«قازاقستان-2050» ستراتەگياسى جانە «نۇر وتان» پارتياسى

ءبىز ءوزىمىزدى ۇدايى قامشىلاپ, العا ۇمتىلا بىلسەك قانا «قازاقستان-2050» ستراتەگياسىنداعى بيىك ماقساتتارعا جەتە الامىز. پارتيامىز تۇعىرلى, ەلدىگىمىز عۇمىرلى بولسىن. ماڭگىلىك ەلدى بىرگە جاسايىق!

نۇرسۇلتان نازارباەۆ.

قازاقستان رەسپۋبليكاسىنىڭ پرەزيدەنتى, «نۇر وتان» پارتياسىنىڭ توراعاسى ن.ءا.نازارباەۆتىڭ پارتيانىڭ XV سەزىندە سويلەگەن ءسوزى

قۇرمەتتى سەزد دەلەگاتتارى! قادىرلى قوناقتار! بۇگىنگى باسقوسۋدىڭ ورنى ايرىقشا. وتكەن 15 جىلدىڭ قورىتىندىسىن شىعارۋ تۇرعىسىنان جانە بولاشاق باعدار تۇرعىسىنان دا بولەكشە كۇن. بۇل – ەلىمىز «قازاقستان-2050» ستراتەگيا­سىن قابىلداعاننان بەرگى پارتيامىزدىڭ العاشقى باسقوسۋى. ءبىز الىس بولاشاققا كوز تىگىپ, الدى­مىزعا بيىك مەجەلەر بەلگىلەدىك. قانداي ماقساتقا قاي جولمەن جەتەتىنىمىزدى ناقتىلاپ, ونى جۇزەگە اسىرۋعا كىرىستىك. ەلىمىزدىڭ ەرتەڭى ستراتەگياسىن قالاي ىسكە اسىرۋىمىز كەرەك, سونى ويلاستىرامىز. ونى مۇلتىكسىز جۇزەگە اسىرىپ, قازاق ەلىن دامۋدىڭ دارا جولىنا باستاۋ ەلدەگى ەڭ قۋاتتى ساياسي كۇش – «نۇر وتانعا» جۇكتەلىپ وتىر. ءبىز ءوزىمىزدى ۇدايى قامشىلاپ, العا ۇمتىلا بىلسەك قانا «قازاقستان-2050» ستراتەگياسىنداعى بيىك ماقساتتارعا جەتە الامىز. پارتيامىز تۇعىرلى, ەلدىگىمىز عۇمىرلى بولسىن. ماڭگىلىك ەلدى بىرگە جاسايىق!

نۇرسۇلتان نازارباەۆ.

  قازاقستان رەسپۋبليكاسىنىڭ پرەزيدەنتى, «نۇر وتان» پارتياسىنىڭ توراعاسى ن.ءا.نازارباەۆتىڭ پارتيانىڭ XV سەزىندە سويلەگەن ءسوزى قۇرمەتتى سەزد دەلەگاتتارى! قادىرلى قوناقتار! بۇگىنگى باسقوسۋدىڭ ورنى ايرىقشا. وتكەن 15 جىلدىڭ قورىتىندىسىن شىعارۋ تۇرعىسىنان جانە بولاشاق باعدار تۇرعىسىنان دا بولەكشە كۇن. بۇل – ەلىمىز «قازاقستان-2050» ستراتەگيا­سىن قابىلداعاننان بەرگى پارتيامىزدىڭ العاشقى باسقوسۋى. ءبىز الىس بولاشاققا كوز تىگىپ, الدى­مىزعا بيىك مەجەلەر بەلگىلەدىك. قانداي ماقساتقا قاي جولمەن جەتەتىنىمىزدى ناقتىلاپ, ونى جۇزەگە اسىرۋعا كىرىستىك. ەلىمىزدىڭ ەرتەڭى ستراتەگياسىن قالاي ىسكە اسىرۋىمىز كەرەك, سونى ويلاستىرامىز. ونى مۇلتىكسىز جۇزەگە اسىرىپ, قازاق ەلىن دامۋدىڭ دارا جولىنا باستاۋ ەلدەگى ەڭ قۋاتتى ساياسي كۇش – «نۇر وتانعا» جۇكتەلىپ وتىر. ەڭ ۇلى جولدىڭ ءوزى شاعىن عانا قا­دامنان باستالادى. وسىدان 14 جىل بۇرىن پارتيانىڭ العاشقى سەزىنە نەبارى 400-گە جۋىق دەلەگات قاتىسقان ەدى. از عانا جىلدا «نۇر وتان» 250 فيليالى, 6300 باستاۋىش ۇيىمى بار الىپ قۇرىلىمعا اينالدى. اتقارۋشى جانە وكىلەتتى بيلىك تارماقتارىندا تىزگىندى بەرىك ۇستادى. ەلدىك ىستەردىڭ بارلىعىنا بەلسەنە ارالاسىپ كەلەدى. مەنىڭ باستامالارىما ءاردايىم قىزۋ قولداۋ ءبىلدىرىپ, يدەيالارىمدى قۇلشىنا ىسكە اسىرىپ كەلەدى. وسى ارقىلى تەلەگەي تاجىريبە جيناقتادى. حالىق كوزدەگىنى عانا ەمەس, كوڭىلدەگىنى دە كورەدى. «نۇر وتان» ناقتى ناتيجەنىڭ, ىلكىمدى ءىستىڭ پارتياسى اتانىپ, ەلدىڭ كوڭىلىنەن شىعا ءبىلدى. «ەلىڭ قۋاتتى بولسا, باعىڭ تۇراقتى بولادى» دەيدى حالقىمىز. كۇنىمىزدى شۋاقتى ەتە ءتۇسۋ ءۇشىن ەلىمىزدى قۋاتتى ەتۋ بارلىعىمىزدىڭ ورتاق پارىزىمىز. ەلىمىزدى الەمنىڭ ەڭ قۋاتتى 30 ەلىنىڭ قاتارىنا قوسۋ – الدىمىزداعى ۇلكەن, ۇلى ماقسات. بۇل «نۇر وتاننىڭ» بولاشاققا جول سىلتەيتىن تەمىرقازىعى بولۋعا ءتيىس. بۇگىنگى سەزدە قابىلداناتىن «نۇر وتاننىڭ» جاڭا ساياسي دوكتريناسى دا وسىنى كوزدەيدى. ءبىز قوعامىمىزدىڭ ەرەكشەلىكتەرىن ارتىقشىلىققا اينالدىرا بىلدىك. ءار الۋاندىعىمىز – بايلىعىمىزعا, بىرلىگىمىز – تابىسىمىزعا اينالدى. وسىنى ۇلت زيالىلارى ۇنەمى ەستە ۇستاپ, جاستارعا ءاردايىم ىنتىماقتىڭ ۇلگىسىن كورسەتكەنى ءجون. دوكترينادا مەملەكەتتىك ءتىلدىڭ ەل بىرلىگىنىڭ فاكتورى رەتىندە اتالعانى دا وتە ماڭىزدى. بۇل ماسەلەگە اسا دەن قوياتىن كەز كەلدى. قازاق ءتىلىن ءبىلۋ ازاماتتىق پارىزدى عانا ەمەس, ۇلتقا دەگەن قۇرمەتتى دە بىلدىرەدى. وتان وتباسىنداعى ونەگەلى تاربيەدەن باستاۋ الادى. وسىنى ءاربىر ازامات ەسىندە ۇستاۋى ءتيىس. بيىل تاۋەلسىزدىگىمىزدىڭ 22 جىلدى­عىن اتاپ وتەيىن دەپ وتىرمىز. ول – اتا-بابامىزدىڭ اڭساعان ارمانى. سونىڭ بارشاسىندا وسى وتىرعان كوپشىلىكتەرىڭىز, بىرگە كەلە جاتقان مەنىڭ سەرىكتەستەرىم, قىزمەتتەس دوستارىم, جولداستارىم, ۇكىمەت مۇشەلەرى, پارلامەنت دەپۋتاتتارى, بارلىق دەڭگەيدەگى اكىمدەر بۇكىل