەرەكەسى – تاۋەلسىزدىك كۇنىمەن قۇتتىقتادى, دەپ حابارلايدى Egemen.kz.
– وسى جىلدار ىشىندە قازاقستان الدىنا اۋقىمدى مىندەتتەر قويىپ, بيىك بەلەستەردى باعىندىردى. ءبىز بابالارىمىزدىڭ عاسىرلار بويى اڭساعان ارمانىن ورىنداپ, ەلىمىزدىڭ ۇلى تاريحىن جالعاستىرىپ جاتىرمىز. ەلدىگىمىزدى نىعايتىپ, الەمدىك قوعامداستىق مويىنداعان ىرگەلى مەملەكەتكە اينالدىق, – دەدى قازاقستاننىڭ تۇڭعىش پرەزيدەنتى.
سالتاناتتى شارا بارىسىندا نۇرسۇلتان نازارباەۆ قازاقستان رەسپۋبليكاسىنىڭ پرەمەر-ءمينيسترى ا.مامينگە, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كومەكشىسى د.اقىشەۆقا, الماتى وبلىسىنىڭ اكىمى ا.باتالوۆقا, مەملەكەتتىك كۇزەت قىزمەتى باستىعىنىڭ ورىنباسارى – ايرىقشا ماقساتتاعى كۇشتەردىڭ قولباسشىسى ا.اشىمبەك ۇلىنا, «بۇركىت» مەملەكەتتىك اۆياكومپانياسى» رەسپۋبليكالىق مەملەكەتتىك كاسىپورنىنىڭ ديرەكتورى ا.دزيۋباعا, «Mabetex Group» كومپانياسىنىڭ نەگىزىن قالاۋشى ب.پاكولليگە, قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعى باسشىسىنىڭ ورىنباسارى س.سەيتەنوۆكە مەملەكەتتىك ناگرادالار تاپسىردى.
– قازاقستاننىڭ وركەندەۋى مەن ەل يگىلىگى – سىزدەر ءۇشىن ەڭ ماڭىزدى دۇنيە. بۇل ماراپاتتار – ەل دامۋىنا سىڭگەن ەرەن ەڭبەكتىڭ جەمىسى. بارشاڭىزدى وسى جوعارى مەملەكەتتىك ناگرادالارمەن شىن جۇرەكتەن قۇتتىقتايمىن. مىقتى دەنساۋلىق, باق-بەرەكە مەن تابىس تىلەيمىن. تاۋەلسىزدىگىمىز تۇعىرلى بولىپ, مەملەكەتىمىز وركەندەي بەرسىن, – دەدى نۇرسۇلتان نازارباەۆ.