ماينداعى فرانكفۋرت كىتاپ جارمەڭكەسىندە وقىرمان نازارىنا ۇسىنىلدى
ماينداعى فرانكفۋرت قالاسى قازان ايىندا ءبىر اپتا بويى «ەۋروپانىڭ كىتاپ استاناسى» اتىن يەلەنەدى. مۇندا الەمدىك كىتاپ يندۋسترياسى وكىلدەرىن جينايتىن Frankfurt Buchmesse نەمەسە فرانكفۋرت كىتاپ جارمەڭكەسىنە جىل سايىن 100-دەن استام ەلدىڭ 8 مىڭعا جۋىق كىتاپ وندىرىسىنە ماماندانعان كومپانيالارى قاتىسىپ, ءوز ونىمدەرىن وقىرمان نازارىنا ۇسىنادى.
بۇل كورمەنىڭ باسقا ەمەس, ءدال فرانكفۋرتتا وتكىزىلۋىنىڭ دە وزىندىك تاريحى بار, گۋتەنبەرگتىڭ العاشقى كىتابى XV عاسىردا وسى قالاعا جاقىن جەردە جارىق كورىپ, كىتاپ شىعارۋ ءىسىنىڭ باستاۋى وسى ايماقتان باستالعان ەكەن.
ماينداعى فرانكفۋرت كىتاپ جارمەڭكەسىندە وقىرمان نازارىنا ۇسىنىلدى
ماينداعى فرانكفۋرت قالاسى قازان ايىندا ءبىر اپتا بويى «ەۋروپانىڭ كىتاپ استاناسى» اتىن يەلەنەدى. مۇندا الەمدىك كىتاپ يندۋسترياسى وكىلدەرىن جينايتىن Frankfurt Buchmesse نەمەسە فرانكفۋرت كىتاپ جارمەڭكەسىنە جىل سايىن 100-دەن استام ەلدىڭ 8 مىڭعا جۋىق كىتاپ وندىرىسىنە ماماندانعان كومپانيالارى قاتىسىپ, ءوز ونىمدەرىن وقىرمان نازارىنا ۇسىنادى.
بۇل كورمەنىڭ باسقا ەمەس, ءدال فرانكفۋرتتا وتكىزىلۋىنىڭ دە وزىندىك تاريحى بار, گۋتەنبەرگتىڭ العاشقى كىتابى XV عاسىردا وسى قالاعا جاقىن جەردە جارىق كورىپ, كىتاپ شىعارۋ ءىسىنىڭ باستاۋى وسى ايماقتان باستالعان ەكەن. ال كورمەنىڭ الەمدىك, حالىقارالىق تاريحى قالىپتاسقانىنا 65 جىل. سودان بەرى جارمەڭكە وتەتىن پاۆيلوندار كىتاپ شىعارۋ ءىسى, شىعارماشىلىق سالاسىنداعى جاڭا تەندەنتسيالار تۋرالى پىكىر الىساتىن, جاڭا ونىمدەردىڭ تۇساۋكەسەرى وتەتىن, كىتاپسۇيەر قالىڭ وقىرمان كوپتەپ جينالاتىن ورتالىققا اينالىپ كەلەدى. جارمەڭكەدەگى قازاقستاندىقتاردىڭ جاڭالىعى سول – كورمە كەزىندە «حالىقارالىق باسپا جوباسىنىڭ» اياسىندا «تاۋەلسىز قازاقستان: قازىرگى زامان ادەبيەتىنىڭ ءۇش تومدىق انتولوگياسى» سەرياسىمەن جارىق كورگەن شىعارمالار جيناعىنىڭ تۇساۋكەسەرى ءوتتى. ورىس تىلىندە جارىق كورگەن ءۇش تومدىق انتولوگيا – بالالار ادەبيەتى, قازىرگى قازاق پروزاسىن جانە قازىرگى قازاق پوەزياسىن قامتيدى.
