جۋىردا Kazakh Tourism ۇلتتىق كومپانياسىنا قاراستى kazakhstan.travel ينتەرنەت باسىلىمى شەتەلدىك ساپارلار شەكتەلگەننەن كەيىن تەك قانا وزگە ەلدىڭ ساياحاتشىلارى ەمەس, قازاقستاندىق تۋريستەردىڭ دە بارۋى ءتيىس مەكەندەر تۋرالى قىزىقتى مالىمەتتەر جاريالادى.
وڭاشا ساياحاتتاۋ – جاھاندىق ىندەت بەكىتىپ بەرگەن جاڭا ترەند. قالىپتاسقان جاعدايدا قازاقستان ۇسىنار يگىلىكتەرى مول. بۇگىنگى تاڭدا كوروناۆيرۋستىڭ بەلەڭ الۋى جاھاندىق تۇراقتىلىق پەن ءومىرىمىزدىڭ بارلىق سالاسىنداعى قالىپتاسقان قاتىناستاردىڭ بەرىكتىگىنە اسا كۇردەلى سىناق بولىپ تۇر. ىندەتپەن بايلانىستى جاعداي الەمدىك تۋريستىك نارىقتىڭ جۇمىسىنا ەلەۋلى وزگەرىستەر ەنگىزىپ, دامۋدىڭ جاڭا ەرەجەلەرىن بەكىتۋدە. تىنىسى تارىلىپ, اياسى شەكتەلگەن ساياحات سالاسىنىڭ قۇلدىراۋىن بولدىرماۋ ءۇشىن ىندەت سالدارىنىڭ كەرى اسەرىن تومەندەتۋگە قاۋقارلى وزىندىك باعىت-باعدارىمىزدى ايقىنداپ, سول بويىنشا ارەكەت ەتۋىمىز شارت. تۋريستىك ءونىم قۇراۋدىڭ عاسىرلار بويى ەش تۇرلەنبەگەن ءتارتىبى «الەۋمەتتىك قاشىقتى ساقتاۋ» سياقتى ومىرلىك ماڭىزى بار تالاپتارمەن تولىعىپ كەلەدى. ەل اۋماعىنىڭ كەڭدىگى, حالىق تىعىزدىعىنىڭ تومەندىگى, تابيعي ساياباقتاردىڭ كوپتىگى سياقتى كورسەتكىشتەردى نەگىزگە الاتىن بولساق, قازاقستان – كوپشىلىكتەن شالعاي, وڭاشا ساياحاتتاۋدىڭ تاپتىرماس مەكەنى ەكەنىن اڭعارامىز. سونىڭ نەگىزىندە ەلىمىزدەگى الەۋمەتتىك قاشىقتىقتى ساقتاۋ قاتاڭ قاداعالانار تالاپ ەمەس, ەش جاساندىلىعى جوق قالىپتى قۇبىلىس – تابيعي الەۋمەتتىك قاشىقتى ساقتاۋ دەپ قابىلدانادى.
كەيىنگى جىلدارى الەمدىك تۋريزم كارتاسىندا ەلىمىز ەكو-دەستيناتسيا رەتىندە ءجيى بەلگىلەنىپ ءجۇر. قازاقستاننىڭ ەكوتۋريزم بويىنشا رەيتينگتەردە بوي كورسەتۋى دە سوعان دالەل. مىسالى, جىل باسىندا بريتاندىق بەكپەكەرلەر قوعامى بەلسەندى ەكو-ساياحاتقا اۋەس تۋريستەر ءۇشىن 2020 جىلى must visit تىزىمىندە قازاقستاندى «ۇزدىك بەستىككە» جايعاستىردى. بەدەلدى Gulf News باسىلىمىنىڭ مالىمدەۋىنشە, ۇلكەن الماتى كولى ءباا تۇرعىندارى ءۇشىن «ۇزدىك-5 دەستيناتسيا» قاتارىنا كىرەدى. قازاقستاننىڭ بۇدان بولەك تابيعي بايلىعى, يگىلىگى وتە كوپ. ۇلى دالا جەرىندە 13 ۇلتتىق ساياباق, 10 قورىق, 6 تابيعي رەزەرۆات, 50 قاۋمال, 5 قورىقتىق ايماق, 79 تابيعي ەسكەرتكىش ورنالاسقان. ەلدەگى ەرەكشە قورعاۋعا الىنعان تابيعي ايماقتاردىڭ جالپى اۋدانى رەسپۋبليكا جەرىنىڭ 9%-ىن الىپ جاتىر. سالىستىرمالى تۇردە ايتاتىن بولساق, بۇل جەرگە تولىقتاي ۇلىبريتانيا سىيىپ كەتەر ەدى.
