جۇرگىزۋشى كۋالىگىن الۋ ۇدەرىسىن جەتىلدىرۋ باعىتىندا ۇكىمەت ناقتى قادامدارعا كوشتى. پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ توراعالىق ەتكەن كەڭەستە ەمتيحان تاپسىرۋ ءتارتىبىن جاڭعىرتۋعا قاتىستى كەشەندى شارالار قارالىپ, بەكىتىلدى, دەپ جازادى Egemen.kz.
كەڭەس بارىسىندا ىشكى ىستەر مينيسترلىگىمەن بىرلەسىپ, ءراسىمنىڭ اشىقتىعى مەن ادىلدىگىن ارتتىرۋ, ازاماتتار ءۇشىن قولايلىلىقتى كۇشەيتۋ, سىبايلاس جەمقورلىق تاۋەكەلدەرىن ازايتۋ جانە جۇرگىزۋشىلەردى دايارلاۋ ساپاسىن جاقسارتۋ باستى باعىت رەتىندە ايقىندالدى.
ءبىرىنشى كەزەكتە, جاڭا نورمالارعا سايكەس ازاماتتار جۇرگىزۋشى كۋالىگىن الۋ ءۇشىن ەمتيحاندى اقىلى نەگىزدە شەكتەۋسىز تاپسىرا الادى. بۇل رەتتە ءار ارەكەت اراسىنداعى ارالىق كەمىندە 10 كۇنتىزبەلىك كۇن بولۋى ءتيىس. بۇعان دەيىن ازاماتتارعا 3 تەگىن مۇمكىندىك بەرىلەتىن: العاشقى ەكەۋى – 1 كۇن ارالىقپەن, ءۇشىنشىسى – 30 كۇننەن كەيىن. وسى مۇمكىندىكتەر تاۋسىلعان سوڭ قايتا وقۋدان ءوتۋ تالابى قويىلاتىن. مۇنداي شەكتەۋلەر كەي جاعدايدا زاڭسىز جولدارعا يتەرمەلەيتىنى ەسكەرىلىپ, ارتىق توسقاۋىلدار الىنىپ تاستالدى.
قىتايدا ۇشاتىن اۆتوكولىكتەر سىناقتان وتكىزىلىپ جاتىر
ەكىنشى ماڭىزدى قادام – تەوريالىق ەمتيحان جۇيەسىنە اكادەميالىق ادالدىقتى قامتاماسىز ەتەتىن تەحنولوگيالاردى ەنگىزۋ. بۇل باعىتتا عىلىم جانە جوعارى ءبىلىم مينيسترلىگىنىڭ ۇلتتىق تەستىلەۋ ورتالىعىنىڭ استانا قالاسىنداعى فيليالى بازاسىندا پيلوتتىق جوبا ىسكە قوسىلادى. ورتالىقتا قولدانىلاتىن باقىلاۋ تەحنولوگيالارى سىناقتان وتكىزىلىپ, كەيىن بۇكىل جۇيەگە ەنگىزىلەدى. سونىمەن قاتار تەست تاپسىرمالارىنا كەشەندى پسيحومەتريالىق زەرتتەۋ جۇرگىزىلىپ, ولاردىڭ جۇرگىزۋشىنىڭ قاۋىپسىزدىككە قاجەتتى ءبىلىمىن ناقتى باعالاۋ مۇمكىندىگى تەكسەرىلەدى.
ءۇشىنشى جانە ءتورتىنشى باعىتتاردىڭ شەڭبەرىندە ەمتيحان ۇدەرىسىنە جاساندى ينتەللەكت تەحنولوگيالارى ەنگىزىلەدى. تەوريالىق سىناق كەزىندە تولىقتىرىلعان شىنايىلىق (AR) قولدانىلسا, پراكتيكالىق ەمتيحاندى باقىلاۋدا Computer Vision تەحنولوگياسى پايدالانىلادى. بۇل تىيىم سالىنعان قۇرالداردى قولدانۋ تاۋەكەلىن ازايتىپ, بارلىق بۇزۋشىلىقتى ناقتى تىركەۋگە مۇمكىندىك بەرەدى.
ەندى اۆتوكولىك جۋ ورىندارى جاڭا تالاپ بويىنشا جۇمىس ىستەيدى
بەسىنشى باعىت – تسيفرلىق شەشىمدەردىڭ قاۋىپسىزدىگىن كۇشەيتۋ. جۇرگىزۋشى كۋالىگىن الۋعا قاتىستى جۇيەلەردى اقپاراتتاندىرۋدىڭ اسا ماڭىزدى وبەكتىلەرى تىزبەسىنە ەنگىزۋ ماسەلەسى قاراستىرىلىپ جاتىر. بۇل رۇقساتسىز ارالاسۋ مەن قۇقىق بۇزۋشىلىقتارعا جاۋاپكەرشىلىكتى كۇشەيتۋگە, قاجەت بولعان جاعدايدا قىلمىستىق جاۋاپكەرشىلىككە دەيىن جەتكىزۋگە جول اشادى.
التىنشى شارا رەتىندە اكىمشىلىك جاۋاپكەرشىلىك ەنگىزۋ كوزدەلگەن. ول تەك قىزمەت الۋشىلارعا عانا ەمەس, زاڭسىز ارەكەتتەرگە جاردەمدەسەتىن تۇلعالارعا دا قولدانىلادى. اتاپ ايتقاندا, ەمتيحان كەزىندە ميكروقۇلاققاپ, ميكروكامەرا جانە وزگە دە بايلانىس قۇرىلعىلارىن پايدالانعاندار جاۋاپقا تارتىلادى. بۇدان بولەك, تەوريالىق ەمتيحان تاپسىرۋ قۇقىعىنان 1 جىلعا ايىرۋ مۇمكىندىگى قاراستىرىلعان.
جەتىنشى باعىت – اۆتومەكتەپتەرگە قويىلاتىن تالاپتاردى كۇشەيتۋ. ولاردىڭ قىزمەتى جۇرگىزۋشىلەردى دايارلاۋ ساپاسى مەن ازاماتتاردىڭ كەرى بايلانىسى نەگىزىندە باعالانادى. سونىمەن قاتار بۇل سالاعا ليتسەنزيالاۋ ەنگىزىلىپ, ساپاسى تومەن ۇيىمداردىڭ ليتسەنزياسىن كەرى قايتارىپ الۋ تەتىگى ىسكە قوسىلادى.
ەمتيحان تاپسىرۋ كەزىندە اۆتوكولىك اۋدارىلىپ قالعان