حالىقتى ۇيىمداستىرىپ, ونى جەڭىسكە جەتكىزدىك. سول ءۇشىن بارشالارىڭىزعا زور ريزاشىلىعىمدى بىلدىرەمىن. قۇرمەتتى دەلەگاتتار مەن سەزد قوناقتارى! بۇل فورۋم قازاقستاننىڭ جاڭا تاريحىنىڭ بەتبۇرىستى بەلەسىندە ءوتىپ وتىر. ءبىزدىڭ قوعامىمىز 2050 ستراتەگياسىندا جاريا ەتىلگەن جاڭا ۇلى ماقساتقا سەنىمدى قادام جاسادى. ءححى عاسىردىڭ ورتا شەنىندەگى قازاقستاننىڭ تاريحي شىرقاۋ شىڭى شىمىر دا جۇمىر بەلگىلەنگەن. نەنى جانە قالاي ىستەيتىنىمىزدى, قانداي ماقساتقا قول جەتكىزگىمىز كەلەتىنىن بىلەمىز. ءوزىنىڭ ىڭعايىنا قاراي تاريح قاشاندا ۋاجدەرىن العا تارتىپ وتىرادى, تيىسىنشە جاعداياتتار دا وزگەرەدى, سوعان وراي ءبىزدىڭ دە وزگەرۋىمىزگە تۋرا كەلەدى. الايدا, الداعى ماقسات ءبىز ءۇشىن دە, كەلەر ۇرپاق ءۇشىن دە ناقپا-ناق ايقىندالعان. مەرزىمىنەن بۇرىن ورىندالعان 2030 ستراتەگياسىن جۇزەگە اسىرۋ بارىسىنداعى سياقتى, بۇل ءبىزدى شابىتتاندىرادى. بۇل باعدارلامانى دا ءبىزدىڭ ورىنداي الاتىندىعىمىزعا جانە حالقىمىزدىڭ يگىلىگى مەن ەلدەگى تۇراقتىلىقتى قامتاماسىز ەتە بىلەتىنىمىزگە مەن سەنىمدىمىن. باعدارلامانىڭ وزەگى – ءبىزدىڭ الەمدەگى ەڭ دامىعان 30 ەلدىڭ ءبىرى بولۋعا ءتيىستى ەكەندىگىمىز. ماقساتىمىزدىڭ اسا اۋقىمدىلىعى ايدان انىق. ءوزىنىڭ تاريحىندا ءبىزدىڭ حالقىمىز تاپ قازىرگىسىندەي ەكونوميكالىق جانە الەۋمەتتىك شىڭداردى باعىندىرىپ كورگەن ەمەس. مۇنى جاساۋ تەك قازاقستاندىقتاردىڭ قازىرگى ۇرپاعىنىڭ عانا قولىنان كەلدى. تاۋەلسىزدىكتى جاريا ەتىپ, قازاقستانىمىزدى دامىتا وتىرىپ, ءبىز دامۋدىڭ شالعاي شەتىنەن ءبىرجولا شىعىپ كەتتىك, ەۋرازيانىڭ لايىقتى جاڭا مەملەكەتى بولدىق. ەندىگى جەردە قاشاندا بۇكىلالەمدىك قوعامداستىقپەن قاتار ادىمداۋعا ءتيىسپىز. 2050 ستراتەگياسى – ءبىزدىڭ الەمدەگى ەڭ تانىمال ۇلتتاردىڭ شوعىرىنا ءبىرجولاتا قوسىلۋىمىز ءۇشىن بەرىلگەن ۇلى تاريحي مۇمكىنشىلىك. بۇگىنگى تاڭدا شەشىلۋى ەكونوميكانى, قوعام مەن مەملەكەتتى دامىتۋدىڭ جاڭا بەلەسىنە شىعۋعا مۇمكىندىك بەرەتىن ناقتى مىندەتتەردى پىسىقتاۋ اياقتالىپ كەلەدى. الدىمىزدا اۋقىمدى, كۇردەلى جۇمىس تۇر. 2050 ستراتەگياسىندا مەن ءححى عاسىردىڭ جاھاندىق 10 سىن-قاتەرىن ناقتى ءبولىپ كورسەتتىم. وتكەن جىل بۇل بولجامنىڭ دۇرىستىعىن دالەلدەپ بەردى. جاھاندىق دامۋدىڭ درامالىق كەرنەۋ كۇشى كوزگە ۇرىپ-اق تۇر. جىل باسىندا «كيپر داعدارىسىنىڭ» ءورتى زورعا دەگەندە وشىرىلگەن ەدى. بۇگىندە ەۋروپا وداعىنىڭ ەڭ تومەنگى ماكروكورسەتكىشتەر شەگىندە تەربەتىلىپ تۇرعان ەكونوميكاسى كۇردەلى كۇيدە. الەۋمەتتىك داعدارىس ءالى دە كۇشتى, جۇمىسسىزدىقتىڭ, ادامداردىڭ كوڭىلى تولماۋىنىڭ دەڭگەيى جوعارى. بريكس-كە مۇشە ەلدەردىڭ بارلىعىنىڭ دەرلىك ەكونوميكالىق قارقىنى ەداۋىر باسەڭدەپ قالدى. جاقىندا عانا بىرىككەن ۇلتتار ۇيىمىنىڭ باس حاتشىسى پان گي مۋن بۇۇ ساراپشىلارىنىڭ بايانداماسىن جاريا ەتتى, وندا 2050 جىلعا قاراي جەر بەتىندەگى حالىقتىڭ 50 پايىزى سۋدىڭ قاتتى تاپشىلىعىن سەزىنەتىنى ايتىلعان. تاياۋ شىعىس ەندى «اراب انتيكوكتەمىن» باستان كەشىرۋدە. ەگيپەت پەن تۋنيستە يسلام­شىلار ءبىر جىلدان از عانا استام ۋا­قىت بيلىك باسىندا تۇرىپ ەدى, سول ۋاقىتتىڭ ءوزى ەل ازاماتتارىنىڭ قالىڭ توبىنىڭ ونداي ساياساتتىڭ تىعىرىققا تىرەمەي قويمايتىنىن تۇسىنۋىنە جەتكىلىكتى بولىپ شىقتى. سيرياداعى ازامات سوعىسىنىڭ اياعى جاپپاي قىرىپ-جوياتىن حيميالىق قارۋدى قورعانسىز ءارى ەشقانداي كىناسىز جاندارعا قارسى قولدانۋمەن تىندى. مەنىڭ ىشكى تۇيسىگىم مەن تاجىريبەم الەمنىڭ تاياۋ بولاشاقتاعى دامۋ كەزەڭى اسا كۇردەلى بولاتىنىن اڭداتادى. وسىنداي جاعدايدا بارلىق قازاقستاندىقتار ءوز وتانىمىزداعى تۇراقتىلىق پەن دامۋ باعدارىن بولجاۋعا بولاتىندىعىنىڭ باعاسىن بىلۋگە ءتيىس! وسىنداي قيىندىقتار مەن داعدارىستار ورىن الىپ تۇرعاندا ءبىزدىڭ ەلىمىز بيىل تۇراقتى دامىپ كەلەدى. بولجامعا قاراعاندا, بيىلعى جىل ءىجو-ءنىڭ شامامەن 6 پايىز وسىمىمەن اياقتالادى. بۇل وتكەن جىلعا قاراعاندا جوعارىراق كورسەتكىش, وعان جاھاندىق نارىقتاعى قۇبىلمالىلىققا قاراماستان قول جەتكىزىلگەنىن قاداپ ايتقىم كەلەدى. ءبىزدىڭ ديقاندارىمىز تاماشا استىق الدى – 20 ميلليون توننا بيداي جينادى. ەلدىڭ جيىنتىق التىن ۆاليۋتا رەزەرۆتەرى كوبەيە تۇسۋدە. بيىل ول كورسەتكىش ۇلتتىق قور قارجىسىن قوسا ەسەپتەگەندە 90 ميلليارد دوللاردان اسىپ ءتۇستى. مۇنىڭ ءوزى ءبىزدىڭ الەمدىك