ءا.قاستەەۆ اتىنداعى مەملەكەتتىك ونەر مۇراجايى «جىگەر» مۇمكىندىگى شەكتەۋلى جانداردىڭ جاستار ۇيىمى» قوعامدىق بىرلەستىگىمەن بىرلەسىپ الماتى قالاسىنداعى ن.وستروۆسكي اتىنداعى №4 زاعيپ بالالارعا ارنالعان مەكتەپ-ينتەرناتى وقۋشىلارىنىڭ قاتىسۋىمەن ەلىمىزدە تۇڭعىش رەت ءمۇسىن كورمەسىنىڭ ينتەراكتيۆتى جوباسىن جۇزەگە اسىردى.
ءا.قاستەەۆ اتىنداعى مەملەكەتتىك ونەر مۇراجايى «جىگەر» مۇمكىندىگى شەكتەۋلى جانداردىڭ جاستار ۇيىمى» قوعامدىق بىرلەستىگىمەن بىرلەسىپ الماتى قالاسىنداعى ن.وستروۆسكي اتىنداعى №4 زاعيپ بالالارعا ارنالعان مەكتەپ-ينتەرناتى وقۋشىلارىنىڭ قاتىسۋىمەن ەلىمىزدە تۇڭعىش رەت ءمۇسىن كورمەسىنىڭ ينتەراكتيۆتى جوباسىن جۇزەگە اسىردى.
«قولعا سەزىلەتىن بەينەلەر» جوباسى – قازاقستان رەسپۋبليكاسىنىڭ تۇڭعىش پرەزيدەنتى قورىنىڭ ءىح رەسپۋبليكالىق الەۋمەتتىك يدەيالار مەن جوبالار جارمەڭكەسىنىڭ جەڭىمپازى.
بۇل شارانىڭ باستى مىندەتتەرىنىڭ ءبىرى − مۇمكىندىگى شەكتەۋلى جانداردىڭ ومىرىنە قوعامنىڭ نازارىن اۋدارتۋ.
قازاقستاندا زاعيپ جانداردى بەينەلەۋ ونەرىمەن تانىستىرۋعا كومەكتەسەتىن ارنايى باعدارلامانىڭ جوقتىعىن ەسكەرەر بولساق, مۇنداي يگى شارانىڭ قوعامىمىزدىڭ مۇمكىندىگى شەكتەۋلى مۇشەلەرىنە كەلتىرەر پايداسى مەن ومىرگە دەگەن قۇشتارلىعىن ارتتىرارى ءسوزسىز. كورمەگە قويىلاتىن ەكسپوزيتسيانى قاراپ شىعۋعا باسقا كەلۋشىلەرگە قاراعاندا ولاردىڭ كورۋ مۇمكىندىگى اسا شەكتەۋلى. مۇنى تابيعي شەكتەۋمەن عانا ەمەس, ەكسپوزيتسيالىق زاتتاردىڭ كوبىسى اينەكتەلگەن سورەلەرگە ورنالاستىرىلعاندىقتان دا «قولدان جاسالعان شەكتەۋلەر» قاتارى زاعيپ جاندارعا ءاردايىم كەدەرگى كەلتىرەتىن. كونە زاتتار وتە نازىك, وسال كەلەدى. ونىڭ ۇستىنە ەكسپوناتتاردىڭ كەيبىرى – زاعيپ جانداردىڭ قولى جەتپەيتىن كارتينالار مەن گرافيكالىق تۋىندىلار ەكەنى انىق. مىنە, وسىنداي قيىندىقتاردى بىرلەسىپ شەشۋ ماقساتىندا اتالمىش جوبا ەلىمىزدىڭ زاعيپ جاندارىنا جاڭا مۇمكىندىك تۋدىرۋ ءىسىن بەلسەندى تۇردە قولعا الىپ وتىر.
«قولعا سەزىلەتىن بەينەلەر» جوباسىنىڭ نەگىزگى يدەياسى – مۇمكىنشىلىگى شەكتەۋلى زاعيپ بالالاردى قازاقستاننىڭ مۇسىندىك تۋىندىلارىن دەنە تۇيسىگى ارقىلى قابىلداۋعا جانە ىسمەر زاعيپ جاندارعا ءمۇسىنساز ارقىلى وزدەرى سيپاپ تۇسىنگەن بۇيىمدارىنىڭ كەسكىنىن جاساۋعا, ءوز تۇسىنىگىندە قابىلداعان بەينەلەردى بەرە بىلۋگە تارتۋ ارقىلى ولاردىڭ ومىرىنە جاڭا سيپات ەنگىزۋ.
«شارانى وتكىزۋگە سۋرەتشىلەر ش.تولەش, پ.شوروحوۆ, ءا.جۇماباي جانە ب.بەيىلحاننىڭ شەبەرحانالارىنان مۇسىندىك تۋىندىلارى اكەلىپ قويىلدى. بۇل كورمەدەگى بارلىق ەكسپوناتتاردى قولمەن ۇستاۋعا, ولاردى جاساعان ماتەريالدارمەن جانە جاسالۋ تەحنيكاسىمەن تانىسۋعا بولادى. زاعيپ بالالاردىڭ ءمۇسىن الەمىمەن بايلانىسۋىنا جانە وزدەرىن شىعارماشىلىق جولدا كورسەتۋىنە مۇمكىندىك تۋدى», دەيدى اتالمىش جوبا مەن كورمەنىڭ جەتەكشىسى گۇلزيرا مولداشەۆا.
بالالاردىڭ جاساعان جۇمىستارى تۇپنۇسقا تۋىندىلارمەن قاتار ءا.قاستەەۆ اتىنداعى مەملەكەتتىك ونەر مۇراجايى كورمەسىنە قويىلىپ, كاتالوگقا ەنگىزىلەدى. كورمە 25 قاراشاعا دەيىن جالعاسىپ, ءوز كەلۋشىلەرىنە ەسىگىن ايقارا اشادى.
قانات ەسكەندىر,
«ەگەمەن قازاقستان».
الماتى.