الماتىدا كاسىپقوي بوكستان حالىقارالىق تۋرنير ءوتتى. «Nev Names» پەن «دارىن» پروموۋتەرلىك كومپانيالارى ۇيىمداستىرعان جارىستى تاماشالاۋ ءۇشىن ماسكەۋ وليمپياداسىنىڭ كۇمىس جۇلدەگەرى ۆيكتور دەميانەنكو, كسرو كۋبوگىنىڭ قولا جۇلدەگەرى بولات مانكەنوۆ, كوپتەگەن ءدۇبىرلى دودادا دارالانعان سەرىك ەشماعامبەتوۆ پەن جانقوش تۇراروۆ, اۋىر اتلەتيكادان الەم چەمپيوناتىنىڭ ەكى دۇركىن كۇمىس جۇلدەگەرى الماس وتەشوۆ سىندى ساڭلاقتار «ابىلاي حان» سپورت كەشەنىنە ارنايى ات باسىن بۇردى.
كەشتىڭ باستى جەكپە-جەگىندە دارىندى جاس بوكسشىلارىمىزدىڭ ءبىرى ەسكەندىر حارسان بەلارۋسسيالىق اندرەي نۋرچينسكيمەن كۇش سىناستى. شارشى الاڭدا 50 كەزدەسۋ وتكىزىپ ۇلگەرگەن 31 جاستاعى ساقا سپورتشىعا قارسى دۇرىس تاكتيكا قولدانا بىلگەن ساعاتبەك مۇساحانوۆتىڭ شاكىرتى بۇل باسەكەدە ۇپاي سانىمەن جەڭىسكە جەتتى. بۇل ەسكەندىردىڭ كاسىپقويلار اراسىنداعى سەگىزىنشى جەكپە-جەگى. سونىڭ جەتەۋىندە ول جەڭىسكە جەتتى.
– جۋىردا عانا تۇساۋى كەسىلگەن «دارىن» پروموۋتەرلىك كومپانياسى العاش رەت وسىنداي حالىقارالىق دەڭگەيدە جارىس ۇيىمداستىرىپ وتىر. ءبىزدىڭ باستى ماقساتىمىز – وسى سپورت ءتۇرىن تاڭداعان جاستارعا جول اشۋ, ولاردىڭ ۇلكەن ارەناعا شىعۋىنا بارىنشا جاعداي جاساۋ. بۇل باستاماعا جان-جاقتى قولداۋ كورسەتكەن رەسپۋبليكالىق كاسىپقوي بوكس فەدەراتسياسىنا, «Nev Names» كومپانياسىنا, «ابىلاي حان» سپورت كلۋبىنا, شىعىس قازاقستان وبلىسى جارما اۋدانىنا قاراستى كوشەك اۋىلىنىڭ ازاماتتارىنا جانە جەكە كاسىپكەرلەر – گۇلنار جاۋىنشىنوۆا مەن گامزا گەيداروۆقا زور العىسىمىزدى بىلدىرەمىز. بۇيىرتسا, الداعى ۋاقىتتا دا اتالعان تۋرنير ءوز جالعاسىن تابادى, – دەيدى «دارىن» پروموۋتەرلىك كومپانياسىنىڭ پرەزيدەنتى دارحان قابىلانباەۆ.
قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى داستان سادۋاقاسوۆتىڭ ءۇش بىردەي شاكىرتى سول كەشتە رينگكە كوتەرىلدى. ۇشەۋى دە قارسىلاستارىن سۇلاتىپ سالدى. اتاپ ايتساق, بەكبولات قۇرامىسوۆ باتىرجان تۇحتاەۆتى ءۇشىنشى راۋندتا ۇرىپ جىقتى. بۇل ناتيجە ەشكىمدى تاڭداندىرا قويعان جوق. سەبەبى بەكبولاتتىڭ ەسىمى جانكۇيەرلەرگە جاقسى تانىس. ول – ستۋدەنتتەر اراسىندا الەم جانە ازيا بىرىنشىلىكتەرىنىڭ جۇلدەگەرى, قازاقستان چەمپيوناتىندا جەڭىس تۇعىرىنا كوتەرىلىپ, دۇنيەجۇزىلىك بوكس سەرياسى دوداسىندا بىرەر جىل «استانا ارلاندارىنىڭ» نامىسىن قورعادى. العاشقى راۋندتاردا باتىرجان وعان لايىقتى قارسىلىق كورسەتكەنىنە قاراماستان, باسەكە بەل ورتادان اۋعان تۇستا بەكبولات قارقىنىن كۇرت كۇشەيتتى. بىرنەشە اۋىر سوققى دارىعاننان كەيىن قارسى جاقتىڭ باپكەرلەرى رينگكە اق ورامال تاستاۋعا ءماجبۇر بولدى.
جاس دارىن باۋىرجان بەيىلدينوۆ ەرلان ماحمۇدتىڭ وسال تۇسىن تاپتى. بويى مەن قولىنىڭ ۇزىنداعىن ۇتىمدى پايدالانعان ول, قارسىلاسىنا باس كوتەرتپەدى. تورەشىلەر باسەكەنى ەكىنشى راۋندتا توقتاتتى. ال ءداۋىت ىنتىماق قانات سۇمەباي ۇلىنان ايلاسىن اسىردى. بۇل – ايتۋلى بىلعارى قولعاپ شەبەرلەرىنىڭ كاسىپقوي رينگتەگى تۇساۋكەسەر كەزدەسۋلەرى. سونداي-اق اتالعان تۋرنيردە عاني سپاتاەۆ ازەربايجاندىق يسمات ەيۋنۋلاەەۆتى جانە ادلان سەلمۇرزاەۆ بەلورۋسسيالىق سەرگەي كراپشيلانى جەڭىپ, جەرگىلىكتى جانكۇيەرلەردى ءبىر جەلپىندىرىپ تاستادى.