بۇگىن, 18 قازاندا استانادا مەملەكەت باسشىسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ توراعالىعىمەن پارتيانىڭ كەزەكتەن تىس XV سەزى بولىپ ءوتتى. بۇل تۋرالى اقوردانىڭ ءباسپاسوز قىزمەتى حابارلادى.
سەزد جۇمىسىنا پارتيانىڭ بارلىق وڭىرلىك فيليالىنان ۇسىنىلعان 1200 دەلەگات, سونداي-اق شاقىرىلعان مىڭنان استام قوناق قاتىستى, ولاردىڭ اراسىندا ۇكىمەتتىك ەمەس ۇيىمدار مەن جاستار ۇيىمدارىنىڭ, ديپلوماتيالىق كورپۋستىڭ وكىلدەرى, مادەنيەت پەن سپورت قايراتكەرلەرى, مەملەكەتتىك ورگاندار مەن ۇلتتىق حولدينگتەر باسشىلارى بار.
سەزد دەلەگاتتارى «نۇر وتان» پارتياسىنىڭ قۇندىلىقتار باعدارىن بەلگىلەۋگە, پارتيانىڭ الداعى ونداعان جىلدارداعى ميسسياسىن ايقىنداۋعا ارنالعان جاڭا ساياسي دوكتريناسىن قابىلدادى. سەزدە پارتيا جارعىسىنا وزگەرىستەر مەن تولىقتىرۋلار ەنگىزۋ, ونىڭ اتاۋى مەن ەمبلەماسىنا, ساياسي كەڭەسىنىڭ قۇرامىنا وزگەرىستەر ەنگىزۋ ماسەلەلەرى, سونداي-اق باقىلاۋ-تەكسەرۋ ورگاندارىنىڭ بىرقاتار جايتتارى قارالدى.
ءوز سوزىندە مەملەكەت باسشىسى بۇل فورۋم قازاقستاننىڭ جاڭا تاريحىنىڭ بەتبۇرىستى كەزەڭىندە ءوتىپ وتىرعانىن ايتتى.
– قوعامىمىز «قازاقستان – 2050» ستراتەگياسىندا ايتىلعان جاڭا ۇلى ماقساتتارعا باتىل قادام باستى. قازاقستان مەرەيىنىڭ XXI عاسىردىڭ ورتاسىنداعى تاريحي اسقاقتاۋى قىسقا دا نۇسقا تۇردە ناقتى كورىنىس تاپقان. ستراتەگيانىڭ وزەگى – ءبىزدىڭ الەمدەگى ەڭ دامىعان 30 ەلدىڭ قاتارىنا قوسىلۋعا ءتيىس ەكەنىمىز. ءبىزدىڭ ماقساتتارىمىزدىڭ كەرەمەت ەكەنى ايقىن كورىنگەن. حالقىمىز قازىر قول جەتكىزگەن وسىنداي ەكونوميكالىق جانە الەۋمەتتىك بيىكتەرگە وتكەن تاريحىندا ەشقاشان جەتكەن جوق. بۇنى تەك قازاقستاندىقتاردىڭ بۇگىنگى بۋىنى عانا جۇزەگە اسىرا الدى. تاۋەلسىزدىكتى جاريالاپ, قازاقستانىمىزدى دامىتىپ, ءبىز دامۋ پەريفەرياسىنان ءبىرجولا الىستاپ, ەۋرازياداعى لايىقتى جاڭا مەملەكەتكە اينالدىق. ەندى بۇكىل الەمدىك قوعامداستىقپەن ءبىز ءاردايىم ءبىر يىقتاسا جۇرۋگە ءتيىسپىز, – دەدى نۇرسۇلتان نازارباەۆ.
قازاقستان پرەزيدەنتى پارتيانىڭ XXI عاسىرداعى كوشباسشىلىعى قانداي بولۋى كەرەكتىگى جونىندەگى كوزقاراسىن ءبىلدىردى. اتاپ ايتقاندا, مەملەكەت باسشىسى, «نۇر وتان» باستى پاتريوتتىق كۇشكە اينالۋعا ءتيىس ەكەنىن ايتتى. پارتيانىڭ ماڭىزدى ميسسياسى, «قازاقستان – 2050» ستراتەگياسىندا اتاپ كورسەتىلگەندەي, جاڭا قازاقستاندىق ءپاتريوتيزمدى قالىپتاستىرۋدىڭ جالپىۇلتتىق ورتالىعىنا اينالۋ. بۇعان قوسا, پارتيا جالپىۇلتتىق بىرلىكتىڭ ورتالىق بۋىنى بولۋى قاجەت. بۇل تۇرعىدا «نۇر وتاننىڭ» حالىقتى توپتاستىرۋشى پارتيا رەتىندەگى مارتەبەسىن ەسكەرە وتىرىپ, وعان كوپەتنوستى حالقىمىزدىڭ بىرلىگى ءۇشىن زور جاۋاپكەرشىلىك جۇكتەلەدى. ول وڭىرارالىق بايلانىستى نىعايتۋ ءىسىن دە اتقارۋعا ءتيىس.
