قازاقستان قورعانىس مينيسترلىگى الداعى ەكى جىلدىڭ ىشىندە كاسىبي ارمياعا كوشۋ ۇدەرىسىن اياقتاۋدى جوسپارلاپ وتىر. قازىرگى ۋاقىتتا قازاقستان اسكەرى ارالاس پرينتسيپ بويىنشا جاساقتالۋدا. قارۋلى كۇشتەردە مەرزىمدى قىزمەتتىڭ جاۋىنگەرلەرى دە, كەلىسىمشارت بويىنشا اسكەري قىزمەتشىلەر دە قىزمەت ەتەدى.
قازاقستان قورعانىس مينيسترلىگى الداعى ەكى جىلدىڭ ىشىندە كاسىبي ارمياعا كوشۋ ۇدەرىسىن اياقتاۋدى جوسپارلاپ وتىر. قازىرگى ۋاقىتتا قازاقستان اسكەرى ارالاس پرينتسيپ بويىنشا جاساقتالۋدا. قارۋلى كۇشتەردە مەرزىمدى قىزمەتتىڭ جاۋىنگەرلەرى دە, كەلىسىمشارت بويىنشا اسكەري قىزمەتشىلەر دە قىزمەت ەتەدى.بۇل رەتتە قاتارداعى جانە سەرجانتتىق قۇرامداعى اسكەري قىزمەتشىلەردىڭ 65 پايىزى كەلىسىمشارت بويىنشا قىزمەت اتقاراتىنىن اتاپ وتكەن ءجون. مەرزىمدى قىزمەتتەگى ساربازداردىڭ سانىن قىسقارتۋ شاقىرۋشىلار سانىن ازايتۋ ەسەبىندە جۇرگىزىلەدى. ەگەر شاقىرىلۋشىنىڭ جوعارى ءبىلىمى بولسا, وندا ول 6 ايدان سوڭ كەلىسىمشارت بويىنشا قىزمەتىن جالعاستىرۋعا قۇقىلى, ال قالعاندارى ءبىر جىلدان سوڭ كەلىسىمشارت بويىنشا اسكەري قىزمەتىن جالعاستىرا الادى.
– قازىر قورعانىس مينيسترلىگى بويىنشا 12 مىڭعا جۋىق مەرزىمدى قىزمەتتىڭ ساربازدارى قالدى. ءبىز وسى كۇزدە 6 مىڭ جاۋىنگەردى زاپاسقا شىعارىپ, 1,5 مىڭ ادامدى اسكەر قاتارىنا شاقىرامىز. 2014 جىلدىڭ كوكتەمىندە تاعى 6 مىڭ جاۋىنگەر زاپاسقا شىعارىلسا, 1,5 مىڭ ادام اسكەر قاتارىنا شاقىرىلاتىن بولادى. ۋاقىت وتە كەلە وسى مىڭ جارىم شاقىرىلۋشى 500 ادامعا دەيىن قىسقارماق. 2016 جىلى ارميامىزدى 99 پايىز كاسىبيلەر قۇرايتىنىنا سەنىمدىمىن, – دەپ اتاپ ءوتتى قورعانىس ءمينيسترىنىڭ ءبىرىنشى ورىنباسارى – قر قك باس شتابىنىڭ باستىعى, گەنەرال-پولكوۆنيك ساكەن جاسۇزاقوۆ.
قازاقستان رەسپۋبليكاسى قارۋلى كۇشتەرىنىڭ كەلىسىمشارت بويىنشا اسكەري قىزمەتشىلەرى لايىقتى ەڭبەكاقى مەن الەۋمەتتىك پاكەتتى يەلەنىپ, تۇتاستاي تۇرعىن ۇيمەن قامتاماسىز ەتىلەدى. 10 جىلدان كەم قىزمەت ەتكەن اسكەري قىزمەتشىلەرگە تۇرعىن ءۇيدى جالعا العانى ءۇشىن اقشالاي وتەماقى تولەنەتىن بولادى. ال الىس گارنيزونداعى اسكەري قىزمەتشىلەر ءۇشىن تۇرعىن ۇيلەر تۇرعىزىلادى. 2014 جىلى 500 ءۇي سالىنادى. قورعانىس مينيسترلىگى 2017 جىلعا دەيىن بارلىق اسكەري قىزمەتشىلەردى تۇرعىن ۇيمەن قامتاماسىز ەتۋدى جوسپارلاپ وتىر.
سونىمەن قاتار, قورعانىس مينيسترلىگى اسكەري قىزمەتشىلەرگە لايىقتى ءبىلىم الۋ مۇمكىندىگىن دە ۇسىنىپ وتىر. 2014 جىلى 1 قىركۇيەكتە ۇلتتىق قورعانىس ۋنيۆەرسيتەتى ششۋچينسكىدەن استانا قالاسىنا كوشىرىلەدى. بولاشاقتا سەرجانتتاردىڭ اكادەمياسىن نەمەسە ينستيتۋتىن قۇرۋ جوسپارلانعان. وفيتسەرلەر مەن سەرجانتتار 8 جىل اسكەري قىزمەت ەتكەن سوڭ قورعانىس مينيسترلىگىنىڭ ەسەبىنەن شەت مەملەكەتتەردىڭ وقۋ ورىندارىندا ءبىلىم الا الادى.
– مەملەكەت باسشىسى – جوعارعى باس قولباسشى ن.ءا. نازارباەۆتىڭ تالابى بويىنشا قازاقستاننىڭ قارۋلى كۇشتەرى سانى از, دايىندالعان, كاسىبي جانە قازىرگى زامانعى اسكەري تەحنيكالارمەن جابدىقتالۋى ءتيىس. بۇل ۋاقىت تالابى, ويتكەنى, قازىر اسكەري ءىس-قيمىلداردى جۇرگىزۋ ونەرى وزگەردى. بۇگىندە وپەراتسيالاردىڭ تابىسىن جاڭا قارۋ-جاراقتار, تەحنولوگيالار مەن تەحنيكالار شەشەدى. وسى قارۋ-جاراقتاردى يگەرىپ, ولاردى قولدانۋ ءۇشىن بىزگە جان-جاقتى دايىندىقتان وتكەن جوعارى سىنىپتى ماماندار قاجەت, – دەپ اتاپ ءوتتى قر قك باس شتابىنىڭ باستىعى.
بۇدان بۇرىن حابارلاعانىمىزداي, بيىلعى العاشقى ۇگىت-ناسيحات ناۋقانى شەڭبەرىندە 7 مىڭ ادام كەلىسىمشارت نەگىزىندە قىزمەت ەتۋگە نيەت ءبىلدىردى. قورعانىس مينيسترلىگى كەلىسىمشارت بويىنشا كەزەكتى ىرىكتەۋ شارالارىن 2014 جىلدىڭ باسىندا جۇرگىزەدى.
«ەگەمەن-اقپارات».