ماسكەۋ «مايدانى»

وسىدان 31 جىل بۇرىن وتكەن ءدۇبىرلى دودانى ءبىز بەكەر تىلگە تيەك ەتىپ وتىرعان جوقپىز. ونىڭ وزىندىك ەكى سەبەبى بار. ءبىرىنشىسى – ءداپ وسى الەم چەمپيوناتىندا كسرو قۇراماسى تۇڭعىش رەت كۋبا بوكسشىلارىنان وزىپ, كوماندالىق ەسەپتە كوش باستادى. سوعان دەيىن وتكەن ءتورت بىردەي بايراقتى باسەكەدە بوستاندىق ارالىنىڭ وكىلدەرى ولاردىڭ الدىن وراعان بولاتىن. ماسكەۋدە سان مارتە جىبەرگەن ەسەلەرىن قايتارۋدىڭ رەتى كەلدى. ەكىنشى سەبەپ, كەڭەس وداعىنىڭ جۇلدىزدى كومانداسىنىڭ ساپىندا قازاقستاننىڭ ەكى بىردەي ورەنى ونەر كورسەتتى. ولاردىڭ ەكەۋى دە ولجاعا كەنەلدى. ەندى وسى جايتتاردى رەت-رەتىمەن بايان­دايىق.

بوكستان الەم چەمپيوناتى تۇڭعىش رەت 1974 جىلى گا­ۆانادا ۇيىمداستىرىلعان بولاتىن. سول جارىستا اتالعان ەكى كوماندا سەگىز جۇلدەدەن ول­جالاعانىمەن, قورجىنىندا 5 التىن, 1 كۇمىس جانە 2 قولاسى بار رينگ قوجايىندارى جالپى ەسەپتە كوش باستادى. 2 التىن, 2 كۇمىس جانە 4 قولا مەدالدى يەلەنگەن كسرو ەكىنشى ورىنعا تۇراقتادى.

1978 جىلى بەلگرادتا كۋبا­لىقتار 5 التىن مەن 3 كۇمىستى قان­جىعالارىنا بايلاسا, وداق­تىڭ وعلاندارى 3 التىن, 1 كۇمىس جانە 2 قولانى ەنشىلەدى.

1982 جىلى ميۋنحەندە 5 ال­تىن, 1 كۇمىس جانە 1 قولا­نى ولجالاعان كۋبانىڭ قابىل­دان­دارى قايتا قارا ءۇزىپ كەتتى. بۇل جولى 3 التىن, 2 كۇمىس جانە 1 قو­لانى قاناعات تۇت­قان كسرو بوكسشىلارى باستى قار­سى­لاستارىن ايت­پاعاندا, اقش-تان دا قالىپ قويدى.

1986 جىلى اقش-تىڭ نەۆادا شتاتىنداعى رينو قالاسىندا وتكەن جارىس­تا جوعارىداعى جاعداي قايتالاندى. ءبىرىنشى ورىندا كۋبا (7+2+2), ەكىنشى ورىندا اقش (3+1+1) جانە ءۇشىنشى ورىندا كسرو (1+0+4).

بەسىنشى مارتە جالاۋى جەلبىرگەن جارىستا كسرو قۇراماسى ءوز تاريحىندا تۇڭعىش رەت كوماندالىق ەسەپتە كوش باستادى. وداقتىڭ وعلاندارى اراسىنان 54 كيلو سالماقتاعى تيموفەي سكريابين عانا جەڭىس تۇعىرىنا كوتەرىلە المادى. 1/8 فينالدا ول گدر-دىڭ وكىلى ديتەر بەرگە ەسە جى­بەردى. قالعان بوكسشىلاردىڭ بارلىعى دا جارتىلاي فينالعا جەتىپ, ءتۇرلى ءتۇستى مەدالداردى مويىندارىنا ءىلدى. تارقاتىپ ايتساق, يۋري ارباچاكوۆ (51 كيلو), ايرات حاماتوۆ (57 كيلو), يگور رۋجنيكوۆ (63,5 كيلو), يسراەل اكوپكوحيان (71 كيلو) جانە اندرەي كۋرنياۆكا (81 كيلو) باس جۇلدەنى ولجالاسا, ەۆ­گەني سۋداكوۆ (91 كيلو) پەن الەكساندر ميروشنيچەنكو (+91 كيلو) كۇمىسپەن كۇپتەلدى. ال نشان مۋنچيان (48 كيلو), كونستانتين تسزيۋ (60 كيلو), ۆلا­ديمير ەرەششەنكو (97 كيلو) جانە نۇرماگومەد شاناۆازوۆ (81 كيلو) قولاعا قول سوزدى. بارلىعى 5 التىن, 2 كۇمىس جانە 4 قولا.

