مەملەكەت باسشىسى جولداۋدا جاڭا ەكونوميكالىق باعدار كەرەكتىگىن جانە ماڭىزدى رەفورمالىق باعدارلامالار ازىرلەۋ قاجەت ەكەنىن ايتتى. وسىعان بايلانىستى داۋرەن ادىلبەكوۆتىڭ توراعالىعىمەن وتكەن ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق ءوسۋدى قالپىنا كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى, دەپ حابارلايدى Egemen.kz.
بۇل زاڭ جوباسى ەكونوميكا سالاسىن, سونىڭ ىشىندە پاندەميادان زارداپ شەككەن باعىتتاردى دامىتۋعا ىقپال ەتەدى. سول ارقىلى ەل ەكونوميكاسىنىڭ ءوسۋىن جەدەل جانە ءتيىمدى تۇردە قالپىنا كەلتىرۋ كوزدەلىپ وتىر.
«زاڭ جوباسى قابىلدانسا, حالىقتىڭ باسپانامەن قامتۋ, ءبىلىم الۋ سالالارى بويىنشا الەۋمەتتىك-ەكونوميكالىق جاعدايى جاقسارادى دەپ كۇتىلۋدە. سەبەبى, زاڭعا قول قويىلعاننان كەيىن جوعارى ءبىلىم الۋ ءۇشىن مەملەكەتتىك ءبىلىم كرەديتتەرى بەرىلە باستايدى. سونداي-اق كوپبالالى, تولىق ەمەس جانە مۇگەدەك بالا تاربيەلەپ وتىرعان وتباسىلارعا ارنالعان وقۋعا قابىلداۋ كۆوتاسى بەلگىلەنەدى. ازىق-ت ۇلىك قاۋىپسىزدىگىن قامتاماسىز ەتۋ جانە باعانىڭ نەگىزسىز قىمباتتاۋىنا جول بەرمەۋ ءۇشىن كوتەرمە-ءبولۋ ورتالىقتارىنىڭ قۇرىلىسى بويىنشا دا نورمالار بەكىتىلەدى», – دەدى سەنات دەپۋتاتى ەدىل مامىتبەكوۆ.
سونىمەن قاتار وتىرىس بارىسىندا سەناتورلار پارلامەنت دەپۋتاتتارى باستاماشى بولعان «قازاقستان رەسپۋبليكاسىنىڭ سۋ كودەكسىنە جەرگىلىكتى وكىلدى, ورتالىق جانە جەرگىلىكتى اتقارۋشى ورگاندار اراسىندا اۋىزسۋمەن جابدىقتاۋدى سۋبسيديالاۋ جونىندەگى وكىلەتتىكتەردىڭ اراجىگىن اجىراتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى.
زاڭ جوباسى اۋىلدىق جەرلەردى اۋىزسۋمەن قامتاماسىز ەتۋ جۇمىستارىن وڭتايلاندىرۋعا, جاڭادان سالىنعان اۋىزسۋمەن جابدىقتاۋ جۇيەلەرىن جەڭىلدىكتى نىساندار تىزىمىنە ەنگىزۋ ۇدەرىسىن تەزدەتۋگە جانە اۋىلدىق جەرلەردەگى حالىقتى اۋىزسۋمەن جابدىقتاۋ قىزمەتىنىڭ باعاسىن تومەندەتۋگە ارنالعان.
«زاڭ جوباسىندا ۇسىنىلعانداي, ءار ايماقتاعى سۋمەن جابدىقتاۋ جۇيەلەرىنىڭ ءتىزىمىن بەكىتۋ قۇزىرەتىن جەرگىلىكتى دەڭگەيگە بەرۋ وڭىرلەردىڭ اۋىزسۋمەن جابدىقتاۋعا ارنالعان سۋبسيديالاردى الۋىن تەزدەتەدى. سونداي-اق بۇل جەرگىلىكتى وكىلدى ورگاندارعا ءوڭىردىڭ الەۋمەتتىك-ەكونوميكالىق دامۋىن جانە سۋمەن قامتاماسىز ەتۋ قىزمەتىنىڭ تاريفتەرىن ەسكەرە وتىرىپ, اۋىزسۋدىڭ 1 تەكشە مەترى ءۇشىن وتەماقى كولەمىن وزدەرى انىقتاۋعا مۇمكىندىك بەرەدى», – دەدى سەناتور ءلاززات رىسبەكوۆا.
مۇنداي ستاندارتتار اكىمدىكتەرگە اۋىزسۋمەن جابدىقتاۋ جۇيەسىن مەملەكەتتىك سۋبسيديالاۋدىڭ بارلىق شارتتارىن ساقتاي وتىرىپ, قوسىمشا سۋبسيديالاردىڭ ەسەبىنەن جاڭا سۋمەن جابدىقتاۋ نىساندارىنىڭ سانىڭ ءوز بەتىنشە كوبەيتۋگە مۇمكىندىك بەرەدى.