ەكولوگيالىق تۋريستىك ءونىم جايلى ءسوز قوزعاعاندا, ونىڭ باستى قۇراۋشى بولىگى – ءتۇرلى تابيعي جانە كليماتتىق جاعدايلارداعى بەلسەندى دەمالىس ەكەنىن مويىنداۋ كەرەك. ءبىر عانا ەلدى, نە ءبىر عانا ايماقتى تاڭداي وتىرىپ, قازاقستانعا كەلگەن تۋريست قىسقا ۋاقىت ارالىعىندا ءار جىل مەزگىلىن تولىق سەزىنە الادى. ەلىمىزدىڭ وڭتۇستىك جانە وڭتۇستىك-شىعىس بولىگىندەگى اسقار تاۋلارى مەن اساۋ وزەندەرى جايلى كليماتپەن ۇيلەسكەن الماتى, شىعىس قازاقستان جانە تۇركىستان وبلىستارىندا جوعارىدا اتالعان سيپاتقا ساي بىرەگەي تۋرلار بەلسەندى تۇردە ۇسىنىلادى.
ۇلى دالا – ەجەلدەن-اق قايسار جيھانكەزدەر ۇمتىلعان تىلسىم مەكەن. كونە تاريحتىڭ ماڭگىلىك مورىندەي بولعان قازاقستاننىڭ وڭتۇستىگى ۇلى جىبەك جولى مەن كوشپەندىلەر ءومىرىنىڭ ءمان-جايى جايلى سىر شەرتەدى. ۇلى جىبەك جولى بويىمەن ساياحاتتاپ ءجۇرىپ, تۋريستەر ماركو پولونىڭ ءىزىن جالعاپ, 2000-جىلدىق تاريحى بار تارازدىڭ تاعىلىمىنان حاباردار بولىپ, تۇركى الەمىنىڭ بەسىگى – تۇركىستاننىڭ تاماشاسىن تانىپ, رۋحاني بايلىققا كەنەلە الادى. باعدار بويىندا ءتۇرلى كورنەكتى نىساندار تىزىلگەن, ونىڭ ىشىندە: بىردە-ءبىر شەگە قاعىلماي تۇرعىزىلعان جاركەنت مەشىتى, بۋددا عيباداتحانالارى, ساۋلەتتى كەسەنەلەر, قىزعالداقتارمەن قۇلپىرعان القاپتار جانە كونە وتىرار قالاشىعىنىڭ قالپىنا كەلتىرىلگەن بولىگى بار. قايسىبىرى بولسىن ۇمىتىلماس ەستەلىكتەر سىيلاپ, كەرەمەت فوتوسۋرەتتەر جاساۋعا مۇمكىندىك بەرەدى. اتامۇرامىز بولعان كوشپەندىلەر مادەنيەتىنىڭ تۇڭعيىعىنا ۇڭىلەتىن بولساق, بۇگىنگى تاڭدا بار الەم باس قاتىرىپ وتىرعان جاۋاپسىز ساۋالداردىڭ شەشىمىن تابۋىمىز عاجاپ ەمەس. كوشپەندىلەردىڭ ءداستۇرلى سالەمدەسۋىنىڭ ءوزى الەۋمەتتىك قاشىقتىقتى ساقتاي وتىرىپ ىزەت ءبىلدىرۋدىڭ كەرەمەت ۇلگىسى.
وسى سياقتى تاماقتانۋ سالتى, تازالىق ساقتاۋ ادەبى, جەتى اتاعا دەيىن قىز الىسپاۋ سياقتى بىرقاتار تاعىلىمدى ادەت-عۇرىپتارىمىز قاشاندا ۇرپاققا جول كورسەتەر تەمىرقازىق بولماق. سول ءۇشىن دە, ۇلتتىق سانا – قازىرگى تاڭدا نەگىزگى ەكپىن ءتۇسىرۋىمىزدى قاجەت ەتەتىن قايتالانباس تۋريستىك ءونىم.
قازاقستان ۇلى جىبەك جولىن جاڭعىرتىپ, ساياحات جاساۋدىڭ تەڭدەسسىز ورنى ەكەنى ءسوزسىز. نۋ ورماندار, كوكپەن تالاسقان شىڭدار, ايدىنى ايناداي كولدەرگە قوسا, تۋريستەر الماتى وبلىسىنداعى قايىڭدى كولىنە, ماڭعىستاۋداعى وزگە عالامشارلىق كورىنىستەردى بەينەلەيتىن بوزجىرا, تۇزبايىر, تورىش, ايراقتى جەرلەرىنە, مارس عالامشارىنىڭ جەردەگى جۇرناعى – شىعىستاعى قيىنكەرىش شاتقالىنا, ورتالىقتاعى اقجار تاۋلارىنا ساياحات جاساي الادى. عارىشقا ءبىر ەلى جاقىنداعىسى كەلگەن ىزدەنىمپاز تۋريستەر بايقوڭىرعا بارىپ قاناعاتتانارى انىق.
وتكەن جىلدار تاجىريبەسى انىقتاپ بەرگەندەي, الەمدىك داعدارىس – وزىق وي مەن جاڭالىقتارعا جول اشىپ, قالىپتاسقان جارامدى-جارامسىز قۇرىلىمداردى سۇرىپتايتىن قۇبىلىس. وسى سىن ساعاتتا ەتنيكالىق جانە ەكولوگيالىق تۋريزمگە باسا نازار اۋدارۋىمىز ىندەتتەن كەيىنگى كەزەڭدە ءتۋريزمدى دامىتۋدىڭ ءساتتى ۇلگىسىنە اينالىپ, بولاشاقتا وتاندىق تۋريزم سالاسىن ىلگەرىلەتۋگە مىقتى سەرپىن بەرەدى.