جۋىردا «ەگەمەندە» پەتروپاۆل قالاسىندا ءالى كۇنگە ينتەرناتسيونال كوشەسىنىڭ بار ەكەندىگى, بىراق قازاق حالقىنىڭ ۇلتتىق كوسەمدەرى ءاليحان بوكەيحان, احمەت بايتۇرسىن ۇلى جانە تاعى باسقا الاش ارداقتىلارىنىڭ اتىندا بىردە-ءبىر كوشە جوق ەكەندىگى جازىلدى («Egemen Qazaqstan», «پەتروپاۆل ينتەرناتسيونالدى ۇلىقتاپ وتىر. نەگە؟», 23.09.2020 ج).
شىنىندا دا ءبىز بۇگىنگى ۇرپاقتى پاتريوتتىق رۋحتا تاربيەلەۋدە ءوزىنىڭ حالقىنا ولشەۋسىز ەڭبەك سىڭىرگەن ەرلەردى ۇلىقتاي الىپ وتىرمىز با؟ ەگەر قالا كوشەلەرى سولاردىڭ اتىمەن اتالسا – جەتكىنشەكتەر ءوز حالقىنىڭ مۇددەسىن قورعاعان ەرلەردى دە تەرەڭىرەك ءبىلىپ وسكەن بولار ەدى. ونىڭ ۇستىنە ۇلىلارىمىزدىڭ قانداي قىزمەت اتقارعانىنان حاباردار ەتەتىن جاسوسپىرىمدەرگە ارنالعان شارالار وتكىزىلىپ تۇرسا جاقسى ەمەس پە. ءتىپتى قالا كوشەلەرىنە ۇلىلارىمىزدىڭ اتتارى بەرىلسە, ولاردىڭ كىم ەكەنىن بىلۋگە, وزدىگىنەن زەرتتەۋگە ۇمتىلاتىنى ءسوزسىز. ماسەلەن, ءبىز احمەت بايتۇرسىن ۇلى «ۇلت ۇستازى» دەپ اتايمىز. ال ونىڭ قانداي ۇستاز بولعانىن جاستار تۇگىل كەيبىر ۇلكەندەردىڭ وزدەرى بىلە بەرمەيدى. اراب قارپىنىڭ نەگىزىندە قازاقتىڭ العاشقى ءتول ءالىپبيىن جاساپ, قازاق ءتىلى ءبىلىمىن دە العاش اينالىسقا ەنگىزگەندىكتەن ونى ۇلت ۇستازى دەيمىز. باستاۋىش, بايانداۋىش, تولىقتاۋىش, پىسىقتاۋىش دەگەن سياقتى تاماشا تەرميندەردى دە ءتىل بىلىمىنە سول كىسى ەنگىزدى. وسىنداي ادامدارىمىز ەلىمىزدىڭ بارلىق بۇرىشتارىندا تەرەڭنەن ناسيحاتتالىپ, جاستارعا تانىستىرىلىپ وتىرۋ كەرەك قوي. سوندا پاتريوتتىق سەزىم تەرەڭدەپ, جەتكىنشەكتەرىمىزدىڭ بويىندا ۇلتتىق رۋح ويانا تۇسپەس پە؟
قازىر بىزدە ءاليحان بوكەيحاننىڭ, مىرجاقىپ دۋلاتوۆتىڭ جانە باسقا الاش ارداقتىلارىن ء«بىزدىڭ جەرلەستەرىمىز ەمەس» دەپ سىرتقا تەبەتىن كەرى تۇسىنىك قالىپتاسقان. قازاقستاننىڭ قازىرگى تەرريتورياسىن ايقىنداپ, لەنيننىڭ الدىندا قازاق جەرىنىڭ كولەمىن دالەلدەپ, كارتاسىن سىزىپ بەرگەن ءالىمحان ەرمەكوۆ سياقتى ەرلەرىمىزدىڭ ەرلىگىنەن مۇلدە بەيحابار ۇرپاق ءوسىپ كەلەدى. سوندىقتان ماقالادا ايتىلعان الاش ارداقتىلارىن ارداقتاپ, ولاردىڭ اتىنا كوشە اتتارىن بەرۋ تۋرالى پىكىردى تولىق قولدايمىن.
ارينە, ءبىر كەزدە ءبىز كوممۋنيستىك پارتيانىڭ مۇراتتارىن بويىمىزعا سىڭىردىك. سول ءۇشىن پرولەتارلاردىڭ حالىقارالىق گيمنى ينتەرناتسيونالدى دا جاتتادىق. بارلىق الەمدە سوتسياليزم جەڭەتىنىنە سەندىك. بىراق كوممۋنيستىك پارتيانىڭ يدەياسى ءسوز جۇزىندە دۇرىس بولعانىمەن ءىس جۇزىندە ونىڭ ومىردە تولىق ىسكە اسپايتىنىن كوزىمىزبەن كوردىك. ءسوتسياليزمنىڭ دە بارلىق الەمدە كۇشپەن ورناۋى – زورلىق ەكەنىن, سوندىقتان ونىڭ كۇرەسىنە شاقىرعان ينتەرناتسيونالدىڭ دا دۇرىس ەمەس ەكەنىن تانىدىق. ءبىز قازىر دەموكراتيالىق مۇراتتى قولدايتىن ەل ورناتۋدى الدىمىزعا ماقسات ەتىپ وتىرمىز.
دەموكراتيالىق جولمەن دامۋ – بارلىق زورلىققا, قارۋلى كوتەرىلىسكە قارسى. قوعامداعى ساياسي جانە الەۋمەتتىك-ەكونوميكالىق ساياساتتى سايلاۋدا كوپشىلىك داۋىس العان پارتيا ايقىندايدى. قازىرگى بيلىك پارتياسى Nur Otan حالىقتىق دەموكراتيالىق پارتياسى. ول كوممۋنيستىك ينتەرناتسيونالدى مويىندامايدى, ماقساتى ەلدى دەموكراتيالىق جولمەن دامىتۋ. ەندەشە ينتەرناتسيونال دەگەن سەكىلدى ۇعىمداردى بۇگىنگى جاستىڭ ساناسىنان ىعىستىرا بەرۋىمىز كەرەك. ولاردى ارداقتاپ, قالامىزداعى ەڭ كورنەكتى كوشەسىنىڭ اتىن بەرىپ قويۋدىڭ ءوزى – ءبىزدىڭ ماقساتىمىزدىڭ ءوزىن ءدۇبارا حالگە ۇشىراتادى ەمەس پە؟ سوندىقتان ونداي اتاۋلاردى باتىل وزگەرتۋگە ءتيىسپىز.
ەسكەندىر ەلەۋسىزوۆ,
سولتۇستىك قازاقستان وبلىستىق ارداگەرلەر كەڭەسىنىڭ توراعاسى
پەتروپاۆل