الماتى وبلىسىنداعى ساتى اۋىلىندا «كولساي كولدەرى» مەملەكەتتىك ۇلتتىق تابيعي پاركىنىڭ دامۋ تۇجىرىمداماسى قوعام وكىلدەرىنە تانىستىرىلدى.
تۇجىرىمداما بويىنشا پاركتە زاماناۋي 3 ۆيزيت-ورتالىق, گلەمپينگ, كەمپينگ ەتنواۋىل سالىپ, كاراۆانينگكە ارنالعان ورىندار دايىنداۋ كوزدەلگەن. بۇل رەتتە تۋريستىك مارشرۋتتار مەن سوقپاقتاردى دامىتۋعا باستى نازار اۋدارىلادى. ايماقتا كۇردەلى قۇرىلىستىڭ ورنىنا جەڭىل كونسترۋكتسيالار قولدانىلادى.
«كولساي كولدەرى» ۇلتتىق مەملەكەتتىك تابيعي پاركىنىڭ ديرەكتورى دانيار تۇرعانباەۆ مۇنداعى ەكوتۋريزمگە ارنالعان ينفراقۇرىلىم قورشاعان ورتاعا زيان كەلتىرمەس ءۇشىن نەگىزگى كولدەردەن الىس بولاتىنىن ايتتى. «قايىڭدى, كولساي كولدەرىنە بىردە-ءبىر نىسان جاقىن سالىنبايدى. عيماراتتاردىڭ ءبارى تومەن ورنالاسادى. شاتقالدىڭ ىشىنە كىرمەيدى. بۇل – تابيعاتتىڭ سۇرانىسى, قاجەتتىلىگى ەسكەرىلىپ جاسالعان تۇجىرىمداما. كونتسەپتسيانىڭ باستى ماقساتى – ەكوجۇيەنى بۇزباۋ. ادامدار جاياۋ نەمەسە ۆەلوسيپەدپەن ءجۇرىپ, تابيعاتقا زيان تيگىزبەي دەمالاتىن جاعدايعا كەلۋىمىز كەرەك. تاعى ءبىر ماقساتىمىز – ەلدى مەكەن تۇرعىندارىن جۇمىسپەن قامتۋ. تەك ءىرى بيزنەس وكىلدەرى ەمەس, جەرگىلىكتى حالىق تا ءتۋريزمنىڭ پايداسىن كورۋى ءتيىس», دەدى د.تۇرعانباەۆ.
ءتۋريزمدى دامىتۋدىڭ مەملەكەتتىك باعدارلاماسىنا سايكەس, ەكوتۋريزم جوبالارى دا 2020 جىلى ناتيجەسىن بەرە باستاۋى ءتيىس. «الدىن الا ەسەپتەۋلەر بويىنشا تۋريستىك مارشرۋتتاردىڭ سانى ارتادى, جەرگىلىكتى تۇرعىندار ءۇشىن جاڭا جۇمىس ورىندارى پايدا بولادى, قوناقۇي قورى كەڭەيەدى جانە شاتىرلار مەن لاگەرلەر ءۇشىن كوبىرەك ورىن بولادى. بۇل رەتتە تابىس جىلىنا 150 ملن تەڭگەگە دەيىن وسەدى», دەدى «كولساي كولدەرى» ۇلتتىق مەملەكەتتىك تابيعي پاركىنىڭ باس ديرەكتورى دانيار تۇرعانباەۆ.
«دامۋ تۇجىرىمداماسىن پاركتىڭ جانىنان قۇرىلاتىن قوعامدىق كەڭەسكە شىعارامىز. سول كەڭەس جان-جاقتى قاراپ, تالقىلاپ بولعان سوڭ ءارى قاراي زاڭعا سايكەس ارەكەت جاسايمىز. ۇلكەن ينۆەستيتسيالىق جوبا ارقىلى نىساندار پايدا بولادى. تۇجىرىمدامانى ەرتەڭ بيزنەس وكىلدەرى ينۆەستيتسيالىق جوبامەن كەلگەندە ءبىزدىڭ تالاپتاردى تولىق ءتۇسىنسىن دەپ جاساپ جاتىرمىز. بايقاۋعا قاتىسقان كاسىپكەر ءبىزدىڭ تۇجىرىمداماداعى يدەيا بولعان جاعدايدا عانا جۇمىس ىستەۋگە مۇمكىندىك الادى», دەپ ەسكەرتتى ەكولوگيا, گەولوگيا جانە تابيعي رەسۋرستار ۆيتسە-ءمينيسترى ەرلان نىسانباەۆ.
