نازارباەۆ ۋنيۆەرسيتەتتىڭ عالىمدارى ەلوردادا تسيفرلاندىرۋ باعىتىنداعى ءىرى جوبانى جۇزەگە اسىرۋدا. جوبا بارىسىندا قالانىڭ ءار جەرىندە قاشىقتان تۇسىرە الاتىن بەينەكامەرالار قويۋ ارقىلى ءورت, ءتۇرلى تابيعي اپاتتار سىندى توتەنشە جاعدايلاردىڭ ءبارىن قازىرگىمەن سالىستىرعاندا الدەقايدا تەز انىقتاپ, وعان قارسى ەرتەرەك ارەكەت ەتۋگە بولادى. بۇل تۋرالى tengrinews.kz حابارلادى.
جوبامەن نازارباەۆ ۋنيۆەرسيتەتتىڭ اقىلدى جۇيەلەر مەن جاساندى ينتەللەكت ينستيتۋتىنىڭ ماماندارى پروفەسسور حۋسەين اتاكان ۆارولدىڭ جەتەكشىلىگىمەن شۇعىلدانۋدا.
– بۇل جوبانىڭ ماقساتى – الىس جەردە بولعان توتەنشە جاعدايلاردى, مىسالى ءورتتى, كولىك اپاتتارىن, تابيعي اپاتتاردى جانە باسقالارىن بارىنشا تەز انىقتاۋ. قالاداعى بيىك عيماراتتار كوپ اۋدانداردى, نە بولماسا قالتارىس جەرلەرى كوپ جەرلەردىڭ ءوزىن كورىپ, قاداعالاپ وتىرۋ قاۋىپسىزدىكتى قامتاماسىز ەتۋدە شەشۋشى ءرول اتقارادى. بەينەكامەرالار تج نەمەسە تابيعي اپات بولا قالعان جاعدايدا ونى تەز بايقاپ, اۆتوماتتى تۇردە بەلگى بەرەدى, سول ارقىلى ءورت سوندىرۋشىلەر مەن جەدەل جاردەمنىڭ, سونىمەن قاتار پوليتسيانىڭ جۇمىسىن وڭتايلاندىرادى. – دەيدى جوبانىڭ عىلىمي قىزمەتكەرى اقنۇر قاراباي.
قازىر عالىمدار قاشىقتان زوندتاۋ سپۋتنيكتەرى مەن ۇشقىشسىز باسقارىلاتىن قوندىرعىلاردىڭ كومەگىمەن تۇسىرىلگەن دەرەكتەر نەگىزىندە باس قالانىڭ تسيفرلى كوشىرمەسىن جاساۋدا. سول ارقىلى قالانىڭ بارلىق بولىكتەرىن ەگجەي-تەگجەيلى زەرتتەۋگە مۇمكىندىك تۋادى, جاساندى ينتەللەكت سونىڭ نەگىزىندە قاشىقتان تۇسىرەتىن بەينەكامەرالاردى ورناتۋ ءۇشىن ەلوردانىڭ بارلىق اۋداندارىن نەعۇرلىم كەڭىرەك قامتيتىن جەرلەردى انىقتايدى.
جاس عالىم ا.قارابايدىڭ ايتۋىنشا, نۇر-سۇلتاندى تۇگەل قامتۋ ءۇشىن جۇزدەگەن كامەرا ورناتۋدىڭ قاجەتى جوق. ەڭ ءتيىمدى دەگەن جەرلەرگە ورناتىلعان 5 كامەرانىڭ ءوزى قالا تەرريتورياسىنىڭ 30 پايىزىن قامتي الادى. سەبەبى, قاشىقتان تۇسىرەتىن كامەرانى ءتۇرلى باعىتقا بۇرىپ وتىرىپ ونىڭ ءتۇسىرىلىم اۋماعىن دا اناعۇرلىم كەڭەيتۋگە بولادى. عالىمدار نەعۇرلىم از كامەرامەن بارىنشا كەڭ اۋماقتى قامتۋعا تىرىسۋدا.
حالىقتىڭ ءومىرى مەن دەنساۋلىعىن ساقتاۋعا باعىتتالعان جوبا بولعاندىقتان ونى جۇزەگە اسىرۋ كەزىندە قاتەلەسۋگە بولمايتىنى تۇسىنىكتى. سول سەبەپتى عالىمدار ونى تەستىلەۋگە دە ەرەكشە ماڭىز بەرىپ وتىر.
– قالانىڭ 3D كارتاسىنىڭ مودەلىن پايدالانامىز. كامەرالار ونالاسقان جەرلەرگە وراي الىنعان بەينەماتەريال مەن ونىڭ ولشەمدەرى نەگىزىندە مودەلدىڭ پايدالانۋعا قانشالىقتى دايىن ەكەندىگى انىقتالادى, – دەيدى ا.قاراباي.
Tengrinews.kz حابارلاعانداي, ادەتتە مۇنداي جوبانى جۇزەگە اسىرۋ وتە قىمباتقا تۇسەدى ءارى كوپ ۋاقىتتى قاجەت ەتەدى. دەگەنمەن, نازارباەۆ ۋنيۆەرسيتەتتىڭ عالىمدارى الداعى جىلدىڭ العاشقى جارتىسىندا جوبانى تولىققاندى اياقتاۋدى جوسپارلاپ وتىر.