كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ استاناعا رەسمي ساپارمەن كەلگەن شۆەيتساريا كونفەدەراتسياسى كانتوندار كەڭەسىنىڭ پرەزيدەنتى فيليپپو لومبارديمەن كەزدەستى.
كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ استاناعا رەسمي ساپارمەن كەلگەن شۆەيتساريا كونفەدەراتسياسى كانتوندار كەڭەسىنىڭ پرەزيدەنتى فيليپپو لومبارديمەن كەزدەستى.
ق.توقاەۆ قازاقستاننىڭ ەۋروپاداعى ماڭىزدى ساياسي جانە ەكونوميكالىق ارىپتەسى رەتىندە شۆەيتساريانىڭ ءرولىن اتاپ ءوتتى. ەكى ەل دە قازىرگى زامانداعى جاھاندىق ماسەلەلەرگە كوزقاراستارى ۇقساس جانە كوپتاراپتى قۇرىلىمدار اياسىندا ءوزارا تابىستى ءىس-قيمىلدى جۇزەگە اسىرىپ كەلەدى.
كەزدەسۋ بارىسىندا تاراپتار پارلامەنتارالىق ءوزارا ىنتىماق ماسەلەلەرىنە ەرەكشە نازار اۋداردى. قاراشا ايىنىڭ سوڭىندا بەرندە «شۆەيتساريا-قازاقستان» پارلامەنتارالىق توبىنىڭ العاشقى وتىرىسى بولادى. ق.توقاەۆتىڭ پىكىرىنشە, «جاسىل ەكونوميكا», جاڭارتىلاتىن ەنەرگەتيكا, سىبايلاس جەمقورلىقپەن, ترانسۇلتتىق قىلمىستارمەن كۇرەس, ەكسترەميزم مەن تەرروريزمگە قارسى ءىس-قيمىل ماسەلەلەرى بويىنشا زاڭ شىعارۋدا توپتىڭ قىزمەتى ءتاجىريبە الماسۋعا ىقپال ەتەتىن بولادى.
ەكى ەلدىڭ ەكونوميكالىق ىنتىماقتاستىعىن نىعايتۋدا, ءجۇزدەسۋشىلەردىڭ پىكىرىنشە, قازاقستان-شۆەيتساريا ىسكەرلەر كەڭەسى مەن قازاقستان-شۆەيتساريا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ ماڭىزدى ورنى بار. 2012 جىلى قازاقستان مەن شۆەيتساريا اراسىنداعى ساۋدا كولەمى 5,2 ميلليارد دوللاردى قۇرادى.
سول كۇنى ف.لومباردي قازاقستان پارلامەنتى سەناتىنىڭ دەپۋتاتتارى الدىندا ءسوز سويلەدى. مارتەبەلى مەيمان استانانىڭ دامۋ قارقىنى ءجونىندەگى اسەرلەرىمەن بولىسە وتىرىپ, ونى «دالا مانحەتتەنى» دەپ اتادى. استانالاردى كوشىرۋ تاريحىنداعى وسىنداي ساياسي, الەۋمەتتىك جانە ەكونوميكالىق ورنىقتى ءارى زور تابىستاردى قامتاماسىز ەتۋگە قول جەتكىزگەنى نەكەن-ساياق... مەن وسىنداي تاماشا جوبانى جۇزەگە اسىرۋ ءۇشىن دانا ءارى ساياسي شەشىم قابىلداۋ قاجەت بولعانىن اڭعارىپ وتىرمىن. بۇگىنگى استانا سىزدەردىڭ ەلدەرىڭىزدىڭ كەيىنگى جيىرما جىلداعى تاۋەلسىز مەملەكەت رەتىندە جەدەل دامۋىن پاش ەتەدى, دەدى كانتوندار كەڭەسىنىڭ پرەزيدەنتى.
ف.لومباردي قازاقستاننىڭ حالىقارالىق ارەناداعى ءرولى ارتا تۇسكەنىن اتاپ ءوتىپ, ەلدىڭ ايماقتىق جانە الەمدىك دەڭگەيدە قۋاتتى ءارى سەنىمدى ارىپتەس ەكەنىن جەتكىزدى. ەلدەردىڭ اراسىنا كوپىر سالۋداعى استانا ءوزىنىڭ الەۋەتىمەن شۆەيتساريانىڭ حالىقارالىق ارەناداعى ءرولىن كورسەتەتىن جەنەۆامەن ۇقساستىعى بار, دەدى ول.
ەقىۇ-نىڭ 2014 جىلعى ءتوراعاسى رەتىندە شۆەيتساريا وسى ۇيىمعا توراعالىق ەتۋدە قازاقستاندىق ءتاجىريبەنى پايدالانۋعا نيەتتەنىپ وتىر. سونىمەن قاتار, مەيمان استانادا ەكسپو-2017 كورمەسىنىڭ وتۋىنە قولداۋ ءبىلدىردى. «بولاشاقتىڭ ەنەرگياسى» تاقىرىبىن تاڭداي وتىرىپ, سىزدەردىڭ ەلدەرىڭىز ەكونوميكالىق تۇرعىدا الدىڭعى قاتارداعى ەلگە اينالۋ جولىنداعى ەۆوليۋتسيانىڭ قۇرامداس بولىگى بولىپ تابىلاتىن قاتەرلەر مەن جاۋاپكەرشىلىكتى ۇعىناتىنىن كورسەتۋدە, دەپ اتاپ ءوتتى ف.لومباردي.
كانتوندار كەڭەسىنىڭ پرەزيدەنتى قازاقستان-شۆەيتساريا پارلامەنتارالىق ىنتىماقتاستىعىن ودان ءارى ىلگەرىلەتۋ جايىندا ايتا كەلىپ, ول ورتاق مۇددە بولىپ تابىلاتىن مىندەتتەردى شەشۋگە مۇمكىندىك بەرەتىنىن اتاپ ءوتتى. ول, سونداي-اق, بيىل قۇرىلعان قازاقستان-شۆەيتساريا ىسكەرلەر كەڭەسى ءوزارا ينۆەستيتسيالاردىڭ ارتا تۇسۋىنە ىقپال ەتەتىنىنە سەنىم ءبىلدىردى.
ف.لومباردي بۇۇ-نىڭ جەنەۆاداعى ءبولىمىنىڭ باس ديرەكتورى لاۋازىمىنداعى ءتيىمدى قىزمەتى ءۇشىن ق.توقاەۆقا ريزاشىلىعىن ءبىلدىردى. بۇۇ-نىڭ كوپتەگەن ماڭىزدى تەحنيكالىق قۇرىلىمدارى جەنەۆادا ورنالاسقاندىقتان, نيۋ-يوركتەن گورى وسى قالادا كوپتەگەن كەزدەسۋلەر وتەدى... ءبىز توقاەۆقا جۇمىستاردىڭ ءبارىن وتە ءتيىمدى جانە مۇقيات اتقارعانى ءۇشىن ريزامىز, دەدى ف.لومباردي.
كەلىسسوز بەن كەزدەسۋلەرگە قازاقستاندىق سەناتورلار, سونداي-اق ەكى ەلدىڭ ەلشىلەرى مۇحتار ءتىلەۋبەردى مەن ماۋرو رەينا قاتىستى.
اسقار تۇراپباي ۇلى,
«ەگەمەن قازاقستان».