ەكونوميكادا ورىن الاتىن كەز كەلگەن قيىندىقتار مەن سۇرگىندەرگە قارسى قويار كەپىلىمىز, قايتارار جاۋابىمىز بولماق. وتاندىق دايىن ءونىم الەمنىڭ 111 ەلىنە شىعارىلۋدا! قازاقستاندىق ەكسپورت دەگەنىمىز اككۋمۋلياتورلار, ترانسفورماتورلار, مەتالل قۇبىرلارى, تىڭايتقىشتار, ازىق-ت ۇلىك ونىمدەرى سياقتى كوپتەگەن دايىن تاۋارلار. بىزدە ەكونوميكانىڭ اتىمەن جاڭا سالالارى پايدا بولدى. ەلىمىزدە اۆتوموبيل, لوكوموتيۆ, ۆاگون مەن تىكۇشاقتار جاسايتىن وندىرىستەر ەشقاشان بولعان ەمەس. يندۋستريالىق باعدارلاما اياسىندا ءونىمنىڭ 250-دەن استام جاڭا تۇرلەرى يگەرىلدى. ولار – ماشينە قۇرىلىسىنىڭ, فارماتسەۆتيكانىڭ, حيميا ونەركاسىبىنىڭ جوعارى تەحنولوگيالى ونىمدەرى. مىسالى, ەمدىك زاتتاردىڭ 100-دەن استام تۇرلەرىن شىعارۋ يگەرىلگەن! قازىرگى تاڭدا بيىلعى جىلدى بارلىق نەگىزگى كورسەتكىشتەر بويىنشا تابىس­تى اياقتاپ شىعامىز دەپ كۇتۋگە تولىق نەگىز بار. 2050 ستراتەگياسىن جۇزەگە اسىرا وتىرىپ ءبىزدىڭ ەلىمىز تۇبەگەيلى جاقسارۋعا ءتيىس. ول وزگەرىستەر ءبارىن دە قامتيدى, ءبارىن دە تەرەڭنەن قوپارادى. ولار ءبىزدىڭ قوعامىمىز ءومىرىنىڭ بارلىق قىرلارىنا قاتىستى بولادى. بۇل اسا اۋقىمدى جۇمىستىڭ دا باسىندا «نۇر وتان» پارتياسى تۇرۋعا ءتيىس! بۇل سەزدىڭ ءتۇيىندى مىندەتى – ءXحى عاسىردىڭ ورتا شەنىندەگى ءبىزدىڭ بارشا ۇلى ماقساتتارىمىزعا قول جەتكىزۋدەگى «نۇر وتان» پارتياسىنىڭ الار ورنى مەن ساياسي ماڭىزىن ايقىنداۋ. قۇرمەتتى دەلەگاتتار! بىرنەشە ايدان كەيىن, كەلەسى جىلدىڭ ناۋرىزىندا ءبىزدىڭ پارتيامىزعا 15 جىل تولادى. پارتيا قازاقستان تاريحىندا تۇڭعىش رەت بالامالى نەگىزدە وتكىزىلگەن پرەزيدەنتتىك سايلاۋ قارساڭىندا مەنىڭ رەفورمالارىمنىڭ باعىتىن قولدايتىن جالپىحالىقتىق كواليتسيانىڭ ارقاۋىن­دا قۇرىلعان بولاتىن. حالىقتىڭ قالاۋى­نا سايكەس باستى ساياسي كۇشكە اينالعان پىكىرلەستەر وداعى ءدال سول كەزدە قالىپتاسقان ەدى! ءبىزدىڭ جاس دەموكراتيامىز دا ءدال سول كەزدە الەۋەتىن ايقارا اشقان ەدى! كەزىندە باسقا ىلگەرى ەلدەردەگى – سين­گاپۋرداعى, وڭتۇستىك كورەياداعى, جا­پونياداعى سياقتى ءبىزدىڭ ەلدە دە دە­موكراتيا پروگرەسشىل, كوشباسشى پار­تيامەن – «نۇر وتانمەن» بىرگە دۇنيەگە كەلگەن بولاتىن. «نۇر وتاننىڭ» قالىپ­تاسۋ تاريحى – دەموكراتيانىڭ الەمدىك تاجىريبەسىنىڭ اجىراعىسىز بولىگى. ءبىرىنشى سەزدىڭ قالاي وتكەنى جادىمىزدا ءبىرجولا جاتتالىپ قالدى. ول كەزدە ءبىزدىڭ باتىل ارماندارىمىزدىڭ ءوزى قازىرگى جەتىستىكتەرىمىزگە دە ىلەسە الماي جاتاتىن. قازىر وسى زالدا مەن ءوزىمنىڭ ءبىرىنشى سەزدە ايتقان سوزدەرىمدى قايتالاماقشىمىن, ول سوزدەر 15 جىل وتكەندە دە كوكەيكەستىلىگىن جويماعان: «مەنىڭ قىمباتتى جولداستارىم, سىزدەرگە وتان دەپ سوققان جۇرەكتەرىڭىز ءۇشىن ۇلكەن العىسىمدى ايتامىن. سىزدەردىڭ حالىقتىڭ قادىر-قاسيەتىن ويلايتىندارىڭىز, مەملەكەتتىلىكتى ساقتاۋ مەن نىعايتۋ جولىندا ءبارىڭىز ءبىر ءۇيدىڭ بالاسىنداي جۇمىلعاندارىڭىز ءۇشىن راحمەت دەيمىن!». مەن وزىممەن بىرگە جاڭا ەلدى ورناتىسقان بارلىق قازاقستاندىقتارعا ەڭبەگى مەن توزىمدىلىگى ءۇشىن العىسىمدى بىلدىرەمىن! ايرىقشا العىسىمدى مەنىمەن بىرگە ءبىزدىڭ پارتيامىزدى قۇرىسقان سەرىكتەستەرىمە ارنايمىن! «نۇر وتان» پارتياسىن وركەندەتۋگە ۇلەس قوسقانداردىڭ بارىنە العىس ايتامىن! اۋەل باستان-اق پارتيا مەنىڭ پىكىرلەستەرىمنىڭ ىنتا-قۇلشىنىسى مەن سەنىمىنە ارقا سۇيەدى. وسى زالدا سەرگەي الەكساندروۆيچ تەرەششەنكو, قايىرجان شايقى ۇلى تاقۋوۆ, تاعى باسقالار وتىر. ولار ءبىزدىڭ داڭقتى داستۇرلەرىمىزدى ساقتاي ءبىلىپ, پارتيا جۇمىسىنا ءوز ۇلەستەرىن قوسۋىن جالعاستىرىپ جاتىر. ءبىز ءۇشىن العاشقى سىناق 1999 جىلعى پارلامەنتتىك سايلاۋ بولعان ەدى. مىنە, ون بەس جىلعا جۋىق ۋاقىتتان بەرى پارتيا باسەكەلەستى ادال كۇرەستە تالاي رەت سايلاۋ ناۋقانىنىڭ ەلەگىنەن ءوتتى جانە ارقاشان جەڭىسكە جەتىپ وتىردى! ءبىزدى قاي كەزدە دە ءار سايلاۋ وتكەن سايىن بەكي تۇسكەن حالىق قولداۋى جىگەرلەندىرىپ ءجۇردى. «نۇر وتان» پارتياسى قولىنان كەلمەيتىندى ەشقاشان ۋادە ەتكەن ەمەس. ول ءاردايىم ناقتى ىستەر پارتياسى بولا ءبىلدى. جۇزدەگەن مىڭ نۇروتاندىقتاردىڭ كۇش-جىگەرىنىڭ, ءاربىر قازاقستاندىقتىڭ قاجىرلى ەڭبەگىنىڭ ارقاسىندا 2030 ستراتەگياسى مەرزىمىنەن بۇرىن جۇزەگە اسىرىلدى. وسى زالدا كەڭ-بايتاق وتانىمىزدىڭ ءار قيىرىنان كەلگەن سان ءتۇرلى ۇرپاقتىڭ, ۇلتتار