تەرىسكەيدەن قارت قاراتاۋ تۇستىكتەگى اقباس الاتاۋمەن قولتىقتاسقان تۇسىنداعى جۋالى ءوڭىرىنىڭ تابيعاتى ەرەك, ادامدارى بولەك بولىپ كەلەتىنى ەل اراسىندا ەجەلدەن ايتىلىپ ءجۇر. باتىرلار مەن اقىندار مەكەنى دەپ ايدار تاعىلعان جۋالىدان كەشە عانا كۇندەي كۇركىرەگەن, داڭقى دۇركىرەگەن باتىر باۋكەڭدى, شىندىقتىڭ شىراقشىسىنا اينالعان شەرحان اعامىزدى ايتساق تا جەتكىلىكتى.
وسى تۇلعالار سالعان سارا جولدى جاقسىلىقپەن جالعاستىرىپ, كيەلى وڭىردە كىر جۋىپ, كىندىك كەسكەن, بالا بوپ قۇلدىراڭداپ, شىبىق ءمىنىپ شاپقىلاعان, ەسەيە كەلە ەڭسەلى ىستەرىمەن ەلگە تانىلعان ازاماتتار بارشىلىق. سولاردىڭ ءبىرى دە, بىرەگەيى عاني تىلەۋبەكوۆ دەر ەدىك. ول جۋالىدا دۇنيەگە كەلىپ, ارمان-مۇراتىن ارقالاپ مايتالمان مامان اتانعان, اۋعان سوعىسىندا وت پەن وقتىڭ ورتاسىندا ەرلىگىمەن تانىلعان, بۇگىندە ەلوردا تورىندە ەڭبەگىمەن ەلدىڭ ەلەۋلىسىنە اينالعان ازاماتتىڭ ءبىرى, ورنى بولەك ورنىقتى تۇلعالاردىڭ قاتارىندا.
جامبىل وبلىسى جۋالى اۋدانى كولتوعان اۋىلىندا وسكەن ءبىزدىڭ اڭگىمەمىزدىڭ كەيىپكەرى ۇيەلمەلى-سۇيەلمەلى سەگىز بالانىڭ تۇڭعىشى بولعاندىقتان ەرتە جاستان ەڭبەكپەن ەسەيىپ, تىرلىكپەن شىنىعىپ ءوستى. مۇرتى تەبىندەپ بوزبالا جاسقا جەتكەندە كوپتى كورگەن اكەسى وتەمىس اقساقال مەن اناسى زينا اپا اقىلداسا كەلە, تۇلا بويى تۇڭعىشتارىنىڭ ومىردە ىسىلىپ, ءبىلىمدى ازامات بولۋى ءۇشىن جامبىل قالاسىنداعى №12 مەكتەپكە وقۋعا جىبەرەدى. وسى مەكتەپتى ۇزدىك بىتىرگەن عاني استانامىز الماتىعا كەلىپ, ءوزى ماقسات ەتكەن زاڭگەر ماماندىعىن الۋ ءۇشىن جوعارى وقۋ ورنىنىڭ دايىندىق كۋرسىنا قابىلدانادى.
حالىقارالىق جاعداي ۋشىعىپ تۇرعان, دۇرلىكپەسى كوپ وتكەن عاسىردىڭ سەكسەنىنشى جىلدارىنىڭ باسىندا عاني وتەن ۇلىنا اسكەرگە شاقىرۋ قاعازى كەلەدى. اسكەر بولعاندا دا, كۇردەلى جاعدايدا تۇرعان اۋعانستانعا بارۋ ماسەلەسى قوزعالادى. باتىر باۋىرجان اتاسىنداي قولىنا قارۋ الىپ, اۋعانداعى سۇراپىل سوعىسقا اتتانعان عاني سول جىلدارى ءومىر مەن ءولىم اراسىنداعى الاساپىراندى ءبىر كىسىدەي-اق باسىنان وتكەرەدى.
