ءاناتوليدىڭ العاشقى التىنى

سكانديناۆيا تۇبەگىندەگى سايىستا نەگىزگى باسەكەلەستىك, ادەتتەگىدەي, كسرو مەن بولگاريا قۇرامالارى اراسىندا ءوربىدى. بالكىم, كەيىنگى بۋىن وكىلدەرى «بالقان تۇبەگىندە ورنالاسقان شاعىن عانا ەلدىڭ ورەندەرى كەڭەس وداعى سەكىلدى جەر-جاھاننىڭ التىدان ءبىر بولىگىن الىپ جاتقان الىپ يمپەرياعا قالاي قارسىلىق كورسەتە الدى ەكەن؟» دەپ تاڭدانۋى دا مۇمكىن. بىراق وتكەن عاسىردىڭ جەتپىسىنشى جىلدارىنىڭ باسىندا بولگاريادا مىقتى باپكەرلىك مەكتەپ قالىپتاسىپ, اتالمىش مەملەكەتتىڭ زىلتەمىرشىلەرى ءدۇبىرلى دودالاردا كەرەمەت ناتيجەلەرگە قول جەتكىزە باستادى. سونىڭ ارقاسىندا ولار الەمدىك اۋىر اتلەتيكانىڭ كوشباسشى كوماندالاردىڭ بىرىنە اينالدى. وسىنىڭ بارلىعى دا ايگىلى يۆان ابادجيەۆتىڭ ۇستانىمى مەن ىزدەنىسى, ەڭبەكقورلىعى مەن تاباندىلىعى, پايىمى مەن پاراساتىنىڭ ارقاسى ەكەنى ەش داۋ تۋعىزباسا كەرەك. سپورتتى عىلىممەن ۇشتاستىرا بىلگەن مايتالمان مامان قىسقا عانا مەرزىم ارالىعىندا ءوز وتانداستارىن وراسان زور بيىكتەرگە جەتەلەدى. 20 جىل بويى ابادجيەۆ (1969-1999 جىلدار ارالىعى) ءوز ەلىنىڭ ۇلتتىق قۇراما كومانداسىنىڭ تىزگىنىن ۇستادى. مىنە, سول كەزەڭ «بولگاريا اۋىر اتلەتيكاسىنىڭ التىن ءداۋىرى» دەپ اتالادى.

1985 جىلى ۇيىمداستىرىلعان الەم چەمپيوناتىندا بولگاريا زىلتەمىرشى­لەرىنىڭ مىقتىلىعىن ەرىكسىز مويىندادىق. سول جارىسقا دەيىن ولار جالپى كومان­دالىق ەسەپتە كسرو-دان قالىپ قويىپ, ۇنەمى ەكىنشى نەمەسە ءۇشىنشى ورىنعا تۇراقتاپ كەلگەن ەدى. ەسەسىنە 1972 جىلى ميۋنحەن وليمپياداسىندا بولگارلار باس­تى قارسىلاسىنان وزدى. شۆەتسيادا دا ولار الىپ يمپەريانىڭ اپايتوستەرىن التىن تۇعىردان تايدىردى. ناقتىلاپ ايتساق, وسى جارىستا ساراپقا سالىنعان 11 التىننىڭ التاۋىن بولگاريا قۇراماسى يەلەندى. قوسسايىستىڭ قورىتىندىسى بويىنشا باس جۇلدەنى ولجالاعاندار – سەۆدالين مارينوۆ (52 كيلو), نينو تەرزيسكي (56 كيلو), نايم شالامانوۆ (60 كيلو), ميحايل پەتروۆ (67,5 كيلو), الەكساندر ۆىربانوۆ (75 كيلو) جانە انتونيو كرىستەۆ (437,5 كيلو). كەڭەس وداعىنىڭ اۋىر اتلەتتەرىنە ءتورت التىن بۇيىردى. بۇل جۇلدەلەر يۋري ۆاردانيان (82,5 كيلو), اناتولي حراپاتىي مەن ۆيكتور سولودوۆ (90 كيلو) جانە يۋري زاحارەەۆيچ (110 كيلو) سىندى ساڭلاقتاردىڭ ۇلەسىندە. تاعى ءبىر سالماق دارەجەسىندە ماجارستاندىق اندور ءسانيدىڭ (100 كيلو) مەرەيى ۇستەم بولدى. سەدەرتەلەدەگى كورسەتكىشتەرىنىڭ كەزدەيسوق ەمەستىگىن بولگارلار كەلەسى جىلى سوفيادا وتكەن دۇنيەجۇزىلىك دودادا دالەلدەپ, كوماندالىق ەسەپتە تاعى دا ءبىرىنشى ورىندى يەمدەندى.

