ەلوردادا نوسەر كارىزى جۇيەسىنە زاڭسىز جالعانعان بايلامداردى انىقتاۋ جۇمىستارى جالعاسۋدا. Elorda Eco System كوممۋنالدىق كاسىپورنىنىڭ مالىمەتى بويىنشا, ماۋسىم ايىنان باستاپ نۇر-سۇلتاندا رۇقسات ەتىلمەگەن 169 زاڭسىز بايلام تابىلدى, دەپ حابارلايدى Egemen.kz.
"زاڭسىز بايلامداردى انىقتاۋ بويىنشا جۇمىس جۇرگىزىلۋدە. بۇگىنگى تاڭدا قالادا 200 مىڭ قۋما مەتردى قۇرايتىن 9 مىڭعا جۋىق قۇدىق تەكسەرىلدى. سونداي-اق 169 زاڭسىز جالعانعان بايلام انىقتالىپ, جويىلدى. 139 جەكە جانە زاڭدى تۇلعاعا ەسكەرتۋ جاسالىپ, 31-نە ايىپپۇل سالىندى", - دەلىنگەن حابارلامادا.
ماسەلەن, 7 قاراشادا ك.بايسەيىتوۆا كوشەسىندەگى جەكە جاتاقحانادان تۇرمىستىق كاناليزاتسيا جۇيەسىنىڭ (سەپتيك) نوسەر كارىزى جەلىلەرىنە زاڭسىز قوسىلعانى انىقتالدى. اباتتاندىرۋ ەرەجەلەرىن بۇزعانى ءۇشىن ءۇي يەسىنە 55 مىڭ تەڭگەدەن استام ايىپپۇل سالىندى.
قالادا تاسقىن سۋدىڭ الدىن الۋ شارالارى اياسىندا نوسەر كارىزى جەلىلەرى مەن ارىقتاردى كۇتىپ ۇستاۋ جۇمىستارى جۇرگىزىلۋدە.
ماۋسىمنان بەرى ەلوردادا 32 124 مەتر كوللەكتورلار, 3,5 مىڭ قۇدىق پەن نوسەر سۋىنىڭ سۇزگىلەرى, 27 549 قۋما مەتر ارىق جەلىلەرى تازارتىلدى.
سونداي-اق تازارتۋ قۇرىلعىلارى مەن سورعى ستانتسيالارىنىڭ 17 قابىلداۋ كارتاسى تازارتىلدى. 36 سورعى ستانتسياسىنا تەكسەرۋ جانە تازالاۋ جۇمىستارى جۇرگىزىلدى.
سونىمەن قاتار يمانباەۆ, سەيفۋللين, اباي, باراەۆ, تاشەنوۆ, اممان, ساۋران كوشەلەرى مەن بوگەنباي داڭعىلى بويىندا 67-دەن استام بىتەلىپ قالعان قۇدىق پەن جاڭبىرعا ارنالعان سۋعار انىقتالىپ, قالپىنا كەلتىرىلدى.
"كوشەدە اۆتوبۋس جولاعىن سۋ باسۋدىڭ الدىن الۋ ءۇشىن باراەۆ كوشەسى №16 ءۇي اۋماعىندا جاڭبىر سۋىنا ارنالعان قوسىمشا قۇدىقتار ورناتىلىپ, وسى ۋچاسكەدەگى نەگىزگى كوللەكتورعا جالعاۋ جۇمىستارى جۇرگىزىلدى. مامانداندىرىلعان حقكو اۋدانىندا 2000 مەترلىك بوگەت سالىندى. سارىارقا اۋدانىنىڭ اگروقالاشىق تۇرعىن الابىندا سۋاعارلار ورناتۋ بويىنشا جۇمىستار اياقتالدى - سۇمبە كوشەسىندە - 160 م د300, 5 قۇدىق ورناتىلدى", - دەپ حابارلادى Elorda Eco System.
سۋ قۇبىرلارىن رەتتەۋ جانە جوندەۋ جۇمىستارى جۇرگىزىلدى. بۇل جۇمىستار 60 مەترلىك ماگيسترالدى قامتىدى.