ول كەزدە كەڭەس وكىمەتىنىڭ ويى – اۋعانستاندا ءوزارا تارتىسقا تۇسكەن رەسمي ۇكىمەت پەن وپپوزيتسياداعى مودجاحەدتەر اراسىنداعى سىلكىنىستەرگە ارالاسىپ, سول ەلدە تولىقتاي ساياسي باقىلاۋ جۇرگىزۋ بولاتىن. اقىرىندا اۋعان ەلىن باسقارىپ وتىرعان شاح حافيزۋللا ءاميندى الىپ تاستاپ, ورنىنا كۇش كورسەتە وتىرىپ بابراك كارمالدى وتىرعىزعانى, ءسويتىپ كەڭەس ساياساتى ول ەلدە ءوز يدەياسىن جۇزەگە اسىرعانى بەلگىلى. وسىلايشا سول كەزدەگى ءبىزدىڭ اسكەرلەر ۇزاق جىلدارعا سوزىلعان قارۋلى قاقتىعىستاردىڭ قاق ورتاسىندا قالا بەردى.
قۇرامىنا جاس بارلاۋشى رەتىندە عاني ەنگەن, اۋعانستانعا العاش اتتانعان اسكەردىڭ شاعىن لەگىن ەلدىڭ شەتكەرى ايماعىندا جاتقان الدەبىر پروۆينتسيانىڭ ماڭايىنا ورنالاستىرادى. عاني جاڭادان جاساقتالعان روتاداعى جالعىز قازاق ەكەن. كوممۋنيستىك رۋحتا, ەزىلگەن حالىققا ەركىندىك اپەرەمىز دەپ كەلگەن جاۋىنگەرلەر وسى پروۆينتسياعا ورىن تەپكەندە, جەرگىلىكتى جۇرت اۋەلگىدە وزدەرىن باسقىنشى رەتىندە قابىلداعانىن بايقايدى. ەلدەن اتتاناردا سانالارىنا سىڭىرگەن «قالىڭ جاۋدىڭ» قاراسى بۇل ماڭايدا كورىنبەيدى, ەكى جاق بوپ تەمىردەي قارۋلانىپ, شايقاسىپ جاتقان جۇرتشىلىق تاعى جوق. بار بىلەتىندەرى – ءبىر-بىرىمەن الاۋىز بولعان, تارسىلداتىپ وق اتىپ, يجىعىس ءتۇسىپ جاتقان جەرگىلىكتى تايپالار. جەڭىلگەن جاق قول جايىپ كەڭەس اسكەرلەرىنەن كومەك سۇراپ كەلىپ تۇرعاندارى. ءبىزدىڭ اسكەرلەردىڭ ۇستانىمى دا قىزىق – بۇگىن مىنا تايپاعا كومەكتەسسە, كەلەسى كۇنى قارسى جاققا بولىسادى. ارا-تۇرا بەيبىت ءومىر, مۇلگىگەن تىنىشتىق قايتا ورنايدى. مۇنداي كەزدە كەۋدەلەرىندە كۇش-جىگەر ب ۇلىقسىعان ءبىزدىڭ سولداتتار يت قۋىپ, ۇرىنارعا قارا تاپپاي دالا كەزىپ كەتەدى. سونداي ەكى قولى الدىنا سىيماي جۇرگەن كۇندەردىڭ بىرىندە اسكەري بورىشىن بىرگە وتەپ جاتقان ەفرەيتور جىگىتتىڭ اۆتوماتىمەن دالادا ويناپ جۇرگەن اۋعان بالالارىن شىرقىراتا قۋىپ جۇرگەنىن كورەدى. جاندارىن ساۋعالاپ ساي-سايعا تىعىلعان, ق ۇلىنداعان داۋىسى قۇلاقتى تۇندىرعان بالالاردى سوڭدارىنان ىزدەپ بارىپ, تاعى دا تيگىزبەي دىرىلداتىپ وق جاۋدىرىپ, زارە-قۇتتارىن الۋمەن بولادى. ەفرەيتور ءوزىنىڭ وسپادارسىز قىلىعىنا ءوزى ءماز, قارقىلداپ ك ۇلىپ, وق اتۋىن قويار ەمەس. كوز الدىندا بولىپ جاتقان تىلمەن ايتىپ جەتكىزە المايتىن سۇمدىق كورىنىسكە قاراپ تۇرعان عاني شىداي المايدى. ەفرەيتوردىڭ ارتىنان جەتىپ كەلىپ, اشۋ ۇستىندە قولىنداعى اۆتوماتتىڭ دۇمىمەن قاق ماڭدايدان ءبىر ۇرىپ, سۇلاتىپ سالادى. ءبىرازدان كەيىن ەسىن جيعان ەفرەيتور: «سەن جاۋ جاعىنا شىقتىڭ, سەن ساتقىنسىڭ» دەپ, ايعاي سالىپ, شتاب جاققا بەزەكتەي جونەلەدى.