مەن كاسىپتەردىڭ وكىلدەرىن – مەنىڭ سەرىكتەستەرىمدى كورىپ وتىرمىن. سىزدەردىڭ ارقايسىڭىز ءوزىنىڭ وتباسى مەن جاقىن ادامدارىنىڭ, قالاسى مەن سەلوسىنىڭ, اۋدانى مەن بۇكىل ەلدىڭ ومىرىندەگى جاڭا جەتىستىكتەرمەن بولىسە الاتىنىنا سەنىمدىمىن. ءار وتباسىنىڭ تۇرمىسىن جاقسارتۋ جونىندە اۋقىمدى جۇمىس اتقارىلدى. جۇزدەگەن جاڭا كاسىپورىندار, جولدار سالىندى, جۇزدەگەن مىڭ جاڭا جۇمىس ورىندارى پايدا بولدى. جاڭا بالاباقشالار مەن مەكتەپتەر, اۋرۋحانالار جۇمىس ىستەپ تۇر. جاڭا ۋنيۆەرسيتەتتەر, كىتاپحانالار, تەاترلار, كونتسەرت زالدارى, ستاديوندار, سپورت الاڭدارى اشىلدى. ەڭ باستىسى – حالقىمىزدىڭ رۋحى قايتا ورلەدى. بۇگىندە «نۇر وتاننىڭ» قاتارىندا 900 مىڭداي پارتيا مۇشەسى بار. نۇروتا­ن­دىق دەپۋتاتتار پارلامەنت ءماجىلىسىن­دە كوپشىلىكتى قۇرايدى. پارلامەنتتىك زاڭ شىعارۋ ىسىندە اسا قوماقتى تاجىريبە جيناقتالدى. پارلامەنتتىڭ تەك بەسىنشى شاقىرىلىمى كەزىندە 140-تان استام زاڭ قابىلدانعان! «نۇر وتاننىڭ» فراكتسيا­سى دەنساۋلىق ساقتاۋ, اگرارلىق سەكتور, مەملەكەتتىڭ الەۋمەتتىك ماڭىزدى قىزمەتتەرى ماسەلەلەرى بويىنشا 12 زاڭ جوباسىن دايىندادى. پارتيا حالىق مۇددەسىن قورعاي بىلەتىن پارلامەنتشىلەر مەن ءماسليحاتتار دەپۋتاتتارىنىڭ تۇتاس شوعىرىن تاربيەلەپ شىعاردى. ءبىزدىڭ پارتيامىز ۇكىمەتتى جاساقتايدى, بيلىكتىڭ بارلىق تارماقتارىنىڭ ءىس-قيمىلىنىڭ رەتتىلىگىن قامتاماسىز ەتەدى. پارتيا جانىنداعى قوعامدىق قۇرى­لىمداردىڭ – سىبايلاس جەمقورلىقپەن كۇرەس جونىندەگى كەڭەستىڭ, قۇقىقتىق كەڭەستىڭ جانە باسقالارىنىڭ قىزمەتىن ايرىقشا اتاپ وتكىم كەلەدى. «جاس وتان» جاستار قاناتى بەلسەندىلىگىن ارتتىرا تۇسۋدە. ءبىزدىڭ پارتيانىڭ جاس مۇشەلەرى وزدەرىنىڭ ەكىنشى سەزىنىڭ شەشىمدەرىن قۇلشىنا ورىنداۋدا. «نۇر وتان» باسقا پارلامەنتتىك پارتيالارمەن, كاسىپوداقتار فەدەراتسياسىمەن, ازاماتتىق اليانسپەن, ارداگەرلەر جانە ايەلدەر ۇيىمدارىمەن, وزگە دە ۇكىمەتتىك ەمەس ۇيىمدارمەن ءوزارا ءىس-قيمىل جاساۋدا. «اق جول» پارتياسى جانە كوممۋنيستىك پارتيانىڭ پارلامەنتتىك فراكتسيالارىنىڭ بەلسەندى ءارى جەمىستى جۇمىسىن ايرىقشا اتاپ وتكىم كەلەدى, ولار قاعيداتتى ماسەلەلەردە وزدەرىنىڭ پىكىرلەرىن ءبىلدىرىپ, ءوز ۇستانىمدارىن قورعايدى جانە قاراپايىم حالىقتىڭ جاقتاستارى بولا بىلەدى. ءبىزدىڭ پارتيا – «قازاقستان-2050» جالپىۇلتتىق دەموكراتيالىق كواليتسيا­نىڭ بىرىكتىرۋشى كۇشى. بۇگىندە «نۇر وتان» – قازاقستاننىڭ ءححى عاسىردا تابىستى قادامدار جاساۋىن قامتاماسىز ەتەتىن ساياسي كوشباسشىلىقتىڭ باستى تەتىگى! قازىر بىزدە حالقىمىزدى جاڭا جەڭىستەرگە سەنىمدى جەتەلەۋ ءۇشىن نە قاجەتتىنىڭ ءبارى بار. ەڭ باستىسى – بارلىق قازاقستاندىقتاردىڭ زور سەنىمى مەن قولداۋى. بۇل – «نۇر وتاننىڭ» ءححى عاسىرداعى ساياسي كوشباسشىلىعىنىڭ نەگىزگى باستاۋى. قازىر پارتيا رەسۋرستارىن دۇرىس ءبولۋ كەرەك. ءار نۇروتاندىقتىڭ پارتيالىق جاۋاپكەرشىلىگىن كۇشەيتۋ قاجەت. ءبىز پارتيا جۇمىسىنىڭ قۋاتىن ءۇش قايتارا ەسەلەندىرۋگە ءتيىسپىز. قۇرمەتتى دەلەگاتتار! «قازاقستان-2050» ستراتەگياسى – ءبىزدىڭ پارتيالىق باعدارلامالارىمىزدىڭ نەگىزى. ونى ورىنداۋ «نۇر وتاننىڭ» سايا­سي كوشباسشىلىعىمەن عانا مۇمكىن ەكەنىنە مەنىڭ ەشقانداي كۇمانىم جوق. پارتيا ءبىرتۇتاس ساياسي ەرىك-جىگەردىڭ گەنەراتورى, قازاقستاندىقتاردى ءبىزدىڭ جولىمىزداعى كەز كەلگەن بۇرىلىستاردان الىپ شىعار جول باستاۋشى رەتىندە ءىس-قيمىل تانىتۋى ءتيىس. بۇل, ءبىرىنشى كەزەكتە, ءبىزدىڭ ەلىمىز تاعدىرى ءۇشىن ۇجىمدىق جاۋاپكەرشىلىگىمىز. «نۇر وتان» سان ءتۇرلى ادامداردىڭ باسىن بىرىكتىرىپ وتىر. ءىس جۇزىندە, پارتيا ءبىزدىڭ بۇكىل قوعامىمىزدىڭ ايناسى ىسپەتتى. پارتيا حالىق مۇددەسىنىڭ باس­تاۋشىسى بولۋى ءۇشىن دەپۋتاتتار كورپۋسى تاراپىنان اتقارۋشى بي­لىك­تىڭ جۇمىسىن ءتيىمدى باقىلاۋ قاجەت ەتىلەدى. بۇگىندە جۇيەلى جاڭارۋ تالابى قويىلىپ وتىر. سوندىقتان ءبىز مۇرات­تارى­مىزدى, قۇندىلىقتارىمىز بەن قاعيداتتارىمىزدى بەكىتەتىن ساياسي دوكترينا قابىلدايمىز. ءبىزدىڭ پارتيا قاشاندا وزگەرىستەردىڭ باسىندا تۇرىپ, تابىستى پارتيالىق تاجىريبەنىڭ جاھاندىق ۇردىستەرىنە ىلەسۋى, قوعامعا قاتىستى كەز كەلگەن تاۋەكەلدەر مەن سىن-قاتەرلەرگە جەدەل جانە يكەمدى ءۇن قاتا ءبىلۋى قاجەت. ءبىز قازىرگى الەمدە تا­بىس تەك ناقتى ءىس-قيمىل ستراتەگيا­سى بار ساياسي كۇشتەرگە عانا جولداس بو­لا­تىنىن