وسىدان 35 جىل بۇرىن شۆەتسيادا شىمىلدىعى تۇرىلگەن الەم چەمپيوناتى قازاقستاندىق جانكۇيەرلەردىڭ دە جادىندا. سول جارىستا ءبىزدىڭ اناتولي حراپاتىي ونەر كورسەتىپ, ءوزىنىڭ سپورتتىق مانسابىنداعى العاشقى التىنىنا قول جەتكىزدى. ءيا, وعان دەيىن وتانداسىمىزدىڭ ەكى رەت كسرو چەمپيونى (1983, 1984), وداق كۋبوگىنىڭ يەگەرى (1983, 1985), كسرو حالىقتارى سپارتاكياداسىنىڭ جەڭىمپازى (1983) جانە ەۋروپا بىرىنشىلىگىنىڭ قولا جۇلدەگەرى (1984, 1985) اتانعانى راس. بىراق بۇل جارىستىڭ بىردە-بىرەۋىن دۇنيەجۇزىلىك دودامەن ەش سالىستىرۋعا كەلمەيدى. سەدەرتەلەدە ا.حراپاتىي ءوزىنىڭ كوماندالىق ارىپتەسى ۆ.سولودوۆپەن بىرگە باس جۇلدەنى ولجالادى. سول كەزدەردەگى ەرەجە بويىنشا قوس سپورتشىنىڭ ناتيجەسى مەن سالماقتارى بىردەي بولسا, ەكەۋىنە دە التىن مەدال تابىستالاتىن. قوسسايىستىڭ قورىتىندىسى بويىنشا ولار 412,5 كيلولىق زىلتەمىردى ەڭسەردى.

مىنە, جەرلەسىمىزدىڭ حالىقارالىق ارەناداعى جەڭىستى جولى وسىلاي باستالعان ەدى. اقمولا وبلىسىنىڭ اتباسار اۋدانىندا تۋىپ-وسكەن اناتولي ودان كەيىن كوپتەگەن ءدۇبىرلى دودالاردا اتوي سالدى. اتاپ ايتساق, كسرو قۇراماسى ساپىندا 1988 جىلى سەۋل وليمپياداسىنىڭ جەڭىمپازى, 1985-1990 جىلدار ارالىعىندا الەم جانە ەۋروپانىڭ بەس دۇركىن چەمپيونى اتاندى. ەلىمىز تاۋەلسىزدىك العاننان كەيىن دە حراپاتىي سان مارتە قازاقستاندىق جانكۇيەرلەردى قۋانىش پەن شاتتىققا بولەدى. 1996 جىلى اتلانتادا الاۋى تۇتانعان وليمپيا ويىندارىندا كۇمىس مەدالدى يەلەندى. 1993 جانە 1995 جىلدارى وتكەن الەم چەمپيوناتتارىندا قولاعا قول سوزدى. 1994 جانە 1998 جىلدارى ۇيىمداستىرىلعان ازيا ويىندارىندا كۇمىسپەن كۇپتەلدى. باسقا دا ونىڭ تولىپ جاتقان اتاقتارى تاعى بار.

وزەكتى ورتەيتىن ءبىر وكىنىش, اقبەرەن ءاناتوليدىڭ عۇمىرى كەلتە بولدى. 2008 جىلدىڭ 11 تامىزىندا اقمولا وبلىسىنا قاراستى ارشالى كەنتىنىڭ ماڭىندا موتوتسيكلدى تىزگىندەگەن ول قارسى باعىتقا شىعىپ كەتكەن تويوتا كولىگىمەن سوقتىعىسادى. داڭقتى سپورتشى سول جەردە جان ءتاسىلىم ەتتى. ول نەبارى 44 جاستا ەدى...