سول-اق ەكەن, الگى ەفرەيتوردىڭ ارىزدانۋىمەن ۇزاققا سوزىلعان تەرگەۋ-تەكسەرۋ جۇمىستارى باستالىپ كەتەدى. اۋەلى كەڭەس اسكەرىنىڭ جاۋىنگەرىن قاساقانا ۇرىپ قۇلاتۋدىڭ ارتىندا قانداي ارام پيعىل جاتقانى تەكسەرىلەدى. كىشكەنتاي جەتكىنشەكتەرگە جانى اشىپ, بۇيرەگى بۇرىپ ءبۇيتىپ اراشا تۇسۋىندە نە گاپ بار؟ ارينە, اۋعان بالالارى دا, جاۋىنگەر عاني تىلەۋبەكوۆ تە مۇسىلمان, بۇل توتەنشە جاعدايدىڭ بار سەبەبى وسى! باسقا تۇك تە جوق! سوندىقتان تىلەۋبەكوۆتىڭ كوممۋنيستىك بۇلجىماس يدەيالارعا دەگەن مۇنداي تۇراقسىزدىعى سوعىس جاعدايىندا, بوتەن ەلدە, جاۋ مەملەكەتتە ۇلكەن قاۋىپ. تەكسەرۋشى شەندىلەر قارا اسپاندى ءتوندىرىپ, وسىنداي قاتاڭ تۇجىرىم جاسايدى.
ءسويتىپ تۇيمەدەيدەن تۇيەدەي پالە جاساپ, ءىس ناسىرعا شابادى. ناتيجەسىندە جاۋىنگەر تىلەۋبەكوۆتى ەلگە قايتارۋ ماسەلەسى قارالىپ, ودان ءارى ونىڭ ۇستىنەن اسكەري قىلمىستىق ءىس قوزعاۋ كەرەكتىگى ۇسىنىلادى. اڭگۇدىك جاۋىنگەردىڭ اپەرباقان ارەكەتىن توقتاتامىن دەپ عاني مىقتاپ تۇتىلعانىن ەندى تۇسىنەدى. امال جوق, كۇرەسەرگە دارمەن تاعى جوق, ىشتەي ءمۇجىلىپ, قينالىپ جۇرگەندە الماتىدان اتتاناردا العاشقى دايىندىق جاتتىعۋلارىنا جەتەكشىلىك ەتكەن كومانديرى وسى جاققا ىسساپارمەن كەلگەنىن ەستيدى. دەرەۋ ىزدەستىرىپ, شتابتىڭ جانىندا اڭدىپ تۇرىپ ول كىسىمەن جولىعۋدىڭ رەتىن تابادى. ءمان-جايدى كومانديرىنىڭ الدىندا بۇگە-شىگەسىنە دەيىن جايىپ سالادى. اسىقپاي تىڭداعان بايسالدى كوماندير وزگە ەلدە جۇرگەن سوڭ جەرگىلىكتى جۇرتتىڭ كەڭەس سولداتتارىن وگەيسىنە قابىلدايتىنىن, سوندىقتان ءاربىر قادامدى بايقاپ باسىپ, ساق ءجۇرۋ كەرەكتىگىن ەسكەرتەدى. ءوزىنىڭ باسقا دا ءبىرشاما اعالىق اقىل-كەڭەسىن بەرەدى. ءسوزىنىڭ سوڭىندا الگى بەيكۇنا بالالاردى باسىنعان باسبۇزارعا جازا قولداناتىنىن, ال تىلەۋبەكوۆتىڭ اسكەري بورىشىن ودان ءارى الاڭسىز جالعاستىرا بەرۋىنە بولاتىنىن ايتىپ, قۋانتىپ كەتەدى.
