جۇرگىزۋشى – رۋسلان يگىلىك.
بۇگىن, 17 قازان كۇنى 56 جانە 75 كيلوعا دەيىنگى سالماقتار بويىنشا ىرىكتەۋ ۇرىستارى بولىپ ءوتتى.
قىتايدىڭ 56 كيلوعا دەيىنگى سالماقتاعى ءنومىرى ءبىرىنشى بوكسشىسى جياۆەي زانگ گەرمانيالىق ەدگار ۆالتپەن كەزدەسۋىندە ازيا بوكس مەكتەبىنىڭ كارى قۇرلىقتان تومەن ەمەس ەكەنىن تانىتتى. راس, بۇل ايقاس ەكى جاقتىڭ بىردەي دەرلىك مۇمكىندىكتەرىن كورسەتۋلەرى نەگىزىندە ءوربىدى. اقىرىندا تورەشىلەر اسپان استى ەلى وكىلىنىڭ مىقتىراق ەكەنىن مويىندادى. ال ونى كەلەسى جولى بۇدان دا مىقتى – كۋبالىق 20 جاسار روبەيسي راميرەس كۇتىپ تۇر. بۇگىندە اتىنان ات ۇركەتىن روبەيسي ەلوي راميرەس كاررازانانىڭ اتاقتارىن ءتىزىپ شىعۋدىڭ وزىنە قىرۋار ۋاقىت كەتەدى. ءبىز سولاردىڭ بىرقاتارىن اتاپ كورەيىك. ول 1993 جىلعى 20 جەلتوقساندا تۋعان. 2012 جىلعى لوندون وليمپياداسىنىڭ چەمپيونى, الەمنىڭ 2009 جىلعى كادەتتەر اراسىنداعى قولا جۇلدەگەرى, الەمنىڭ 2010 جىلعى جاستار اراسىنداعى چەمپيونى, پانامەريكا ويىندارىنىڭ 2010 جانە 2011 جىلدارعى چەمپيونى, كۋبا وليمپياداسىنىڭ 2010 جىلعى ءفيناليسى, جاستار وليمپيالىق ويىندارىنىڭ 2010 جىلعى چەمپيونى, كۋبانىڭ 2010 جىلعى قولا جۇلدەگەرى, 2012, 2013 جىلدارعى چەمپيونى. ال باكۋدە 1/8 فينالدا رەسەيلىك ميشا الوياننان ۇتىلىپ قالعان.
ارميان ارام اۆاگيان مەن بريتانيالىق دجامال ءيافايدىڭ اراسىنداعى ۇرىس تا تارتىستى ءوتتى. ەكەۋى دە جۇرتتى اشىق ۇرىسىمەن قۋاندىردى. سوندا دا بولسا, بۇلاردىڭ الدىڭعىلارىنىڭ باسىمدىلىعى بىلىنە بەردى. تورەشىلەر دە سوسىن ادىلدىگىنە جۇگىنىپ, اتاعى ارتىقتاۋىنا جەڭىلگەنىن مويىنداتتى. كەلەسى جەكپە-جەكتە يتاليان ياحين پارينەلو ءۇش راۋندتا شىداس بەرمەگەن گرۋزين اۆتانديل چۋبابريادان باسىم ءتۇستى.
ءبىزدىڭ جانكۇيەرلەردى بۇل سالماقتا ەلەڭدەتكەن بارىنەن بۇرىن رۋمىن نيكولاە اندرەانا مەن كانادالىق تاي جىگىتى تانجيت ءلالليدىڭ اراسىنداعى ايقاس بولدى. سەبەبى, وسىلاردىڭ جەڭگەنى كەلەسى اينالىمدا ءبىزدىڭ قايرات ەراليەۆپەن ايقاساتىن ەدى. بۇل ۇرىس تەڭ دارەجەدە ءوتتى. ەكىنشى راۋندتا كانادالىق بەلسەندى كورىندى. بىراق سوڭعى راۋندا رۋمىن جىگىتى كوبىرەك ءدال سوققى جاسادى. وسى شايقاستىڭ تاعدىرىن شەشىپ كەتتى.
75 كيلوعا دەيىنگى بوكسشىلار اراسىندا بىزگە ەكى جۇپتىڭ تەكەتىرەسى نازار اۋدارتتى. بۇلاردىڭ بىرىنشىسىندە رەسەيلىك ارتەم چەبوتارەۆ پەن گايانا وكىلى دەننيس توماس ۇشىراستى. بايقاپ قاراپ تۇرعان ادام ارتەمنىڭ تازا ورىس وعلانى ەكەنىنە كۇمان كەلتىرەر ەدى. شىنىندا دا ول ءبىز بىلەتىن بۇل ءناسىل وكىلدەرىنە ۇقساي بەرمەيدى. ءتۇرى اقشىل بولعانىمەن, شاشى قويۋ. كوزدەرى قوڭىر. سويتسەك, ونىڭ اناسى قازاقتىڭ قىزى ەكەن. سول جيەن بالا بۇل كۇنى جاقسى ايقاستى. سونىڭ دالەلى, ەكىنشى راۋندتا شايقاستى ءوز پايداسىنا شەشە ءبىلدى. كەلەسى كەزەكتە تۇركىمەن ازيز اچيلوۆ ءوزىنىڭ قيمىلىمەن ۇنادى. ۇرىسىمەن ۇنادى. ال ۇرىستى تەز بىتىرگەندەردىڭ ءبىرى بولعان وزبەك ازيزبەك ابدۋگافاروۆ جونىندە ءسوز باسقا. بۇل جولى سەيشەل ارالدارىنان كەلگەن جوۆەتتە ءجيندى ءبىرىنشى راۋندتا-اق ىسكە العىسىز ەتىپ تاستاعان ونىڭ الىسقا باراتىنى انىق سياقتى.
بۇگىنگى كۇننىڭ ءبىر ەرەكشەلىگى, ول 1/32 فينالدىق ىرىكتەۋ شايقاستارىن اياقتايدى. بۇگىن كەشكى سەسسيا بىتكەسىن, ەرتەڭ 1/16 فينال باستالادى. ولاردا قازاق بوكسشىلارى ءبىرىنشى رەت شارشى الاڭعا شىققالى تۇر. ءبىزدىڭ جىگىتتەردىڭ اراسىندا ازىرگە تەك جانىبەك ءالىمحان ۇلى مەن يۆان دىچكونىڭ عانا قارسىلاستارى كىم بولاتىنى بەلگىسىز. كەشكى سەسسيادان كەيىن بۇلاردىڭ الدىڭعىسىنىڭ باسەكەلەسى انىقتالادى. ال يۆان 1/8 فينالدان باستاپ قانا ۇرىسقا قوسىلادى.
ءبىز ەرتەڭنەن باستاپ جىگىتتەرىمىزدىڭ كىمدەرمەن شىعاتىندارىن كەشكە بايانداپ بەرەمىز.
چەمپيونات تۋرالى بارلىق ماتەريالدارمەن گازەتتىڭ Egemennews.kz سايتىنان تانىسا الاسىزدار. وسى جەردى باسىڭىز.