قازاقستاندىق «استانا» ۆەلوكومانداسىنىڭ رەسەيلىك شاباندوزى الەكساندر ۆلاسوۆ ءبىر كۇندىك «دجيرو د’ەميليا» جارىسىندا باس جۇلدەنى ولجالادى.
1909 جىلدان بەرى ۇيىمداستىرىلىپ كەلە جاتقان ايگىلى ۆەلوجارىس جىل سايىن ەميليا-رومانيا باعىتىمەن باستالىپ, بولونيا قالاسىندا مارەسىنە جەتەدى. «دجيرو د’ەميليا» يتالياداعى ەڭ بەدەلدى جارىستاردىڭ ءبىرى سانالاتىن دودا 2005 جىلدان باستاپ UCI ەۋروپالىق تۋرىنىڭ كۇنتىزبەسىنە ەنگەن.
199,7 شاقىرىمعا سوزىلعان بيىلعى جارىستا «استانا» وكىلى الەكساندر ۆلاسوۆ جەڭىمپاز اتاندى. ءبىر قىزىعى, بۇعان دەيىن بۇل تۋرنيردە «استانانىڭ» بىردە-ءبىر وكىلى جەڭىسكە جەتپەگەن. ەكىنشى ورىندى پورتۋگاليالىق جواۋ المەيدا (Deceuninck-Quick Step) يەلەنسە, ۇزدىك ۇشتىكتى يتاليالىق ۆەلوشاباندوز ديەگو ۋليسسي (UAE) تۇيىندەدى. ال «استانانىڭ» دانيالىق كاپيتانى ياكوب فۋلسانگ مارە سىزىعىن بەسىنشى بولىپ كەستى.
ايتا كەتەيىك, 24 جاستاعى ۆلاسوۆ بۇعان دەيىن فرانتسيا تاس جولىندا وتكەن ءبىر كۇندىك «مون ۆانتۋ چەللەندج» جارىسىندا دا الدىنا جان سالماعان ەدى.