«حابار» اگەنتتىگى كورەرمەندەرگە تاعى ءبىر تەلەحيكايا ۇسىنعالى وتىر. ونى «استانا تەلەفيلم» كومپانياسى «جىگىتتەر وقيعاسى» اتاۋىمەن تۇسىرگەن بولاتىن. بۇل تۋرالى «حابار» تەلەارناسى حابارلادى.
شىعارماشىلىق توپتىڭ ايتۋىنشا, بۇل فيلم بۇدان بۇرىنعى تۇسىرىلگەن تەلەحيكايالاردان وزگەشە بولماق. بالا كەزدەن بىرگە وسكەن ءتورت جىگىتتىڭ تاعدىرى ءتورت تاراپقا ءبولىنىپ, جىلدار وتە قايتا ءبىر ارناعا توعىسادى. ارينە, مۇندا دا ماحاببات, ساتقىندىق, جازاتايىم جاعدايلارعا تاپ بولعان وقيعالار سۋرەتتەلەدى. دەگەنمەن, ەڭ باستىسى دوستىق دەگەن ۇلى ۇعىم فيلم وزەگىنە ارقاۋ بولعان.
«قازىرگى كەزەڭدە كوپتەگەن سەريالدار ءتۇسىرىلىپ جاتقانى انىق. ال ەندى جاڭا سەريالدىڭ ءبىر وزگەشەلىگى - جىگىتتەر جايىندا, جىگىتتەردىڭ دوستىعى جايىندا .ءبىز ايەلدەر تۋرالى دا وسى كەزگە دەيىن ءبىراز سەريال تۇسىردىك ەمەس پە؟! ەندى ءاربىر ەركەكتىڭ باسىنان كەشكەن جاعداي تۋرالى كورىنىس كورەرمەندەردى ويلاندىرادى دەگەن سەنىمدەمىن»,-دەيدى اكتەر ازامات شارعىنباەۆ.
تەلەحيكاياعا تاجىريبەلى اكتەر جانە تەلەجۇرگىزۋشى جان بايجانباەۆ, ازامات شارعىنباەۆ سىندى ازاماتتارمەن قاتار, وليمپيادا چەمپيونى, ۆەل باركەر كۋبوگىنىڭ يەگەرى سەرىك ساپيەۆ تۇسۋدە. وليمپيادا چەمپيونى جۇمىس كەستەسىنىڭ تىعىز بولۋىنا قاراماستان دوستىق پەن وتباسىلىق قۇندىلىقتاردى ناسيحاتتايتىن فيلمگە تۇسۋگە بىردەن كەلىسىمىن بەردى. «فيلم ستسەناريى مەنى قىزىقتىردى. الدىمەن مۇندا سپورت, سونىڭ ىشىندە بوكس جاقسى دارىپتەلەدى. سونىمەن قاتار مەن مۇندا ءوزىمدى وينايمىن. بۇل مەنىڭ كينوعا العاش ءتۇسۋىم. ارينە, باستاپقىدا قاتتى قوبالجىدىم. بىراق, ءار دۋبل سايىن كامەرا الدىنداعى قورقىنىشىم سەيىلىپ كەلەدى»,-دەيدى لوندون وليمپياداسىنىڭ چەمپيونى سەرىك ساپيەۆ.
15 سەريالى «جىگىتتەر وقيعاسى» تەلەحيكاياسى قازاق جانە ورىس تىلدەرىندە جارىق كورەدى. تامىز ايىندا باستالعان ءتۇسىرىلىم, بۇل كۇندەرى سوڭىنا تاياپ قالدى. كورەرمەندەر جاڭا تۋىندىنى «حابار» ارناسىنان قاراشادا كورە الادى.
دانيار تۇيمەباي.