ەكىنشى ورىنعا جايعاسقان كۋبا 4 التىن, 4 كۇمىس جانە 1 قولانى يەلەندى. بوستاندىق ارا­لىنىڭ وكىلدەرى اراسىنان ەن­ريكە كارريون (54 كيلو), حۋليو گونسالەس (60 كيلو), فە­ليكس ساۆون (91 كيلو) جانە روبەرتو بالادو (+91 كيلو) تەڭ­دەسسىز دەپ تانىلدى. قالعان ءۇش التىن­دى امەريكالىق ەريك گريف­فين (48 كيلو), رۋمىنيالىق فرانچيسك ۆاش­تاگ (67 كيلو) جانە گەر­ما­نيا­لىق گەنري ماسكە (75 كيلو) ولجالادى.

ماسكەۋدەگى جارىستا جەڭىس تۇ­عىرىنا كوتەرىلگەن قازاق­ستان­­نىڭ ەكى بوكسشىسى جايىن­دا ايتار بولساق, 63,5 كيلو سالماقتاعى يگور رۋجنيكوۆقا جەرەبە وتە قيىن ءتۇستى. ىزگى ني­ەت ويىندارىنىڭ جەڭىمپازى, ەۋروپا چەمپيونى دەگەن اتا­عى بار تەمىرتاۋدىڭ تۇ­لەگى تۇساۋ­كەسەر كەزدەسۋىندە سەۋل وليم­پياداسىنىڭ كۇمىس جۇل­دەگەرى, اۋستراليالىق گرەم چەي­نيمەن قولعاپ ءتۇيىستىردى. بۇل باسەكە 19:7 ەسەبىمەن يگوردىڭ پايداسىنا شەشىلدى. شيرەك فينال­دا الەم چەمپيوناتىنىڭ كۇمىس جۇلدەگەرى, پانامەريكا ويىن­دارىنىڭ جەڭىمپازى, كۋبالىق كاندەلاريو دۋۆەر­حەلدى قاپى قالدىردى – 22:14. جارتىلاي فينالدا يۋگو­سلا­ۆيانىڭ مىقتىسى ۆۋ­­كا­شين ءدوبراشينوۆيچتىڭ تاس-تال­قانىن شىعاردى – 16:3. في­نالدا گدر-دىڭ شەبەرى ان­درەاس وتتونىڭ وسال تۇسىن تاپتى – 19:14. وسىلايشا, يگور رۋج­نيكوۆ الەم چەمپيونى اتاندى. ءسوز ورايى كەلگەندە 1986 جىلى ماسكەۋدە وتكەن ىزگى نيەت ويىندارى بارىسىندا جەرلەسىمىز كەيىننەن كاسىپقوي رينگتىڭ شوق­جۇلدىزىنا اينالعان روي دجونس­تى جەڭگەنى جايىندا ايتا كەتسەك, ەش ايىبى جوق دەپ ويلايمىز.

اسا اۋىر سالماقتاعى الەك­ساندر ميروشنيچەنكو قوس­تاناي قالاسىندا تۋىپ-ءوستى. ماسكەۋدەگى جارىسقا دەيىن ول سەۋل وليمپياداسى مەن الەم كۋبوگىنىڭ جانە ەۋروپا چەمپيوناتىنىڭ ەكى دۇركىن قولا جۇلدەگەرى اتانىپ ۇلگەردى. ىزگى نيەت ويىندارىنىڭ فينالىندا ۇتىلدى. ماسكەۋدەگى دودادا ميروشنيچەنكو گفر-دىڭ ءدۇلد ۇلى اندرەاس شنيدەرستى ەكىنشى راۋندتا ۇرىپ جىقسا, چەحوسلوۆاكيالىق لاديسلاۆ حۋ­ساريكتى وڭدىرماي سابادى – 19:5. بىراق اقتىق ايقاستا جەرلەسىمىزدىڭ كۋبانىڭ جاس پەرىسى روبەرتو بالادوعا ءالى جەت­پەدى – 9:18. ءسويتىپ, الەك­ساندر كۇمىس مەدالدى يەمدەندى.