تاعى ءبىر نەگىزگى مىندەت رەتىندە قازاقستان پرەزيدەنتى پارتيانىڭ ازاماتتىق قوعامداعى كوشباسشىلىعىنىڭ ماڭىزدىلىعىن اتادى. وسى ورايدا, ول ازاماتتىق اليانسپەن بىرلەسكەن جۇمىستى دامىتىپ, ادامداردىڭ ناقتى پروبلەمالارىن شەشەتىن پاتريوتتىق باعىتتاعى بارلىق ۇكىمەتتىك ەمەس ۇيىمدار مۇددەسىنىڭ قورعاۋشىسى بولعانى ءجون.
پارتيانىڭ كوشباسشىلىعىنىڭ تاعى ءبىر قىرى – «نۇر وتاننىڭ» ەكونوميكالىق جانە الەۋمەتتىك يننوۆاتسيالاردىڭ جالپىۇلتتىق قاينار-كوزىنە اينالۋ. سونداي-اق, نۇرسۇلتان نازارباەۆ «قازاقستان – 2050» ستراتەگياسى مىندەتتەرىن ىسكە اسىرۋ ءۇشىن پارلامەنتتىك جانە قوعامدىق باقىلاۋ مۇمكىندىكتەرىن كەڭىنەن پايدالانۋ قاجەتتىگىنە توقتالدى.
قازاقستان پرەزيدەنتى الەۋمەتتىك جاڭعىرتۋدىڭ ماڭىزدى باعىتى جاستار ساياساتى ەكەنىنە بايلانىستى XXI عاسىردا كوشباسشىلىقتىڭ تىزگىنى تەك جاستار بەلسەنە قولدايتىن پارتيادا عانا بولاتىنىن ايتتى.
سوڭىندا نۇرسۇلتان نازارباەۆ ستراتەگيا-2050-ءدى جۇزەگە اسىرۋ ارقىلى پارتيانىڭ باستى ۇرانى بۇدان دا ناقتىراق مانگە يە بولاتىنىن اتاپ ءوتتى.
– العا – جاڭا يننوۆاتسيالىق-يندۋستريالىق ەكونوميكاعا, ءبىرتۇتاس ءارى ۇيىسقان ۇلت رەتىندەگى قازاقستاندىقتاردىڭ جاڭا ساپالى ومىرىنە, ءححى عاسىردىڭ قارقىندى ءارى جاۋاپتى مەملەكەتى رەتىندەگى قازاقستانىڭ حالىقارالىق بەدەلىنىڭ جاڭا شىڭدارىنا! بۇل – ءبىزدىڭ ءىس-قيمىلىمىزدىڭ جيىرما ءبىرىنشى عاسىردىڭ ورتاسىنا دەيىنگى ءۇش تۇعىرلى ۆەكتورى. مەملەكەت پەن پارتيانىڭ الداعى جۇمىسىنىڭ تاريحي ماعىناسى وسىندا جاتىر. ءبىزدىڭ ورتاق قازاقستاندىق ارمانىمىزدىڭ تەرەڭ ءمانى دە وسى, – دەدى مەملەكەت باسشىسى.
سەزد بارىسىندا پارلامەنت سەناتىنىڭ دەپۋتاتى ن.ورازالين, «التىن جۇرەك» سىيلىعىنىڭ ۇيىمداستىرۋ كوميتەتىنىڭ ءتورايىمى ج.وماربەكوۆا, پارلامەنت ءماجىلىسى كوميتەتىنىڭ توراعاسى م.اشىمباەۆ, «ەركە-نۇر» كومپانياسىنىڭ پرەزيدەنتى ف.مەرحاميتقىزى, قوستاناي قالاسى ءماسليحاتىنىڭ دەپۋتاتى ت.نوۆيكوۆا, «وقجەتپەس» ەمدەۋ-ساۋىقتىرۋ كەشەنىنىڭ باسشىسى ك.توسەكباەۆ, قىزىلوردا وبلىسى جاڭاقورعان اۋدانى سۋناق اتا اۋىلدىق وكرۋگىنىڭ اكىمى ا.قىستاۋباەۆا ءسوز سويلەدى.
سەزد سوڭىندا «نۇر وتان» پارتياسىنىڭ كوشباسشىسى ن.ءا. نازارباەۆتىڭ توراعالىعىمەن جانە ۇكىمەت مۇشەلەرى مەن وڭىرلىك فيليالدار باسشىلارىنىڭ قاتىسۋىمەن پارتيا ساياسي كەڭەسىنىڭ كەڭەيتىلگەن بيۋرو وتىرىسى ءوتتى. ونىڭ بارىسىندا پارتيانى جاڭعىرتۋعا, اپپارات جۇمىسىنىڭ تيىمدىلىگىن تۇبەگەيلى كوتەرۋگە بايلانىستى ناقتى تاپسىرمالار بەرىلدى.