ارادا ەكى اي وتكەندە مۇنداعى جاۋىنگەرلىك بولىمشەنىڭ ورىن اۋىستىرۋى تۋرالى جوعارىدان بۇيرىق كەلەدى. ءبارى شۇعىل جينالا باستايدى. شاتىرلاردى جىعىپ, تەحنيكانى تيەپ, كەرەك-جاراقتى جيناستىرعان سوڭ سولداتتار قازداي ءتىزىلىپ ساپقا تۇرا قالادى. وسىنىڭ ءبارىن ۇيىمداستىرىپ جۇرگەن سەرجانت ءوزىنىڭ كومانديرىنە بولىمشە جولعا شىعۋعا ءازىر ەكەندىگىن تاقىلداپ بايان ەتەدى. باياناتىنىڭ سوڭىندا ورتالىقتان كەلىسىلگەن قوسىمشا جۇك كولىگىنىڭ جەتىسپەي قالۋىنا بايلانىستى ءبىراز زاتتاردى, ونىڭ ىشىندە سالماعى اۋىر قارۋ-جاراقتى, سناريادتاردى قالدىرىپ كەتۋگە تۋرا كەلەتىنىن جەتكىزەدى. كوماندير ءۇنسىز ويلانىپ قالادى, بەت الپەتىنەن ءبىر استىرتىن ارەكەتكە بارعالى تۇرعانى بايقالادى. ءبىر كەزدە ءتۇيىنى قيىن ەسەپتىڭ شەشىمىن تاپقانداي ىرجيادى دا, سەرجانتتى شەتكە شىعارىپ, كۇبىرلەپ تۇسىنىكسىز تاپسىرمالار بەرەدى. سويتسە, زىميان كوماندير جوعارى جاقتان ەكى اي بويى ەرىگىپ جاتتى دەگەندەي ەسكەرتۋ الىپ قالماس ءۇشىن ءبىر وقپەن ەكى قوياندى اتىپ الماق پيعىلدا اۋىر قىلمىسقا بارۋدى ۇيعارعان ەكەن. جاۋىنگەرلەرگە زەڭبىرەكتەرگە ارتىق-اۋىس سناريادتاردى وقتاۋدى جانە تۇرعىندارى تىنىش ۇيقىدا جاتقان قىشلاققا قاراي باعىتتاۋدى بۇيىرادى. ءبىر ساتتە ايلى اسپان استىنىڭ استاڭ-كەستەڭىن شىعارىپ, كوز الدارىندا بۇتىندەي ءبىر ەلدى مەكەننىڭ ك ۇلىن كوككە ۇشىرادى. ادامنىڭ ايۋاننان بەتەر مۇنداي ازعىندىعىنا دەنەسى قالشىلداپ, عانيدىڭ كوزىنەن جاس شىعىپ كەتەدى. كەزىندە جەر-كوككە سىيعىزباي «گۋمانيزمنىڭ ۇلگىسى» دەپ ماقتاعان, «بەي-ءبىتشىل» دەپ كوككە كوتەرگەن كەڭەس ارمياسىندا وسىنداي دا وپاسىزدىقتار, ادام سەنگىسىز سوراقىلىقتار بولعانىن ءبىز عاني تىلەۋبەكوۆتىڭ اڭگىمەسىنەن ەستىپ بىلدىك.
