ەلوردامىزدا قاراشانىڭ 25-28 كۇندەرى ارالىعىندا وڭتۇستىك قازاقستان وبلىسىنىڭ «ءان-شاشۋىم وزىڭە, مەرەيلى استانام» اتتى مادەني كۇندەرى اياسىندا «وڭتۇستىك-تسيرك» مەكەمەسىنىڭ «الاقاي, بالاقاي» قويىلىمى ءوتتى.
«وڭتۇستىك-تسيرك» مەملەكەتتىك كوممۋنالدىق قازىنالىق كاسىپورنى تاۋەلسىزدىگىمىزدىڭ 20 جىلدىق مەرەيتويى قارساڭىندا 2011 جىلدىڭ 17 جەلتوقسان كۇنى اشىلدى. وسى مەرەكەلىك وقيعاعا وراي شىمكەنت قالاسىنا رەسەيدىڭ اتى اڭىزعا اينالعان يۋ. نيكۋلين اتىنداعى تسيركتىڭ جۇلدىزدارى ارنايى شاقىرۋمەن ونەر كورسەتكەن ەكەن. مەكەمەنىڭ العاشقى باسشىسى سۇلتان سرايىلوۆ بولاتىن. اشىلعان كۇننەن جۇمىسىن جۇيەلى تۇردە جۇرگىزىپ كەلە جاتقان تسيرك وسى ۋاقىت ارالىعىندا ءۇش ماۋسىمىن اشىپ, ءۇش باعدارلاما قويىلىمىن كورسەتىپ ۇلگەرگەن. ءاربىر جاڭا ماۋسىمدى وبلىس بويىنشا مۇمكىندىگى شەكتەۋلى مەكتەپ-ينتەرناتتارىنىڭ, بالالار ءۇيىنىڭ تاربيەلەنۋشىلەرى مەن الەۋمەتتىك از قامتىلعان وتباسىلاردان شىققان بۇلدىرشىندەرگە ارنالعان تەگىن قايىرىمدىلىق قويىلىممەن اشۋدى داستۇرگە اينالدىرعان.
ەشبىر تسيرك قويىلىمى يلليۋزياسىز وتپەيتىنى بەلگىلى. ناق وسى جانر بويىنشا سەرگەي جانە گۋزال مۇستافيندەر ونەر كورسەتتى. ەكىنشى بولىمدە بالالار اسىعا كۇتكەن ونەرپازدارمەن قاتار, جان-جانۋارلار دا ورتاعا شىقتى. قويىلىم سوڭىندا ولەگ كاساتكين جەتەكشىلىگىمەن اۋەدە ۇشقان ونەرپازدار كورەرمەننىڭ قوشەمەتىنە بولەندى. بارلىق قويىلىم بويى بۇلدىرشىندەردىڭ جۇرەگىنە بىردەن جول تاپقان ەرجيك جانە ماحا اتتى سايقىمازاقتار وزدەرىنىڭ كۇلكىلى ءىس-ارەكەتتەرىمەن باۋراپ الدى.
ەرلان شىڭعىسبەكوۆ, «وڭتۇستىك-تسيرك» مەملەكەتتىك كوممۋنالدىق قازىنالىق كاسىپورنىنىڭ باس ديرەكتورى مىندەتىن اتقارۋشى: «بۇگىنگى استانا قالاسىنا سىيلاپ وتىرعان باعدارلاما بالالاردىڭ جازعى دەمالىسىنا وراي «الاقاي, بالاقاي!» دەپ اتالعان ەدى. بۇدان بولەك, بۇگىندە 2 باعدارلاما تاعى بار. جالپى, تسيرككە مامان دايىنداۋ ماقساتىندا ج. ەلەبەكوۆ اتىنداعى ەسترادا-تسيرك كوللەدجىنىڭ ديرەكتورى ب. نۇسىپجانوۆامەن كەلىسسوزدەر جۇرگىزىپ, وڭتۇستىك وڭىرىندەگى تسيرككە قىزىعۋشىلىق تانىتقان 5 تالانتتى تالاپكەردى گرانتقا وقۋعا تۇسىرۋگە مۇرىندىق بولدىق. كەلىسىم بويىنشا بۇل ستۋدەنتتەر وقۋ بىتىرگەن سوڭ ءبىزدىڭ تسيركتە جۇمىسپەن قامتىلاتىن بولادى. بۇل ءىس-شارا 2014 جىلى دا جالعاسىن تابادى», – دەدى.
بۇل ۇجىمنىڭ ونەرپازدارى 2012 جىلى «ازيا جاڭعىرىعى», «شابىت» حالىقارالىق فەستيۆالدەرىنە, ال 2013 جىلى ۇلتتىق ارنا ۇيىمداستىرعان «جۇلدىزدى ءسات», «حابار» ارناسى ۇيىمداستىرعان «ايماقتار الامانى» تەلەجوبالارىنا قاتىسىپ, جۇلدەلى ورىندارعا يە بولعان. ءتاي-ءتاي باسىپ كەلە جاتقانىنا قاراماستان تسيرك ۇجىمى ەداۋىر ىستەردى تىندىرىپ جاتىر. بولاشاقتا تالاي-تالاي كورەرمەندى قۋانىشقا كەنەلتەتىنىنە كۇمان جوق.
نۇرزادا كۇمىسبەك,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى.
سۋرەتتى تۇسىرگەن
ەرلان وماروۆ.