انىق كورۋگە ءتيىسپىز. تەك تۇ­راقتى دامۋ مەن حالقىمىز بىرلىگىنىڭ بەرىك كەپىلى رەتىندە ۇزاق مەرزىمدى ساياسي كوشباسشىلىق قامتاماسىز ەتىلەتىن جەردە عانا تابىسقا قول جەتەدى. وسى جولمەن ىرعاقتى دامىعان ەلدەر – تۇركيا, جاپونيا, ءۇندىستان, سينگاپۋر, مالايزيا عانا ەمەس, سونداي-اق سولتۇستىك ەۋروپانىڭ بىرقاتار ەلدەرى – شۆەتسيا, نورۆەگيا, فينليانديا, دانيا ءجۇرىپ ءوتتى. سونىمەن ءبىر مەزگىلدە, تا­ريح­تىڭ جاۋاپتى كەزەڭدەرىندە سايا­سي كوشباسشىلىق السىرەگەن جەردە قو­عام سىلكىنىستەر مەن جانجالداردىڭ الا­ساپىرانىنا باتادى. سوندىقتان «نۇر وتاننىڭ» ءاربىر مۇشەسى – مينيس­تردەن قاتارداعى نۇروتاندىققا دەيىن – پارتيانىڭ ءححى عاسىرداعى كوشباسشىلىعى نەنى بىلدىرەتىنىن ناقتى ءتۇيسىنۋى ءتيىس. ءبىرىنشى. «نۇر وتان» باستى پاتريوتتىق كۇش بولۋى شارت. پارتيانىڭ اسا ماڭىزدى ميسسياسى – «2050» ستراتەگياسىندا جاريالانعان جاڭا قازاقستاندىق پاتريوتيزم قالىپتاستىرۋدىڭ جالپىۇلتتىق تۇپقازىعى بولۋى ءتيىس. بۇل جۇمىسقا «جاس قىران» جانە «جاس ۇلان» بالالار ۇيىمدارى, «جاس وتان» باستاعان جاستار بىرلەستىكتەرى, رەسپۋبليكالىق ارداگەرلەر كەڭەسى, بارلىق پاتريوتتىق باق-تار مەن ۇەۇ-لار قاتىسۋى قاجەت. ەكىنشى. پارتيا قاشاندا جالپىۇلت­تىق بىرلىكتىڭ ورتالىق بۋىنى بولۋى ءتيىس. بىرىنشىدەن, «نۇر وتان» – حالىقتى توپتاستىرۋشى پارتيا. ءبىز بابالارىمىز سان عاسىرلار بويى اڭساعان ارمانعا قول جەتكىزگەنىمىزدى ماقتان ەتە ءبىلۋىمىز كەرەك. ۇلتىمىزدىڭ ۇلى تاريحىنىڭ جاڭا تاراۋى قۋاتتى دا تابىستى تاۋەلسىز مەملەكەتتىڭ شەجىرەسى بولىپ جازىلۋدا. ەلىمىز وسى جىلداردا ەرلىك پەن بىرلىكتىڭ ۇلگىسىن كورسەتتى. تاۋەلسىزدىكتىڭ قيىنشىلىقپەن كەلگەنىن, ونى ۇستاپ قالۋ وڭاي ەمەس ەكەندىگىن حالقىمىز ءبىلدى. وسىنى ءتۇسىنىپ وتىرعان, ءبىر جۇدىرىقتاي جۇمىلىپ وتىرعان حالقىما شىن جۇرەگىمنەن العىسىمدى ايتامىن. بىرتە-بىرتە بارلىق جاعداي تۇزەلەدى, بارلىق ماسەلە شەشىلەدى. بارلىعىمىز قولىمىزعا قونعان التىن قۇس –باقىتىمىزدى ساقتاي بىلەيىك. بۇل – انا ءتىلىمىز بەن اتا ءداستۇرىمىزدىڭ, ۇلتتىق مادەنيەتىمىزدىڭ ماڭگى جاڭعىرۋ ءداۋىرى. «نۇر وتان» مەملەكەتتىك ءتىلدى نىعايتۋعا, قازاقتىڭ ءداستۇرى مەن مادەنيەتىن جاڭعىرتۋعا بايلانىستى قوعامدىق-ساياسي جۇمىستاردىڭ ءتيىمدى جۇيەسىن جاساۋى ءتيىس. ەكىنشىدەن, پارتياعا ءبىزدىڭ كوپەتنوس­تى حالقىمىزدىڭ بىرلىگى ءۇشىن جوعارى جاۋاپكەرشىلىك جۇكتەلەدى. بۇل رەتتە ءتۇرلى دەڭگەيدەگى پارتيا ۇيىمدارى مەن قازاقستان حالقى اس­سامبلەياسىنىڭ, «نۇر وتان» پار­لامەنتتىك فراكتسياسىنىڭ جانە اسسام­بلەيادان سايلانعان ءماجىلىس دەپۋتات­تارىنىڭ بىرلەسكەن ءىس-قيمىلىنىڭ تۇتاس ءبىر جۇيەسى قاجەت. ءبىزدىڭ ۇرانىمىز «ءبىر ەل – ءبىر حالىق – ءبىر تاعدىر» – ءبىز ناقتى ومىردە دايەك­تىلىكپەن جۇزەگە اسىرىپ كەلە جاتقان اسا ماڭىزدى قاعيدات. ۇشىنشىدەن, پارتيا ەل وڭىرلەرىن جاقىنداستىرىپ, وڭىرارالىق بايلانىس­تاردى نىعايتۋى ءتيىس. قازىر مەملەكەتتىڭ جاڭا وڭىرلىك ساياساتىن قالىپتاستىرۋ ۇدەرىستەرى جۇرۋدە. بۇكىل ەلىمىز بويىنشا اۋىلدار مەن اۋداندىق ماڭىزداعى قالالار اكىمدەرىنىڭ سايلاۋى ءوتىپ, جەرگىلىكتى بيلىك باتىل تۇردە جاڭارتىلدى. ورتالىقتان وڭىرلەرگە ەلەۋلى وكىلەت­تىلىكتەر بەرىلدى. وڭىرلەردەن ورتالىققا, سونداي-اق, ورتالىقتان وڭىرلەرگە كادرلاردىڭ روتاتسياسى ءجۇرىپ جاتىر. تەك سىڭىرگەن ەڭبەگىنە نەگىزدەلىپ, كونكۋرس بويىنشا جۇزەگە اسىرىلۋى ءتيىس مەملەكەتتىك قىزمەتكە قابىلداۋ مەن ىلگەرىلەتۋدىڭ جۇيەسى تۇبەگەيلى وزگەرتىلدى. باسقارۋ ورگاندارىندا جۇمىس ىستەي­تىندەردىڭ كورپۋسى ايتارلىقتاي جاڭاردى. پارتياعا تۇرعىنداردىڭ ءبىر ءبو­لىگى­نىڭ ساناسىنداعى وڭىرشىلدىكتىڭ كونەرگەن ءتۇرىن شەشىمدى تۇردە ەڭسەرىپ, جالپىقازاقستاندىق مۇددەلەردى بىرىكتىرۋشى كۇش بولۋى ءتيىس. ءۇشىنشى. «نۇر وتان» قاشاندا ازامات­تىق قوعامنىڭ كوشباسشىسى بولۋى قاجەت. پارتيا, ءبىز قاشاندا اتقارىپ كەلە جاتقانداي, ازاماتتىق اليانسپەن ءبىر­لەسكەن جۇمىستى دامىتۋى, ادامداردىڭ ناقتى پروبلەمالارىن شەشۋشى, ولارعا كومەكتەسۋشى جانە ارقا سۇيەۋشى بارلىق پاتريوتتىق ۇەۇ-لار مۇددەلەرىنىڭ جولباسشىسى بولۋى ءتيىس. «قازاقستان-2050» جالپىۇلتتىق كواليتسياسىن دايەكتىلىكپەن نىعايتۋ جانە كەڭەيتۋ قاجەت. بۇل جۇمىستى بوساڭسىتۋعا بولمايدى, ويتكەنى, ءبىزدىڭ پارتيا ەلدىڭ بولاشاققا قادام باسۋىنىڭ يادروسى