جاڭا ورىنعا جاقسىلاپ ورنالاسقان سوڭ بىردە كومانديرى اسا ماڭىزدى اسكەري وپەراتسيا جوسپارلانىپ جاتقانىن قۇپيالاپ, ەرەكشە دايىندىقتان وتكەن بىرەر جاۋىنگەردى الدىن-الا بارلاۋعا جىبەرمەكشى بولادى. ەرتەسىندە, ىشىندە عاني تىلەۋبەكوۆ بار, ءبىر توپ بارلاۋشىلار تاڭ قىلاڭ بەرە جولعا شىعادى. مۇمكىندىگىنشە توبە-قىرقانىڭ ىعىمەن, ساي-سالانىڭ تابانىمەن جاسىرىنىپ, بوي تاسالاپ ۇزاق جۇرىسەدى. كەزەكتى ءبىر قاراۋىل توبەگە ۇقساعان قىرقانىڭ تۇستىگىن اينالا بەرگەندە جان-جاقتان ىسىلداپ وق جاۋىپ كەتەدى. بارلاۋشىلار جاپا-تارماعاي جەرگە جابىسا قالادى. جاۋدىڭ توڭىرەكتى اينالدىرا وق جاۋدىرتىپ جاتقانىنان-اق ولار وزدەرىنىڭ قورشاۋدا قالعاندارىن سەزەدى. ەڭبەكتەپ, جاڭا عانا قاسىندا ەرىپ كەلە جاتقان جولداسىن يىقتان تۇرتسە – تۋرالاپ كەلگەن وق بەت الپەتىن وپىرىپ كەتىپتى. جاق سۇيەگى ىرسيعان, قىپ-قىزىل قان اتقاقتاعان جارتى بەت ادامعا قاراۋدىڭ ءوزى قورقىنىش ەكەن! ءار تۇستان وزگە دە جارالىلاردىڭ ىڭىرسىعان داۋىستارى شىعا باستايدى. ەس جيعاندارى دەرەۋ اۆتوماتتارىن ىڭعايلاپ, ولار دا قارسى جاققا بەي-بەرەكەت وق جاۋدىرۋمەن بولادى. شامالارى كەلگەنىنشە جاۋدى جاقىنداتپاي, قورعانۋمەن كەشتى باتىرادى. ءتۇن بولادى. ايتەۋىر ءتۇن بالاسىندا قارسى جاقتان شابۋىل جاسالا قويمايدى. تاڭ اتا سالىسىمەن جان-جاقتان تاعى دا تارسىلداپ اتىس باستالادى. كۇنى بويى ءبىرىن-ءبىرى اڭدىعان سول اتىسپەن ەكىنشى كۇن وتەدى. تالعاجاۋعا الىپ شىققان ازىن-اۋلاق تاماق تا تاۋسىلا باستايدى. كۇن شىجىعان ىستىق, شەيىت بولعان جولداستارىنىڭ مايىتتەرى بۇزىلىپ, جاعىمسىز ءيىس قولقانى قابادى. كۇش ازايادى, قالقيىپ بىرەر جاۋىنگەر عانا ءتىرى قالىپتى, وق-ءدارى دە تاۋسىلۋعا اينالادى. ەندىگىسى اڭدىعان جاۋدىڭ بارلاۋشىلاردىڭ امان قالعان شاعىن توبىن الماي تىنباسى شاكسىز ەدى. اپتاپ استىندا ءبارى قالجىراعان, عاني دا سىلىكپەسى شىعىپ شارشاعانىن, قۋات-كۇشىنىڭ سارقىلعانىن انىق سەزەدى. كوز الدىنا اۋعانعا اتتانىپ بارا جاتقانداعى تۋعان ەلى, تاۋمەن كومكەرىلگەن كوركەم كولتوعان اۋىلى