مەملەكەت باسشىسىنىڭ تاپسىرماسىن ورىنداۋ بويىنشا ءىس-شارالار جوسپارى اياسىندا 2013 جىلدىڭ سوڭىنا دەيىن 46 ءىس-شارا جۇزەگە اسىرىلادى, دەپ مالىمدەدى ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ ۇكىمەت وتىرىسىندا. بۇل تۋرالى ۇكىمەتتىڭ ءباسپاسوز قىزمەتى حابارلادى.
«2013 جىلدىڭ اياعىنا دەيىن 46 ءىس-شارانى, ال 2014 جىلى 22 ءىس-شارانى ىسكە اسىرۋ كوزدەلگەن. بۇل رەتتە, 2 ءىس-شارا بيۋدجەتتىك زاڭنامانى جەتىلدىرۋ ماسەلەلەرى جونىندەگى زاڭدى قابىلداعاننان كەيىن ەكى اي مەرزىمىندە ىسكە اسىرىلاتىن بولادى», - دەدى ە. دوساەۆ.
سونىمەن, ۆەدومستۆو اعىمداعى جىلدىڭ سوڭىنا دەيىن ۇكىمەتكە مەملەكەتتىك جانە سالالىق باعدارلامالاردى قارجىلاندىرۋدىڭ باسىمدىعى جانە ولاردى وڭتايلاندىرۋ جونىندە; ەكونوميكا جانە بيۋدجەتتىك جوسپارلاۋ مينيسترلىگى مەن وڭىرلىك دامۋ مينيسترلىگى اراسىنداعى وكىلەتتىكتەردىڭ اراجىگىن ناقتى اجىراتۋ بويىنشا; جەرگىلىكتى اتقارۋشى ورگاندار قىزمەتىن باعالاۋدىڭ ەسەپتىلىگىن جانە كورسەتكىشتەرى سانىن وڭتايلاندىرۋ جونىندە; مەملەكەتتىك بيۋدجەت ەسەبىنەن قارجىلاندىرىلاتىن جوبالاردىڭ جوبالىق-سمەتالىق قۇجاتتاماسىن ازىرلەۋ, ساراپتاۋ جانە بەكىتۋ ءتارتىبىن, ونى جۇزەگە اسىرۋدى باقىلاۋدى جەتىلدىرۋ جانە باسقا دا ءىس-شارالار جونىندە ۇسىنىستاردى ەنگىزۋدى جوسپارلاپ وتىر.
ونىڭ ايتۋىنشا, ءىس-شارالار جوسپارى 70 ءىس-شارادان تۇرادى, سولاردىڭ اياسىندا ءتورت نورماتيۆتىك-قۇقىقتىق اكتى جوباسىن ازىرلەۋ كوزدەلگەن. ولاردىڭ ىشىندە «مەملەكەتتىك ورگانداردا ساتىپ الۋلاردى وتكىزۋ بويىنشا كونكۋرستىق كوميسسيالاردى توراعالارى ەتىپ ءتيىستى ءبىرىنشى باسشىلاردى تاعايىنداۋدى قامتاماسىز ەتۋ تۋرالى», «قولدانىستاعى زاڭناماعا مەملەكەتتىك ساتىپ الۋلار قورىتىندىلارىنا شاعىمدانۋ ءراسىمىن جەتىلدىرۋ بولىگىندە وزگەرىستەر ەنگىزۋ تۋرالى» جانە باسقا دا قۇجاتتار بار.
مينيستر ايتىپ وتكەندەي, جوسپاردىڭ كوپتەگەن ءىس-شارالارى ەكونوميكا جانە بيۋدجەتتىك جوسپارلاۋ مينيسترلىگىنە, وڭىرلىك دامۋ مينيسترلىگىنە, قارجى مينيسترلىگىنە, يندۋستريا جانە جاڭا تەحنولوگيالار مينيسترلىگىنە بەكىتىلگەن.
ساكەن مايلىباي.