بولىپ تابىلادى. ءتورتىنشى. پارتيالىق كوشباسشى­لىق­تىڭ باستى ماسەلەلەرىنىڭ ءبىرى – ەكونوميكالىق جانە الەۋمەتتىك يننوۆا­تسيالاردىڭ جالپىۇلتتىق ەپيتسەنترى بولۋ. ءبىزدىڭ پارتيامىز قوعام مەن مەملەكەتتى دامۋدىڭ باتىل, يننوۆاتسيالىق يدەيالارىمەن نارلەندىرۋى ءتيىس. بۇگىن الەمدىك ەكونوميكا يننوۆاتسيا­لىق كاسىپورىندار مەن ساپالى جۇمىس ورىندارىن قۇرۋ ەسەبىنەن ءوسىمدى قام­تا­ماسىز ەتۋ باعىتىندا جۇمىس ىستەۋدە. سوندىقتان ءتيىستى ماماندار دايىن­داۋ قاجەت. ءبىز يندۋستريالىق-يننوۆا­تسيالىق دامۋ باعدارلاماسىن دەر كەزىندە قابىلدادىق جانە باسقا ەلدەر دە بىزدەن كەيىن وسىنداي يندۋستريالىق باعدارلامالار دايىندادى. ءبىز ونى ەلىمىزدىڭ بۇكىل ەكونوميكاسىن دامىتۋدىڭ تەمىرقازىعى رەتىندە پايدالانۋعا ءتيىسپىز. وسى ەكى ماسەلە دە يننوۆاتسيالار جانە عىلىمي جاڭالىقتار نەگىزىندە شەشىلۋى كەرەك. ءححى عاسىردا عىلىمي جاڭالىقتار شەشىمدەردىڭ ەڭ باستىسى بولادى. يننوۆاتسيالاردىڭ باستى باعىتتارى بيولوگيانىڭ, نانوتەحنولوگيانىڭ جانە ماتەماتيكانىڭ تۇيىسىندە توعىسادى. بولاشاقتىڭ ەنەرگياسىن قامداۋ كەرەك. ولار قازىردىڭ وزىندە جۇمىس ىستەي باستادى. قۋاتتىڭ قازىرشە ادامزاتقا بەيمالىم مۇلدە جاڭا تۇرلەرىن ىزدەۋ ءجۇرىپ جاتىر. ءححى عاسىردا تابىستىڭ ماڭىزدى شارتى كرەاتيۆتىلىك بولىپ تابىلاتىنىن اتاپ كورسەتەمىن. سوندىقتان «نۇر وتان» كرەاتيۆتى پارتيا بولۋى ءتيىس. شىعارماشىل ينتەلليگەنتسيامەن جۇمىستى ايتارلىقتاي كۇشەيتۋ كەرەك. نۇروتاندىقتار قازاقستاندى دامى­تۋدىڭ اسا ماڭىزدى ماسەلەلەرى بويىنشا ينتەرنەت-پىكىرتالاستاردىڭ تۇراقتى قاتىسۋشىسى بولۋى قاجەت. بەسىنشى. ءححى عاسىرداعى كوشباسشى پارتيا – جالپىحالىقتىق باقىلاۋدىڭ باستى قۇرالى. بارىنەن بۇرىن, 2050 ستراتەگياسىنىڭ مىندەتتەرىن جۇزەگە اسىرۋدا «نۇر وتان» فراكتسياسىنىڭ پارلامەنتتىك جانە قوعامدىق باقىلاۋ مۇمكىندىگىن كەڭىنەن پايدالانۋ ماڭىزدى. تەك بەسىنشى شاقىرىلعان ءماجىلىستىڭ جۇمىسى بارىسىندا عانا نۇروتاندىق دەپۋتاتتار پارتيانىڭ سايلاۋالدى تۇعىرناماسىن ورىنداۋدىڭ بارلىق قىرلارى بويىنشا مەملەكەتتىك ورگان­دارعا شامامەن ءۇش جۇزدەي ساۋال جولدادى. بۇل ساۋالدار سايلاۋالدى تۇعىرنامانىڭ ورىندالۋى تۋرالى حالىققا باياندالۋى ءۇشىن مۇقيات قاراستىرىلۋى قاجەت, ويتكەنى, ول ءبىزدىڭ ورتاق ءىسىمىز. زاڭ جوباسىمەن جۇمىس كەزەڭىندە حالىقتىق باقىلاۋدىڭ ماڭىزدى تەتىگى «نۇر وتاننىڭ» پارلامەنتتىك فراكتسياسى جانىنداعى كونسۋلتاتيۆتى-كەڭەسشى ورگانداردىڭ قىزمەتى بولدى. ولار ماڭىزدى زاڭ جوبالارى بويىنشا ساراپشىلاردىڭ باسىن بىرىكتىرەدى, قالىڭ جۇرتشىلىقتىڭ پىكىرلەرىن قاپەرگە الادى. «نۇر وتان» فراكتسياسىنىڭ سالىق سالۋ ماسەلەلەرى بويىنشا قاعيداتتى ۇستانىمىن ەرەكشە اتاپ وتكىم كەلەدى. دەپۋتات-پارتيالاستاردىڭ ورتا تاپقا سالىقتىق سالماقتى ۇلعايتۋعا جول بەرۋگە بولمايتىنى تۋرالى ۇستانىمىن وتە دۇرىس دەپ سانايمىن. بىزدە شاعىن جانە ورتا بيزنەس ءونىمنىڭ 20 پايىزدان ءسال عانا استامىن وندىرسە, ءبىز قاتارىنا قوسىلۋعا ۇمتىلىپ وتىرعان دامىعان ەلدەردە بۇل كورسەتكىش 60-70 پايىزعا جەتەدى. بىزگە ورتا جانە شاعىن بيزنەستىڭ ۇلەسىن 50 پايىزعا دەيىن جەتكىزۋ كەرەك. سوندىقتان ورتا تاپتىڭ نەگىزىن قۇرايتىن كاسىپكەرلىككە جان-جاقتى كومەكتەسۋ قاجەت. مەن وسىدان بەس جىل بۇرىن تاپسىر­عانداي, ءسان-سالتانات زاتتارىنا, ەليتالى جىلجىمايتىن م ۇلىككە, قىمبات اۆتوموبيلدەرگە جاناما سالىقتار ەنگىزۋ قاجەت. مۇنىڭ سول سياقتى الكوگول مەن تەمەكى بۇيىمدارىنا دا قاتىسى بار. بۇل ازاماتتىق جانە پاتريوتتىق ۇستانىم! ۇكىمەت پارلامەنتاريلەردىڭ پىكىر­لەرىنە قۇلاق ءتۇرۋى ءتيىس. ءبىر جاعىنان العاندا, ءبىز بيۋدجەتتى تولىقتىرۋ كەرەك ەكەنىن جانە بىزدە كورپوراتيۆتىك جانە تابىس سالىعى مولشەرلەمەلەرىنىڭ تومەن ەكەنىن تۇسىنەمىز, سونىڭ ەسەبىنەن ءبىز اۋقاتتى ازاماتتار تابىن قۇردىق. بۇل دۇرىس. بۇل ءبىزدىڭ ماقساتىمىز ەدى. بۇل ماقساتتى باعىتتالعان ساياسات. باي ادامدار كوبىرەك بولۋى كەرەك جانە ولار ءوز بايلىقتارىن ولاردىڭ وسىلاي جاساۋىنا جاعداي تۋعىزعان ەلدىڭ دامۋىنا باعىتتاۋى ءتيىس. ەندى, داۋلەتتى ادامدار تابى ۇلعايعان كەزدە, ولار الەۋمەتتىك جاۋاپكەرشىلىك ىسىنە ءوز ۇلەستەرىن قوسا الادى جانە قوسۋعا ءتيىس. بۇكىل الەمدە وسىلاي جاسالادى. ال بىزدە ميلليونەر دە, جۇمىسشى دا بىردەي 10 پايىزدىق تابىس سالىعىن تولەيدى. بۇل جونىندە