«دومبىرا مەن بەسىك» («دومبىرا ي كولىبەل») جيناعىنا بالالار ادەبيەتىنە قالام تارتقان اقىن-جازۋشىلاردىڭ ەڭبەكتەرى ەنسە, «جۋسان ءيىستى جۇماق ولكە» («مويح ستەپەي پولىننايا زۆەزدا») جيناعىنا 42 اۆتوردىڭ پروزالىق شىعارمالارى توپتاستىرىلعان, «عاسىرلارعا جول تارتقان جاقۇت جىلدار» («دوروگ نەبەسنىح ۆەحي») دەگەن اتپەن شىعارىلعان توم 77 اۆتوردىڭ جىرلارىن قامتيدى. ايتا كەتەرلىك دۇنيە – بۇل قازاق باسپاگەرلەرىنىڭ ماسكەۋدىڭ «حۋدوجەستۆەننايا ليتەراتۋرا» باسپاسىمەن بىرلەسىپ دايىنداعان ورتاق ءونىمى.
انتولوگيانى جارىققا شىعارۋ يدەياسى قازاقستان رەسپۋبليكاسىنىڭ ۇلتتىق بانكىنىڭ ءتوراعاسى قايرات كەلىمبەتوۆكە تيەسىلى. «قازاق پوەزياسىنىڭ انتولوگياسى» 1958 جىلى ۇلى جازۋشىمىز مۇحتار اۋەزوۆ پەن تاكەن الىمقۇلوۆتىڭ العىسوزىمەن باسىلعان ەكەن. ارادا جارتى عاسىردان استام ۋاقىت وتكەندە, سونىڭ ءىزىن جالعاستىرا جارىق كورگەن بۇل ءۇش تومدىق ورىس جانە تمد وقىرماندارىن قازاق ادەبيەتىنىڭ جاڭا تىنىسىمەن تانىستىرادى» دەيدى كىتاپ بەتىندە ءوز پىكىرىمەن بولىسكەن باس بانكير. انتولوگيانى قۇراستىرعان قازاقستاننىڭ بەلگىلى باسپاگەرى, جازۋشى-عالىم رايحان ماجەنقىزى مەن «حۋدوجەستۆەننايا ليتەراتۋرا» باسپاسىنىڭ ديرەكتورى, رەسەيدىڭ بەلگىلى ءپۋبليتسيسى گەورگي پرياحين.
وسى تۇساۋكەسەر اياسىندا «حالىقارالىق باسپا جوباسى», سونداي-اق, جازۋشى, تۇركىتانۋشى عالىم, فيلولوگ, فرانتس كافكا سىيلىعىنىڭ يەگەرى نەمات كەلىمبەتوۆتىڭ بىرنەشە تىلگە اۋدارىلعان شىعارمالارىن دا وقىرمان نازارىنا ۇسىندى.
جازۋشى-عالىمنىڭ ۇزەڭگىلەس جولداسى بولعان, پروفەسسور, اكادەميك سەيىت قاسقاباسوۆ نەمات كەلىمبەتوۆتىڭ زەرتتەۋشىلىك باسىمدىقتارىنا توقتالادى. «نەمات كەلىمبەتوۆ كونە ءداۋىر ادەبيەتى مەن قازاق ادەبيەتىنىڭ بايلانىسىن زەرتتەپ, قازاق ادەبيەتىن كونە عۇن, ساق ءداۋىرى ادەبيەتىمەن جالعاستىرعان عالىم. وعان دەيىنگى زەرتتەۋشىلەر قازاق ادەبيەتىنىڭ تاريحىن ەجەلگى تۇركى قاعاناتى كەزەڭى, ءحى عاسىر ادەبيەتىنەن باستاسا, نەمات كەلىمبەتوۆ پروفەسسور بەيسەنباي كەنجەباەۆتىڭ قولداۋىمەن قازاق ادەبيەتىنىڭ باستاۋ بۇلاعىن ەجەلگى عۇن, ساق داۋىرىنە دەيىن سوزدى, ۇزارتتى», – دەدى ول.
قانات ەسكەندىر,
«ەگەمەن قازاقستان».
الماتى.