كەلەدى. اتا-انا, باۋىرلارى, قۇربى-دوستارى ءبارى-ءبارى جانارىنىڭ الدىندا كينونىڭ لەنتاسىنداي زىمىراپ ءوتىپ جاتىر, ءوتىپ جاتىر. «اپىرماي, شىنىمەن-اق اتاسى بولەك جات ەلدە, بوتەن جەردە, ايدالاداعى ءبىر توبەنىڭ باسىندا سۇراۋسىز, كومۋسىز قالا بەرگەنىم بە؟» دەگەن وكىنىش جۇرەگىن شىمشىلايدى. امال قانشا, تاعدىردىڭ ماڭدايعا جازعانى سول بولسا, وعان يلانباسقا لاجىڭ قايسى! اۆتوماتىن قۇشاقتاپ, بارىنە دە كونىپ, بارىمەن قوشتاسىپ, قايداعى-جايداعى شىم-شىتىرىق وي قۇشاعىندا وتىرعاندا وزىمەن بىرگە الىپ جۇرەتىن شاعىن قالتا راديوسى ەسىنە تۇسەدى. قاپشىعىنان سونى شىعارىپ, قۇلاعىن بۇراي باستايدى. ءبىر ارنادا تۇسىنىكسىز تىلدە ءان ايتىلىپ جاتىر, ەندى بىرىندە اۋعان تىلىندە سۇحبات ءجۇرىپ جاتقان سىڭايلى. راديونىڭ قۇلاعىن تاعى ءبىر سىرت ەتىپ بۇراعاندا – جانىنا جاقىن قازاقشا ءان شىرقاي جونەلەدى. عاني سەلت ەتىپ, ءوز قۇلاعىنا ءوزى سەنبەي قالادى. راسىندا دا راديودان قازاقتىڭ كۇمىس كومەي ءانشىسى روزا رىمباەۆا «اتامەكەن» ءانىن اۋەلەتە شىرقاپ جاتىر ەكەن. «اينالدىم سەنى, اتامەكەن-اي» دەپ ءاننىڭ قايىرماسىنا كەلگەندە ءومىر مەن ءولىم ارباسقان جەردىڭ تۇبىندە, قان مايداننىڭ ورتاسىندا قورشاۋدا قالعان قازاق جاۋىنگەرىنىڭ كوزىنەن جاس ىرشىپ شىعادى. الگىندە عانا قيماستىقپەن ەسكە الىپ جاتقان تۋعان ەلى – قازاقستاننىڭ كوركەم كورىنىستەرى ءاننىڭ اۋەنىمەن قوسىلىپ, وزگەشە ءبىر جارقىن سۋرەتتەرمەن جالعاسا جونەلەدى. شەگىنەرگە جەر جوق, سۇم اجالعا مويىنسىنا وتىرىپ سول ارادا عاني وتەن ۇلى اللاعا ءمىناجات ەتەدى, اق جۇرەگىمەن تىلەك تىلەيدى. «ە, جاراتقان يەم, جانىمدى ەرتە مە, كەش پە الاتىنىڭدى انىق بىلەمىن. قاي كەزدە الساڭ دا ءوز قۇزىرىڭدا, تەك قانا تۋعان وتانىم قازاقستانىمنىڭ قاسيەتتى توپىراعىن باسۋدى, اتامەكەنىمدى ءبىر كورۋگە ءوزىڭ جار بولا كور» دەپ ىشتەي جالبارىنادى.
جاۋىنگەردىڭ تىلەگى جاراتقانعا جەتكەندەي, كەنەت تومەنگى جاقتان ىزۋ-قيقۋ اتىس باستالادى. تاسادان مويىن سوزىپ, بارلاپ قاراسا, و داريعا-اي دەسەڭشى, قارۋلاستارىن ىزدەپ شىققان جولداستارى كومەككە جەتكەن ەكەن!