ويلانۋ قاجەت. سوندىقتان مەن ءوز ارىپتەستەرىم – ءماجىلىس دەپۋتاتتارىنىڭ باستاماسىن قولدايمىن! كونسۋلتاتيۆتى-كەڭەسشى ورگاندار جۇمىسى تاجىريبەسىن ۇلعايتۋ, ولاردى ءماسليحاتتار جۇمىسىندا پايدالانۋ ماڭىزدى. «نۇر وتان» – پارلامەنتتىك پارتيا. سوندىقتان «نۇر وتان» جۇمىسىن كۇشەيتۋدىڭ ماڭىزدى ءبىر باعىتى – ءماجى­لىستەگى فراكتسيا قىزمەتى. ءبىزدىڭ دەپۋتاتتار باستاماشى بولعان ءاربىر زاڭ جوباسى, ءار شەشىم ەلدىڭ ۇزاق مەرزىمدى مۇددەلەرىن ايقىن تۇسىنۋگە نەگىزدەلىپ, دوكترينا قاعيداتتارىمەن كەلىسىلۋى ءتيىس. «نۇر وتان» اشىق, ءمولدىر, ءتيىمدى جانە جاۋاپتى ساياسي كۇشتىڭ قانداي بولا­تىنىن ءوز قىزمەتىمەن دالەلدەۋى كەرەك. ءبىز اشىقپىز جانە ءبىزدىڭ جاسىراتىن ەشتەڭەمىز جوق. ءبىز ادال جۇمىس ىستەيمىز جانە حالىققا بارلىق كەمشىلىكتەر تۋرالى اشىق ايتامىز, پروبلەمالاردىڭ ءالى بار ەكەنىن قولدايمىز جانە تۇسىنەمىز. اركەزدە دە ءبىزدىڭ حالقىمىزدىڭ يگىلىگى ءۇشىن ەڭبەك ەتۋ قاجەت. پارتيا جۇيەلى نەگىزدە ءوزىنىڭ قوعام­دىق قابىلداۋلارىنىڭ جۇمىسىن كۇشەيتۋى كەرەك. تەك بيىلعى جىلى عانا قوعامدىق قابىلداۋلار ازاماتتاردىڭ ءجۇز مىڭعا تارتا وتىنىشتەرىن وڭدەۋدەن وتكىزدى. سول سياقتى تاياۋ كۇندەرى ءبىز «ەلەك­تروندى پارتيا» جوباسىن ىسكە قوستىق. ەندى ينتەرنەتكە قول جەتكىزگەن ءاربىر ازامات ۇيىنەن شىقپاي-اق «نۇر وتانعا» ءوتىنىش جاساي الادى. ازاماتتارمەن تۇراقتى ۇنقاتىسۋ قاجەت. «نۇر وتاندى» حالىقتىق قولداۋدىڭ سارقىلمايتىن باستى قاينار كوزى دە مىنە, وسى! ساياسي كوشباسشىلىقتىڭ قاعيداتتى ماسەلەسى – ءبىزدىڭ جەمقورلىققا قارسى بىتىسپەس ستراتەگيامىز. پارتيا نۇروتاندىقتاردىڭ ازاماتتىق ار-وجدانىنىڭ ءپرينتسيپتى ساقشىسى بولۋى كەرەك. ادامدار جەرگىلىكتى جەردە جەم­قورلاردى تۇستەپ تانيدى, ال بۇل ولاردى قاتارداعى نۇروتاندىقتار دا بىلەدى دەگەن ءسوز. ولار ءبىرىنشى بولىپ دابىل قاعىپ, جەمقورلاردى اشكەرەلەۋى كەرەك. پارتيا مەن قۇقىق قورعاۋ قۇرىلىم­دارىنىڭ مىندەتى – جەمقورلىقپەن كۇرەسۋشىلەردى قورعاپ, ولارعا كومەكتەسۋ. مەملەكەتتىك قازىنانىڭ ءبىر تەڭگەسى دە قاراۋسىز قالماۋى ءتيىس. تەك سوندا عانا قازىناعا قول سالۋ­شىلىقپەن كۇرەس تابىستى بولماق! التىنشى. ءححى عاسىردا كوشباس­شى­لىققا تەك جاستار بەلسەندى قولداۋ كورسەتكەن پارتيا عانا يە بولا الادى. سوندىقتان مەن جاستار ساياساتىن الەۋمەتتىك جاڭعىرتۋدىڭ ماڭىزدى باعىتى رەتىندە بەلگىلەدىم. «جاس وتان» ەكى ءجۇز مىڭنان استام ادامنىڭ باسىن بىرىكتىرەدى. ءبىر جىل بۇرىن «جاس وتاننىڭ» ەكىنشى سەزىندە مەن جاستارمەن جۇمىستى كۇشەيتۋدىڭ كەشەندى باعدارلاماسىن ۇسىندىم. بىراق, اشىعىن ايتايىن, مەنىڭ تاپ­سىرمالارىمنىڭ ورىندالۋى جارتىكەش جۇرۋدە. ماسەلەن, ۇكىمەت 2020 جىلعا دەيىنگى جاستار ساياساتىنىڭ تۇجىرىمداماسىن بەكىتتى. بىراق ونى جۇزەگە اسىرۋ جونىندەگى ءىس-شارالار جوسپارىندا ۇكىمەت قارجى­لاندىرۋ كولەمىن بەلگىلەمەگەن. ءبارى «بولىنگەن ليميتكە سايكەس» اكىمشىلىك باعدارلامالاردى ساتىپ الۋعا بەرىلگەن. ال بۇل ليميتتەر الۋشىلارعا دەيىن جەتە مە – ماسەلە مىنە, سوندا. باسقا ءبىر مىسال. مەنىڭ تاپسىرمام بويىنشا ءبىلىم جانە عىلىم مينيسترلىگى «جاستار» عىلىمي-زەرتتەۋ ورتالىعىن قۇرعان. بىراق تاعى دا سول قارجىلاندىرۋدىڭ جوقتىعىنان ول تولىققاندى جۇمىس جۇرگىزە المايدى. سويتە تۇرسا دا, ول جەرگىلىكتى جەرلەردە دەمەۋشىلەر ەسەبىنەن تابۋعا بولاتىن جانە سول سياقتى ۇكىمەت تە بولە الاتىن ازعانتاي عانا قارجى. وڭىرلەردە جاستاردىڭ رەسۋرستىق ورتالىقتارىن قۇرۋ دا سوزىلىپ بارادى. بۇگىندە 10 وڭىردە 96 ورتالىق قانا جۇمىس ىستەيدى. استانا جانە الماتى قالالارىندا, اقتوبە, باتىس قازاقستان, قىزىلوردا, سولتۇستىك قازاقستان وبلىستارىندا بۇل جۇمىسقا ءتىپتى كىرىسپەگەن دە. مەنىڭ تاپسىرمام بويىنشا بۇكىل ەلدە «جاسىل ەل» جوباسى جۇزەگە اسىرىلىپ جاتقانىن سىزدەردىڭ ءبارىڭىز جاقسى بىلەسىزدەر. ءبىز نەگىزىنەن شولەيتتى جانە جارتىلاي شولەيتتى بولىپ تابىلاتىن كولەمى بو­يىنشا الەمدە توعىزىنشى اۋماققا يەمىز, ورماندى بولىك 10 پايىزدان از جەردى الادى. سوندىقتان ەلدى جاسىل جەلەككە بولەۋ قورشاعان ورتا مەن ازاماتتارىمىزدىڭ دەنساۋلىعى ءۇشىن ماڭىزدى, بۇل ۇلكەن پاراساتتى ءىس. بۇل جوبا جالعاسىن تابۋى كەرەك جانە پارتيا وعان قولداۋ كورسەتۋى ءتيىس. بيىل قورشاعان ورتانى قورعاۋ مينيسترلىگى جەلىسى بويىنشا 429 ميل­ليون­نان استام تەڭگە