جەر-جاھانعا جايىلعان جامانات ىندەت ءبىزدىڭ ەلگە دە ايتارلىقتاي سوققى بولىپ ءتيدى. اينالامىزداعى اعايىننىڭ كوبى دەرتكە شالدىعىپ, زاۋال زارە-قۇتىمىزدى قاشىردى.
ىندەت ىندەپ بارا جاتقان سوڭ شەكتەۋ شارالارىن مىقتاپ كۇشەيتكەنىمىز اماندىعىمىزدىڭ باستى كەپىلى بولدى. داۋاسى تابىلا قويماعان دەرتكە قارسى تۇرار امالىمىز – ازىرگە الدىن الىپ, قورعانۋ عانا.
كارانتيننىڭ اياقتالعانىن جۇرت اسىعا كۇتكەنى جاسىرىن ەمەس. دەي تۇرعانمەن, ساقتىق شارالارىن بارىنشا ۇستانىپ, دارىگەرلەر مەن مەديتسينا ماماندارىنىڭ ايتقان كەڭەستەرىن ەستەن شىعارماۋىمىز كەرەك. سەبەبى ىندەتتىڭ ءىزى ءوشتى مە, وشپەدى مە ول جاعى ءبىر اللاعا ايان. سوندىقتان وسى ەلدىڭ ءبىر ازاماتى رەتىندە قازاق ەلىن, وتانداستارىمىزدى وسال بولماۋعا, كارانتين ءبىتتى ەكەن دەپ بوساڭسىماۋعا, توي-تومالاققا, ادام كوپ شوعىرلاناتىن جەرلەرگە بارماۋعا شاقىرامىن. وسىعان دەيىن ورىن العان قايعىلى وقيعالاردان ساباق الىپ, ماسكامىزدى تاعىپ, جاقىنىمىزعا جاناشىر بولۋدى جادىمىزدان شىعارماساق دەيمىن. قىزىق پەن قۋانىشقا, توي مەن دۋمانعا باراتىن شاتتىققا تولى شاقتار ءالى الدا. ول ءۇشىن وسىناۋ قيىن كەزەڭدە قيىلىپ تۇسپەي, ەل بولىپ ەڭسەمىزدى تىكتەپ, ءبىر جەڭنەن قول, ءبىر جاعادان باس شىعارار كۇندە بىرلىگىمىزدى تانىتىپ, ءبىر-بىرىمىزگە قول ۇشىن بەرەيىك. تۇعىرلى ەلىمىزدىڭ عۇمىرلى بولاشاعىنا سەنەيىك. ىرگەمىزدەگى ىندەتتى بىرگە جەڭەيىك.
ايبەك بەكبوسىن,
كۇيشى-كومپوزيتور,
ءا.قاشاۋباەۆ اتىنداعى مەملەكەتتىك فيلارمونياسىنىڭ ديرەكتورى
سەمەي