عاني وسى وقيعالاردى ءسوز ەتكەندە جاۋ قولىنان قازا تاپقان تالاي بوزداقتاردى ەسىنە الىپ, اللا تاعالانىڭ جازۋىمەن امان قالعانىنا شۇكىرشىلىك ەتىپ قويادى. مىنا جالعاندا وتباسىڭنىڭ اماندىعىنا, وتاننىڭ تىنىشتىعىنا ەشنارسە جەتپەيتىنىن ۇنەمى عيبرات ەتىپ وتىرادى.
ەلىمىزدىڭ بولاشاعىنا قاتىستى اسا ماڭىزدى ساياسي شەشىمدەر قابىلداناتىن پرەزيدەنت اكىمشىلىگىندە ءبىز دە عاني وتەن ۇلىمەن ۇزاق جىلدار بويى ءازىل-قالجىڭىمىز جاراسىپ, قاتار قىزمەت جاساستىق. قاشاندا بايسالدى, سابىرلى, سەرگەك كوڭىلدى عاني ءىنىمىز سول جىلداردان بەرى اكىمشىلىكتىڭ بەلدى ءبىر ءبولىمىن باسقارىپ, كۇنى بۇگىنگە دەيىن ابىرويمەن قىزمەت اتقارىپ كەلەدى. عاني وتەن ۇلى شىن مانىندە ەلىمىزدىڭ تاۋەلسىزدىگىن نىعايتۋ ىسىنە, مەملەكەتتىلىگىمىزدى تەرەڭدەتۋگە بارىنشا كۇش-جىگەرىن سالىپ جۇرگەن قايراتكەر تۇلعانىڭ ءبىرى. باتىر مىنەزدى ادامنىڭ مايداندا دا, بەيبىت تىرلىكتە دە ءوزىنىڭ تۋرا جولىنان تايمايتىنى سەكىلدى, ول ءاردايىم ۇلت مۇددەسىنە, انا ءتىلىمىزدىڭ تاعدىرىنا قاتىستى كۇردەلى ماسەلەلەردە ءوزىنىڭ ناقتى ۇستانىمىنان اينىپ كورگەن ەمەس, قان مايداندا شىڭدالعان تاباندىلىعىنان تايقىپ كورگەن ەمەس. عاني تىلەۋبەكوۆتىڭ قازاقتىڭ قاراپايىم اۋىلىنان شىعىپ, مەملەكەتىمىزدىڭ استاناسىنا, ول جەردەگى اقوردامىزعا دەيىنگى ابىرويلى اسقاق جولى جاس ۇرپاققا قاشاندا ۇلگى-ونەگە.
اجال اۋزىندا ءجۇرىپ اردى ويلاعان قازاق جىگىتى تۋرالى قولعا قالام العاندا ويىمىزعا بىردەن قادىر مىرزا ءاليدىڭ جوعارىداعى تاقىرىپقا قويىلعان جالعىز جول ولەڭى ورالا كەتكەنى بار. وسىندايدا اتا-بابا اماناتىنا ادالدىق تانىتىپ, ات اۋىزدىعىمەن سۋ ىشكەن, ەر ەتىگىمەن سۋ كەشكەن قاندى مايدان مەن زوبالاڭ جىلدار, تار جول, تايعاق كەشۋدە ادامدىق قاسيەتىن جوعالتپاعان حالقىمىزدىڭ اسىل قاسيەتىنە سۇيسىنەسىڭ. بۇگىندە جورالى جۇرت رەتىندە كۇللى الەم مويىنداپ وتىرعان قازاق دەگەن حالىق, مىنەكي, وسى بولادى! ەرلىك پەن ەلدىك ۇشتاسقان ىزگى ءداستۇردى جالعاستىرىپ كەلە جاتقان سول حالىقتىڭ عاني تىلەۋبەكوۆتەي ۇرپاعى دا وسىنداي!
الىبەك اسقاروۆ,
جازۋشى, قازاقستاننىڭ ەڭبەك سىڭىرگەن قايراتكەرى