ءبولىندى. ماسەلەن, وڭتۇستىك قازاقستان وبلىسىندا جاستاردىڭ ەڭبەك وتريادتارىنىڭ وبلىستىق شتابىنا اقشا تەك وقۋ جىلى باستالار الدىندا تامىزدا عانا كەلىپ تۇسكەن! وسىنىڭ سالدارىنان ستۋدەنتتەردىڭ نەگىزگى بولىگى باعدارلاماعا قاتىسۋدان باس تارتۋعا ءماجبۇر بولدى. بۇل باسشىلاردىڭ كەمشىلىگى. بۇل جەردە ستۋدەنتتەردىڭ كىناسى جوق. مەنىڭ تاپسىرمالارىمدى ورىندامايتىن ناقتى شەنەۋنىكتەر كىنالى. جاستار ساياساتىنا دەگەن مۇنداي كوزقاراسقا جول بەرۋگە بولمايدى. پارتيا باسشىلىعى مەن ۇكىمەتكە اكىمدەرمەن بىرلەسىپ جاعدايدى تۇزەتۋدى جانە «جاس وتاننىڭ» ەكىنشى سەزىندە مەن بەرگەن بارلىق تاپسىرمالاردى ورىنداۋ جونىندە ناقتى جۇمىستارمەن اينالىسۋدى تاپسىرامىن. جاستار – ءبىزدىڭ التىن قورىمىز! جاس قازاقستاندىقتاردىڭ پارتيا باعىتىن قولداۋى, ولاردىڭ ستراتەگيا-2050-ءدى جۇزەگە اسىرۋعا كەڭىنەن اتسالىسۋى زور تاريحي جانە تۇراقتاندىرۋشى ماڭىزعا يە. مەن پارتيا سەزى مىنبەرىنەن بارلىق قازاقستاندىق جاستارعا تاعى دا ءسوزىمدى ارناعىم كەلەدى. ءبىزدىڭ ەلىمىزدە جاسالعانداردىڭ ءبارى, ەڭ الدىمەن, سىزدەر ءۇشىن! سىزدەر ءۇشىن قازاقستاندا بارلىق ەسىكتەر اشىق! حالىقتىڭ بىرلىگىن ساقتاڭىزدار! ءبىز ءۇشىن وسىنداي قازاقستاندى قۇرىپ جاتقان ءبىزدىڭ اتا-انالارىمىزدىڭ, اعا بۋىننىڭ ەڭبەگىن باعالاڭىزدار! ءبىزدىڭ وتانىمىزدىڭ ۇلى بولاشاعى ءۇشىن قاجىرلىلىقپەن جانە لايىقتى وقىپ, ەڭبەك ەتىڭىزدەر! سىزدەر – بۇكىل قازاقستاننىڭ ۇمىتىسىزدەر! وسى شارۋانىڭ ءبارى جاستار ءۇشىن, ەلىمىزدىڭ تاۋەلسىزدىگى ۇزاعىنان بولۋى ءۇشىن جانە كوك تۋىمىز ماڭگىلىك جەلبىرەۋى ءۇشىن جاسالىپ جاتىر. ماڭگىلىك ەل بولۋ ءۇشىن جاسالۋدا. كەلەسى ۇرپاق ەل ءۇشىن, جەر ءۇشىن, ءوزىم ءۇشىن دەپ ەڭبەك ەتۋى كەرەك. تەك قانا ەڭبەكپەن باقىتتى بولاسىڭ. جەتىنشى. «نۇر وتان» ءبىزدىڭ مەملەكەتىمىزدىڭ باستى سىرتقى ساياسي قۇندىلىقتارىن بەلسەندى جاقتاپ جانە العا باستىرۋى كەرەك. ولار كەڭىنەن ءمالىم. قازاقستاننىڭ ءوسىپ كەلە جاتقان حالىقارالىق بەدەلى سولارعا نەگىزدەلگەن. ءبىز تەڭدەستىرىلگەن جانە قاۋىپسىز, كوپپوليارلى جانە تولەرانتتى الەمدى قولدايمىز. بۇل قۇندىلىقتاردى پارتيا وزگە ەلدەردىڭ رۋحى مەن كوزقاراستارى بو­يىنشا جاقىن ساياسي پارتيالارىمەن بايلانىستاردى كەڭەيتە وتىرىپ, پارلامەنتارالىق جانە حالىقارالىق قىزمەتىندە العا باستىراتىن بولادى. «نۇر وتاننىڭ» ءححى عاسىرداعى ۇزاق مەرزىمدى كوشباسشىلىعىنىڭ مىندەتتەرى وسىنداي. قۇرمەتتى دەلەگاتتار! پارتيا سەزىنىڭ الدىندا ساياسي دوكترينا قابىلداۋ مىندەتى تۇر. ونىڭ جوباسى «نۇر وتاندا» جانە قوعامدا كەڭىنەن تالقىلاندى. «نۇر وتاننىڭ» باعدارلامالىق قۇجاتتارى اركەزدە دە ناقتىلى بولدى, سوندىقتان ولار ناتيجەلى بولىپ كەلدى. ءبىز ەشقاشان قۇرعاق قيالعا بەرىلگەن ەمەسپىز. ءبىز ەشقاشان ب ۇلىڭعىر مىندەتتەر قويىپ, بوس ۋادەلەر بەرگەن جوقپىز. ءبىز ءاربىر ءسوزىمىزدى اركەزدە دە شىنايى ەڭبەكپەن جانە ناقتى ىستەرمەن ايعاقتاپ وتىرامىز. مەن اركەزدە دە سولاي بولاتىنىنا سەنىمدىمىن! ويتكەنى, «نۇر وتان» – كوشباسشى پارتيا! قىمباتتى دوستار, ارىپتەستەر! ءبىزدىڭ باستى پارتيالىق برەندىمىز – قازاقستان, تەك قانا العا! ستراتەگيا-2050-ءدى جۇزەگە اسىرۋعا بايلانىستى ول ودان دا زور ناقتى مازمۇنعا يە بولادى. العا – جاڭا يننوۆاتسيالىق-يندۋس­تريالىق ەكونوميكاعا! العا – ءبىرتۇتاس جانە توپتاسقان ۇلت رەتىندەگى قازاقستاندىقتاردىڭ جاڭا ءومىر ساپاسىنا! العا – ءححى عاسىرداعى ىرعاقتى دامۋ­شى جانە جاۋاپتى مەملەكەت رەتىندەگى قازاقستاننىڭ حالىقارالىق بەدەلىنىڭ جاڭا شىڭدارىنا! بۇلار ءبىزدىڭ جيىرما ءبىرىنشى جۇزجىلدىقتىڭ ورتاسىنا دەيىنگى ءىس-قيمىلىمىزدىڭ بىرەگەي ءۇش باعىتى. وندا پارتيا مەن مەملەكەتتىڭ الداعى جۇمىستارىنىڭ تاريحي ءمانى تۇيىندەلگەن. بۇل ءبىزدىڭ ورتاق قازاقستان ارمانى­نىڭ ەڭ تەرەڭ ءمانى. قىمباتتى دوستار! الدىمىزدا بيىك بەلەستەر بار. ولاردان القىنباي اسۋ, بەلەستەردى بارلىقپاي باعىندىرۋ – ءبىزدىڭ ءوز قولىمىزدا. مىزعىماس بىرلىك پەن تىنىمسىز ەڭبەك, جاسامپازدىق پەن جاڭاشىلدىق, جاۋاپكەرشىلىك – ءبىزدىڭ ەڭ باستى قۇرالى­مىز وسىلار. ءبىز ءوزىمىزدى ۇدايى قامشىلاپ, العا ۇمتىلا بىلسەك قانا «قازاقستان-2050» ستراتەگياسىنداعى بيىك ماقساتتارعا جەتە الامىز. پارتيامىز تۇعىرلى, ەلدىگىمىز عۇمىرلى بولسىن. ماڭگىلىك ەلدى بىرگە جاسايىق! العا, «نۇر وتان»! العا, قازاقستان!