قازاقستان ەلشىسى ءالىم قيراباەۆتىڭ پولشا سەناتىنىڭ توراعاسى توماش گرودزكيمەن كەزدەسۋى ءوتتى, دەپ حابارلايدى Egemen.kz.
كەزدەسۋ بارىسىندا تاراپتار ەكىجاقتى قاتىناستاردىڭ, ونىڭ ىشىندە پارلامەنتارالىق ىنتىماقتاستىعىنىڭ قازىرگى جاعدايى مەن كەلەشەگىن تالقىلادى.
ەلشى سۇحباتتاسۋشىنىڭ نازارىنا قازاقستاندا جۇرگىزىلگەن قوعامدىق-ساياسي رەفورمالاردىڭ باسىمدىقتارى, سونداي-اق 2021 جىلدىڭ 10 قاڭتارىنا بەلگىلەنگەن پارلامەنت ءماجىلىسىنىڭ كەزەكتى سايلاۋىنا قاتىستى دايىندىقتار تۋرالى اقپارات ۇسىندى.
وتاندىق ديپلومات پرەزيدەنت قاسىم-جومارت توقاەۆتىڭ "جاڭا جاعدايداعى قازاقستان: ءىس-قيمىل كەزەڭى" جولداۋىنىڭ نەگىزگى باعىتتارىمەن تانىستىرىپ, ونىڭ سويلەگەن ءسوزىنىڭ پولياك تىلىنە اۋدارىلعان ءماتىنى بار كىتاپشاسىن تاپسىردى.
پولشا سەناتىنىڭ توراعاسى قازاقستان پرەزيدەنتى باستاعان رەفورمالار پروتسەسىن تولىق قولدايتىندىعىن ءبىلدىردى.
كەزدەسۋ سوڭىندا تاراپتار جان-جاقتى ىنتىماقتاستىقتى نىعايتۋعا باعىتتالعان بايلانىستاردى, سونىڭ ىشىندە ەكى ەل اراسىنداعى پارلامەنتارالىق ديالوگتى جالعاستىرۋعا ۋاعدالاستى.