وسى سالاداعى وتاندىق مامانداردىڭ پىكىرىنشە, الداعى جىلدارى قازاقستاندا ەكوتۋريزمگە دەگەن قىزىعۋشىلىق كۇرت ارتادى. Kazakh Tourism ۇلتتىق كومپانياسىنىڭ باسقارما توراعاسى ەرجان ەركىنباەۆ تا وسى پىكىردى قۋاتتايدى. «بۇل تىڭعىلىقتى جاسالعان تۇجىرىمداما. ونى پرەمەر-ءمينيستردىڭ جانە ەكولوگيا, گەولوگيا جانە تابيعي رەسۋرستار, مادەنيەت جانە سپورت مينيسترلەرىنىڭ تاپسىرماسىمەن ۇلتتىق پاركتىڭ بارلىق شاتقالدارىن بىرنەشە رەت ارالاپ شىعىپ, ۇزاق ۋاقىت دايىندادىق», دەدى ە.ەركىنباەۆ قوعام وكىلدەرى قاتىسقان جيىندا.
ول بۇۇ-نىڭ بۇكىلالەمدىك تۋريستىك ۇيىمى اۋىلدىق جانە ەكولوگيالىق ءتۋريزمدى وسى جىلدىڭ ۇرانى ەتىپ العانىن اتاپ ءوتتى. سەبەبى پاندەميا اسەرىنەن ەكوتۋريزم جاھاندىق تۋريزم ۇلەسىنىڭ 30%-ىن قۇراعان.
«ەكوتۋريزم ءبىزدىڭ ەلىمىزدەگى تۋريزم سالاسىنىڭ ەڭ كەلەشەگى زور باعىتى. مەملەكەت جەرىنىڭ 10%-ى – ەرەكشە قورعالاتىن اۋماقتار. ەكوتۋريزمگە ينفراقۇرىلىم سالىپ, جاعداي جاساساق تا, جاساماساق تا ول جاققا باراتىن ادامدار سانى جىل سايىن كوبەيە بەرەدى. سوندىقتان ەگەر ءتۋريزمدى دۇرىس ۇيىمداستىرماساق, ەكوجۇيەگە تۇسەتىن انتروپوگەندىك جۇكتەمە ارتىپ, بيوالۋانتۇرلىلىككە قاۋىپ تونەدى. جاڭا مارشرۋتتار اشپاساق, قازىرگى بار ورىندارعا زيان كەلەدى», دەپ ءتۇسىندىردى ول.
سوندىقتان تۇجىرىمداما بويىنشا ۇلتتىق پارككە كەلگەن تۋريستەر بۇرىنعىداي كولساي, قايىڭدى كولدەرىنىڭ جاعاسىندا ۇزاق بوگەلمەيدى. جوبا جەكە ينۆەستور تارتۋ ارقىلى جۇزەگە اسادى. ونىڭ جۇمىسىن, تالاپقا ساي جۇمىس ىستەۋىن «كولساي كولدەرى» ۇلتتىق پاركىندە ەكوتۋريزمدى دامىتۋ بويىنشا قۇرىلاتىن قوعامدىق كەڭەس باقىلايدى. باس جوسپارعا سايكەس 2025 جىلعا قاراي «كولساي كولدەرىنە» كەلەتىن تۋريستەر سانى 5 ەسە ارتادى دەگەن بولجام بار. 2019 جىلى ۇلتتىق پارك 87 مىڭ ادام قابىلداعان.