ەۋروپا وداعى مەن «شىعىس ارىپتەستىگى» ءسامميتى اياقتالدى. ونىڭ قورىتىندىسى بويىنشا, ۋكراينا ەۋروپا وداعىمەن قاۋىمداستىق قۇرۋ جونىندە كەلىسىمگە قول قويمادى. بۇل تۋرالى Rg.ru حابارلادى.
ءباسپاسوز كونفەرەنتسياسىندا ەۋروپالىق كەڭەستىڭ توراعاسى حەرمان ۆان رومپەي, ەۋروكوميسسيا باسشىسى جوزە مانۋەل بورروزۋ مەن ليتۆا پرەزيدەنتى داليا گريباۋسۋكايتە ءسامميتتى قورىتىندىلادى.
«ءبىرىنشى كەزەكتە, قوناقجايلىعى مەن ءسامميتتى ءساتتى وتكىزۋگە تىرىسقانى ءۇشىن داليا گريباۋسۋكايتەگە العىس بىلدىرگىم كەلەدى. سامميتكە ەۋروپا وداعى وكىلدەرى مەن «شىعىس ارىپتەستىگى» مۇشەلەرىنىڭ بەلسەندى قاتىسقانىن دا اتاپ وتكەن ءجون, – دەدى حەرمان ۆان رومپەي. – ەۋروپا وداعى – قارقىندى جوبا. بۇل بوس سوزدەر ەمەس. ەۋروپا وداعى جاقىن ساياسي بايلانىستارعا سەنەدى. بۇنىڭ دالەلى رەتىندە وداقتىڭ ازىربايجانمەن ۆيزالىق ءتارتىپتى جەڭىلدەتۋ جانە ۋكراينامەن ورتاق اۋە كەڭىستىگىن قۇرۋ جونىندەگى كەلىسىمدەرگە قول قويعانىن, سونداي-اق مولداۆيا جانە گرۋزيامەن قاۋىمداستىق قۇرۋ جونىندە كەلىسىمدەر دايىنداعانىن ايتا كەتۋگە بولادى».
ەۋروپالىق كەڭەستىڭ توراعاسى 2015 جىلى وتەتىن «شىعىس ارىپتەستىگى» ءسامميتىنىڭ ماقساتى دەموكراتيانى نىعايتىپ, ءتۇرلى دەڭگەيدە ىنتىماقتاستىق جۇرگىزۋ بولاتىنىن مالىمدەدى.
«وكىنىشكە وراي, ۋكراينا مەن ارمەنيا قول جەتكىزىلگەن كەلىسىمدەر قاتارىنا كىرمەدى, – دەدى حەرمان ۆان رومپەي. – الايدا, ءبىزدىڭ ۇسىنىسىمىز سول قالپىندا قالادى. باتىلدىق تانىتىپ, شەشىم قابىلدايتىن كەز كەلدى».
ايدار ورىسباەۆ.
دەرەككوز: Rg.ru