ءبىر وكىنىشتىسى, الىپتاردىڭ فينالدىق سايىسىندا جۇدى­رىقتاسقان ەكى ساڭلاق تا قازىر ارامىزدا جوق. ماسكەۋدە التىن العان روبەرتو بالادو كەيىننەن سول بەلەستى تاعى ەكى مارتە باعىندىردى. پانامەريكا ويىندارىن ۇتىپ, بارسەلونا وليمپياداسىنىڭ جەڭىمپازى اتاندى. وزگەلەردى ايتپاعاندا, دۋالى اۋىز مامانداردىڭ وزدەرى «بۇل جىگىت كەلەشەكتە تەوفيلو ستيۆەنسون مەن فەليكس ساۆون سىندى الەمدىك بوكستىڭ جارقىن جۇلدىزدارىنىڭ الدىن ورايدى» دەگەن بولجام ايتتى. بىراق بالادوعا ونداي باق بۇيىرمادى. ونىڭ ءومىرى كەلتە بولدى. 1994 جىلدىڭ 2 شىلدەسىندە اتاقتى بوكسشى تىزگىندەگەن جەڭىل كو­لىك گاۆاناداعى تەمىر جول وتكەلدەرىنىڭ بىرىندە زىمىراپ كەلە جاتقان پويىزبەن سوقتىعىستى. ول سول جەردە ول ءجانتاسىلىم ەتتى. روبەرتو نەبارى 25 جاستا ەدى...

كەزىندە الەكساندر ميروش­نيچەنكو لەننوكس ليۋيس پەن ريدديك بوۋدى جاقسىلاپ تۇرىپ ساباعانىن بىرەۋ بىلسە, بىرەۋ بىلمەۋى مۇمكىن. كەيىننەن ولار كاسىپقوي رينگتىڭ كوكجالىنا اينالدى. قوستانايدىڭ الىبى 29 جاسىندا بىلعارى قولعابىن شەگەگە ءىلدى. 2003 جىلدىڭ 19 مامىرىندا ول جۇمباق جاعدايدا كوز جۇمدى. رەسمي مالىمەتكە سەن­سەك, قوستاناي قالا­سىن­داعى ءوزىنىڭ توعى­زىنشى قاباتتاعى پا­تەرىندەگى پودەزگە شى­عادى دا, سول جەردەن تومەن قۇلاپ كەتىپ, مەرت بولعان. بىراق ءوزى قۇلادى ما, الدە باسقا بىرەۋ قۇ­لاتتى ما, ول جاعى بەي­مالىم. وسى جاعدايعا باي­لانىستى ەل اراسىندا ءتۇر­لى سىبىس تارادى. تىپتەن «بۇل تاپسىرىسپەن ىستەلگەن قىل­مىس» دەگەن دە بولجامدار ايتىلدى. قالاي بولعاندا دا, اتاقتى بوكسشى 40 جاسقا قاراعان شاعىندا ومىردەن وزدى...

1991 جىلى سيدنەيدە وتكەن الەم چەمپيوناتىندا كسرو مەن كۋبا قۇرامالارى اراسىنداعى تارتىس قايتا جالعاستى. بۇل جولى ارالدىقتاردىڭ باسىم­دى­عى ايقىن بولدى. ولار باس جۇل­دەنىڭ تورتەۋىن السا, وداق­تىڭ وعلاندارىنا ءبىر عانا التىن بۇيىردى. بۇل جولى ولار بولگاريا مەن گەرمانيادان دا قالىپ قويدى. كوپ ۇزاماي قىزىلدار يمپەرياسى كەلمەسكە كەتتى. بۇرىنعى «باۋىر­لاس» رەسپۋبليكالار جەكە-جەكە وتاۋ تىكتى. سونىڭ نا­تي­­جەسىندە بوكس كارتاسىندا قازاقستان, ۋكراينا, رەسەي, وز­بەكس­تان سەكىلدى قاتارعا جاڭا­دان قوسىلعان الپاۋىت ەلدەر پاي­دا بولدى. بۇگىنگى تاڭدا كۋ­بانىڭ ءدۇبىرلى دودالارداعى باس­تى باسەكەلەستەرى ءداپ وسى مەملەكەتتەردىڭ ورەندەرى.